មិនឲ្យចាញ់គេទេ Land Rover ហក់ចូលក្នុងទីផ្សាររថយន្តអគ្គិសនីដែរហើយ!

2018-03-26 10:13:24
ចំនួនមតិ 0 | ចំនួនចែករំលែក 0

ចន្លោះមិនឃើញ

បើគ្រាន់តែឮពីឈ្មោះ Range Rover ភ្លាមមនុស្សសឹងគ្រប់គ្នានឹងគិតទៅដល់រថយន្តប្រភេទ SUVដ៏ប្រណិតរបស់ក្រុមហ៊ុនអង់គ្លេសជាក់ជាមិនខាន។ ជាការអភិវឌ្ឍបន្ថែមទៅលើរថយន្ត Hybrid របស់ខ្លួន នៅក្នុងឆ្នាំ 2018 នេះ Range Rover បានបញ្ចេញរថយន្តម៉ូដែល P400e ដែលជាសែស្រឡាយដំបូងបំផុតនៃ EV (Electronic Vehicle) របស់ខ្លួន។

P400e បានបំពាក់ដោយម៉ាស៊ីនទំហំ 2.0 លីត្រ មានស៊ីឡាំង 4 ប្រភេទសាំង និងម៉ូទ័រអាគុយដែលមានកម្លាំង 85kW ប្រភេទ Plug-in។ តាមប្រភពបានអះអាងថា រថយន្តនេះអាចរត់ដោយថាមពលអគ្គិសនីសុទ្ធតែម្ដង (EV-Only) រហូតដល់ទៅ 51 គីឡូម៉ែត្រឯណោះ ក្នុងល្បឿនរហូតដល់ជាង 136 Kmh (85 mph)។ តែប្រសិនបើចង់បង្កើនល្បឿនឲ្យរឺតតែទាន់ចិត្ត P400e នឹងប្ដូរទៅប្រើម៉ាស៊ីនសាំងដោយស្វ័យប្រវត្តិតែម្ដងនៅពេលដែលជាន់ហ្គែរខ្លាំង។

ក្រៅពីការផ្លាស់ប្ដូរផ្នែកគ្រឿងម៉ាស៊ីនហើយនោះ Range Rover P400e ក៏មានការរចនាចង្កៀងមុខ និងក្រោយយ៉ាងថ្មីស្រឡាង បូករួមនឹងកៅអីបីជួរ អេក្រង់ Touch Screen ទំហំ 10” មួយគូ និងការបន្ថែមកម្រាស់កញ្ចក់ដើម្បីបន្ថយសំឡេងរំខានពីខាងក្រៅផងដែរ។

សូមបញ្ជាក់ថារថយន្តប្រភេទអគ្គិសនី (EV) មិនមែនជារឿងថ្មីឡើយ តែចំពោះក្រុមហ៊ុនដែលតែងតែបញ្ចេញផលិតផលប្រើប្រេងម៉ាស៊ូតដូចជា Range Rover ហើយចូលរួមមកគាំទ្រ EV វិញនោះ ជាសញ្ញាណបង្ហាញឲ្យឃើញពីការយកចិត្តទុកដាក់លើបរិស្ថាន ដែលសព្វថ្ងៃនេះជាបញ្ហាប្រឈមដ៏ធំមួយរបស់មនុស្សជាតិ។