ក្រោយចេញពីតំណែងគ្រប់គ្រង ករុណា ពេជ្រ នឹងវិលមកធ្វើជាតារាចម្រៀងវិញឬទេ?
- 2018-03-23 03:10:13
- ចំនួនមតិ 0 | ចំនួនចែករំលែក 0
ក្រោយចេញពីតំណែងគ្រប់គ្រង ករុណា ពេជ្រ នឹងវិលមកធ្វើជាតារាចម្រៀងវិញឬទេ?
ចន្លោះមិនឃើញ
លោក ករុណា ពេជ្រ បានបន្ថយការច្រៀងស្ទើរតែ១០០% ក្នុងពេលចូលទៅកាន់នាទីជាអ្នកគ្រប់គ្រង។ដូច្នេះក្រោយពី ចាកចេញពីតំណែងនោះថ្មីៗ តើលោកនឹងវិលមកច្រៀងវិញឬទេ?
ត្បិតថា ករុណា ពេជ្រ ចេញពីតំណែងជាអ្នកចាត់ការនៅផលិតកម្មថោន ប៉ុន្តែលោកក៏មិនទៅណាឆ្ងាយពីការងារគ្រប់គ្រងដែរ។ តាម ករុណា ពេជ្រ បានឲ្យដឹងថា លោកក៏ត្រូវចាត់តាំងពីថ្នាក់ទៅមើលការខុសត្រូវ និងគ្រប់គ្រងផ្សាររាត្រីកុងតឺណ័រនាខេត្តសៀមរាប ដែលមុខជំនួញមួយថ្មីទៀតក្នុងចង្កោម Town Group។
ដូច្នេះហើយ ទើបសំណួរសួរថា លោកនឹងវិលមកធ្វើជាតារាចម្រៀង អាជីពដែលធ្លាប់ធ្វើឲ្យលោកមានកេរ្តិ៍ឈ្មោះនាអតីតកាលនោះវិញឬទេ? ជុំវិញបញ្ហានេះ សាមីខ្លួនបានអះអាងថា លោកនឹងមិនណាចោលអាជីពចម្រៀងឡើយ។“ច្រៀងវិញបង ខ្ញុំនឹងច្រៀងវិញ...រាល់ថ្ងៃក៏ខ្ញុំច្រៀងដែរ គ្រាន់តែមិនបានចេញជាប់លាប់"។
ករុណា ពេជ្រ បន្តថា លោកនៅតែមានភារកិច្ចធ្ងន់នៅលើស្មានៅឡើយ ជាមួយការងារគ្រប់គ្រងផ្សារខាងលើ ដែលទើបដំណើរថ្មីៗ។ ការងារនេះ លោកត្រូវឡើងចុះភ្នំពេញ-សៀមរាប ញឹកញាប់ ពិសេសក្នុងវេលាផ្សារត្រៀមនឹងបើកសម្ពោធនេះ លោកពិតជាចាំបាច់ត្រូវនៅឲ្យជាប់ជាហេតុ ធ្វើឲ្យលោកមិនទាន់អាចលែងដៃទៅធ្វើអ្វីផ្សេង ឬចម្រៀងទេ។
រឿងមួយទៀត ដែលលោកអះអាងថា មិនអាចសម្រុកខ្លាំងលើការងារច្រៀង ក៏ព្រោះតែលោកឪពុកលោក ឈឺធ្ងន់នៅសម្រាកក្នុងមន្ទីរពេទ្យនៅឡើយ។ យ៉ាងនេះក្ដី លោកនៅតែអះអាងថា មិនចោលអាជីពចម្រៀងឡើយ។
ក្រៅពីអះអាង មិនបោះបង់អាជីពចម្រៀង ករុណា ពេជ្រ ថ្មីៗ បានឲ្យតម្រុយពីការចាប់ដៃគូគ្នាជាថ្មី ជាមួយ មាស សុខសោភា ដែលពួកគេបានសាងភាពល្បីរន្ទឺកាលពីជិត១០ឆ្នាំមុន។ កិច្ចសហប្រតិបត្តិការនោះ បានស្ទួយលោកមានកេរ្តិ៍ឈ្មោះក្នុងសិល្បៈរហូតមក។ យ៉ាងណា ម្ចាស់បទ "ឱបគេទៅ" ប្រាប់ថា នោះមិនទាន់ជាផែនការច្បាស់លាស់មួយនៅឡើយទេ។
លោក ករុណា ពេជ្រ បានឡើងទៅគ្រប់គ្រងផលិតកម្មថោន នាខែកុម្ភៈ ឆ្នាំ២០១៧។ តំណែងនេះ ក្រោយពីអ្នកគ្រប់គ្រងចាស់លោក អ៊ា វឌ្ឍនា បានធ្វើមរណកាលទៅ៕