អ្នកវិទ្យាសាស្ត្រថាជំងឺផ្ដាសាយឆ្លងថ្មី អាចសម្លាប់មនុស្សជិត ១លាននាក់គួរឲ្យភ័យខ្លាច

2018-03-22 02:12:31
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកវិទ្យាសាស្ត្របានព្យាករណ៍ថា ជំងឺគ្រុនផ្ដាសាយឆ្លងថ្មីមួយអាចសម្លាប់មនុស្ស ៨៨៦ ០០០ នាក់ ហើយ ជិតបីភាគបួននៃប្រជាជននៅចក្រភព អង់គ្លេស ឆ្លងជំងឺនេះ។

នៅក្នុងកម្មវិធីទូរទស្សន៍មួយរបស់ BBC អ្នកវិទ្យាសាស្ត្រពីរនាក់ បានគណនាពីភាពឆាប់រហ័សនៃការរាតត្បាតជំងឺគ្រុនផ្តាសាយថ្មីនៅទូទាំងប្រទេស ដោយប្រើប្រាស់ទិន្នន័យពីមនុស្សប្រហែល ៣០ ០០០ នាក់។ ការព្យាករណ៍នេះបានធ្វើឡើងប៉ុន្មានសប្តាហ៍ប៉ុណ្ណោះ បន្ទាប់ពីចក្រភពអង់គ្លេស និងសហរដ្ឋអាមេរិក មានការផ្ទុះជំងឺគ្រុនផ្តាសាយថ្មីដែលបានរាលដាលដល់មន្ទីរពេទ្យជាច្រើន។

យោងតាមការវិភាគមួយបង្ហាញថា មនុស្សជាង ៤៣ លាននាក់នឹងប្រឈមហានិភ័យដោយសារជំងឺនេះ។

លោកវេជ្ជបណ្ឌិត Tedros Adhanom ប្រធានអង្គការសុខភាពពិភពលោក បានព្រមានកាលពីខែមុនថា មនុស្សជាតិ គឺងាយរងគ្រោះដោយសារជំងឺឆ្លងខ្លាំងណាស់។ លើសពីនេះទៀត គណៈរដ្ឋមន្ត្រីអង់គ្លេស បានចុះបញ្ជីជំងឺគ្រុនផ្តាសាយ ជាការគំរាមកំហែងធំបំផុតរបស់ចក្រភពអង់គ្លេស ហើយមានគ្រោះថ្នាក់ជាងភេរវកម្ម និងការវាយប្រហារតាមអ៊ីនធឺណិតទៅទៀត។

ទោះយ៉ាងណាក៏ដោយ កម្មវិធីថ្មីរបស់ BBC កំពុងតាមដានចំនួនមនុស្សដែលបានឆ្លងជំងឺនេះ និងផ្ដល់មធ្យោបាយការពារមួយចំនួន ដើម្បីទប់ស្កាត់ការរីករាលដាលកាន់តែធំឡើង៕