Mi Mix 2s ចេញជាផ្លូវការ អេក្រង់ឡើងកប់ តម្លៃចាប់ពី ៥០០ ដុល្លារ

2018-03-27 08:05:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Xiaomi បានបង្ហាញចេញជាផ្លូវការនូវស្មាតហ្វូន Mi Mix 2s នៅទីក្រុងសៀងហៃ ប្រទេសចិន មុននេះបន្តិច។

អេក្រង់របស់ Mi Mix 2s ជាចំណុចដែលលេចធ្លោមួយ ដែលមានលាតសន្ធឹងពេញផ្ទៃខាងមុខ មិនមានបាត់មួយដុំ ដូច iPhone X នោះទេ។ អេក្រង់ជាប្រភេទ AMOLED មានទំហំ ៥,៩ អ៊ីញ អាចបង្ហាញរូបភាពក្នុងកម្រិត Full HD+ និងមានមាត្រដ្ឋាន 18:9។ តួខ្លួនផលិតឡើងពីសារធាតុសេរ៉ាមិច ដែលមានស្រោបដោយសារធាតុកញ្ចក់។

កាមេរ៉ាខាងក្រោយជាចំណុចធ្វើឲ្យ Mi Mix 2s ខុសប្លែកពី Mi Mix 2 ខ្លាំង ដោយវាមានបំពាក់ប្រព័ន្ធកាមេរ៉ាភ្លោះមានកម្រិត ១២ MP ដូចគ្នា ដោយកាមេរ៉ាមេមានប្រើ Sensor Sony IMX363, មានបច្ចេកវិទ្យារក្សាលំនឹង OIS, Dual-Pixel Autofocus, ភ្លើង LED ចំនួនពីរ និងអាចថតវីដេអូកម្រិត 4K។ កាមេរ៉ាទីពីរជាប្រភេទ Telephoto ប្រើជំនួយដល់ការ Zoom និងអាចវាស់ជម្រៅរូបភាព ដើម្បីបង្កើតបានរូបភាពច្បាស់មុខព្រាលក្រោយបាន។

ដើម្បីថតរូបបែប Dynamic Range និង កាត់បន្ថយគ្រាប់ Noise គេបានប្រើបច្ចេកវិទ្យា Multi-frame Noise Reduction ដែលស្រដៀងគ្នានឹង HDR+ របស់ Google។

Xiaomi តែងបានប្រៀបធៀបស្មាតហ្វូនរបស់ខ្លួនទៅនឹង iPhone X ក្នុងកម្មវិធីបង្ហាញចេញមុននេះ។ មានការប្រៀបធៀបពីសមត្ថភាពចាប់យករូបភាពនៅទីងងឹត, សមត្ថភាព Focus និងសមត្ថភាពចាប់យក Subject ដែល Mi Mix 2s ធ្វើបានល្អជាង iPhone X។

ប្រៀបធៀបថតនៅទីងងឹតរវាង iPhone X និង Mi Mix 2s

Mi Mix 2s មានប្រើបន្ទះឈីប Snapdragon 845 ដែលមានជម្រើស RAM ទំហំ ៦ GB ឬ ៨ GB។ Xiaomi បានបង្អួតថា Mi Mix 2s អាចទទួលពិន្ទុដល់ទៅ ២៧៧ ១៧៨ លើកម្មវិធីតេស្តសមត្ថភាព AnTuTu ដែលអះអាងថាមានល្បឿនលឿនជាងគូប្រជែង។ អង្គផ្ទុកទិន្នន័យមានជម្រើសទំហំ ៦៤, ១២៨ និង ២៥៦ GB និងមានដំណើរការដោយប្រព័ន្ធប្រតិបត្តិការ Android Oreo 8.0។

ស្មាតហ្វូននេះមានតម្លៃចាប់ពី ៥២៥ ដុល្លារ ចំពោះប្រភេទ RAM ៦ GB/អង្គផ្ទុក ៦៤ GB រហូតដល់តម្លៃ ៦៤០ ដុល្លារ ចំពោះប្រភេទ RAM ៨ GB/អង្គផ្ទុក ២៥៦ GB។ មិនទាន់មានដំណឹងពីការចេញលក់ និងតម្លៃលើទីផ្សារបរទេសនៅឡើយទេ៕

--> Sabay ត្រូវការរើស Accounting Manager ។ បើមានចំណាប់អារម្មណ៍ដាក់ CV មក hr@sabay.com ឬចូលទៅកាន់ https://goo.gl/AsCd4N

ចុចអាន៖

ប្រភព៖ DigitalTrends ប្រែសម្រួល៖ សុខហេង