មកដឹង ស្ថិតិគួរឲ្យចាប់អារម្មណ៍ទាំង ១៣ ជុំវិញពិភពលោក

2018-03-28 07:50:18
ចំនួនមតិ 0 | ចំនួនចែករំលែក 0

ចន្លោះមិនឃើញ

មនុស្សមួយចំនួន មិនចូលចិត្តមើលតួលេខច្រើន ឬស្ថិតិអំពីអ្វីមួយនោះទេ ដោយសារតែពួកគេគិតថាវាគួរឲ្យស្មុគស្មាញ និងពិបាកយល់។ ប៉ុន្តែខាងក្រោមនេះគឺជា ចំនួនតួលេខគួរឲ្យចាប់អារម្មណ៍ទាំង ១៣ ជុំវិញពិភពលោក ៖

១. បង់ក្លាដែសមានប្រជាជនច្រើនជាងរុស្សី

យោងតាមស្ថិតិបច្ចុប្បន្នឲ្យដឹងថា បើទោះបីជាបង់ក្លាដែសមានទំហំផ្ទៃដីតូចជាងក៏ដោយ ប៉ុន្តែប្រទេសនេះមានប្រជាជនច្រើនជាងរុស្សីរហូតដល់ ២០ លាននាក់។

២. ដើមឈើមានចំនួនច្រើនជាងផ្កាយនៅលើមេឃ

យោងតាមស្ថិតិជាច្រើនឲ្យដឹងថា ដើមឈើមានរហូតដល់ ៣ ទ្រីលាន ដើម ខណៈផ្កាយមានត្រឹម ៤០០ ប៊ីលានប៉ុណ្ណោះ។

៣. ប្រជាជនអាល្លឺម៉ង់មានភាគរយទាបបំផុតនៃកុមារ

ក្មេងៗអាយុចាប់ពីកើតរហូតដល់ ១៤ ឆ្នាំ មានត្រឹម ១២% ប៉ុណ្ណោះក្នុងប្រទេស អាល្លឺម៉ង់ ចំណែកក្នុងប្រទេស កេនយ៉ា វិញ ក្រុមក្មេងដែលមានអាយុចន្លោះនេះ មានរហូតដល់ ៤០% នៃប្រជាជនសរុប។

៤. Mary និង James ជាឈ្មោះពេញនិយមបំផុត

ចាប់តាំងពីឆ្នាំ ១៩១៧ ដល់ឆ្នាំ ២០១៦ មានក្មេងប្រុសចំនួន ៥ លាននាក់ឈ្មោះ James និងក្មេងស្រី ៣,៥ លាននាក់ឈ្មោះ Mary។

៥. សាធារណរដ្ឋប្រជាមានិតចិនត្រូវបានគេស្គាល់ថា "សាធារណរដ្ឋមាស"

តាមការស្រាវជ្រាវមួយរកឃើញថា ប្រទេសចិន ជីកបានរ៉ែមាសរហូតដល់ ៤៤០ តោនជារៀងរាល់ឆ្នាំ និងមានមាសច្រើនជាងប្រទេសផ្សេងៗផងដែរ។

៦. រយៈពេល ១ ០០០ ឆ្នាំចុងក្រោយនេះ ចំនួនប្រជាជនផែនដីកើនឡើងដល់ទៅ ២២ ដង

កាលពីខែកក្កដា ឆ្នាំ ១០០០ ចំនួនប្រជាជនក្នុងពិភពលោកសរុបគឺ ២៧៥ ០០០ ០០០ ដោយឡែកក្នុងខែកក្កដា ឆ្នាំ ២០០០ វិញ ប្រជាជនកើនឡើងរហូតដល់ ៦ ១៤៥ ០០៦ ៩៨៩។

៧. អ្នកអាចដើរជុំវិញផែនដីបាន ៤,៥ ដងក្នុងមួយជីវិតរបស់អ្នក

អ្នកវិទ្យាសាស្ត្រ បានគណនាថាក្នុងមួយឆាកជីវិត មនុស្សម្នាក់អាចដើរបាន ១៨០ ០០០ គីឡូម៉ែត្រ ដែលមានន័យថាពួកគេអាចដើរជុំវិញផែនដី ៤,៥ ដង។

៨. នៅអាមេរិក ប្រជាជនមើលទូរទស្សន៍ច្រើនជាង ៤ម៉ោងក្នុងមួយថ្ងៃ

ជារៀងរាល់ថ្ងៃប្រជាជននៅសហរដ្ឋអាមេរិកចំណាយ ១ ភាគ ៥ នៃពេលវេលារបស់ពួកគេ (២៧០ នាទី) មើលទូរទស្សន៍។

៩. ថ្ងៃសៅរ៍គឺជាថ្ងៃដែលមានក្មេងកើតតិចបំផុត

អ្នកវិទ្យាសាស្ត្របានរកឃើញថា ថ្ងៃព្រហស្បតិ៍ជាថ្ងៃដែលមានក្មេងកើតច្រើនបំផុតរហូតដល់ ១២,៨% ខណៈថ្ងៃសៅរ៍មានតិចបំផុតត្រឹម ១០%។

១០. ៩០% នៃអ៊ីមែលទាំងអស់សុទ្ធតែអត់បានការ

យោងតាម Cisco ឲ្យដឹងថា ៩០% នៃអ៊ីមែលទាំងអស់ គឺសុទ្ធតែជាសារឥតបានការ។

១១. ស្ត្រីជាម្ដាយជនជាតិដាណឺម៉ាកគឺជាម្តាយដែលធ្វើការនឿយហត់បំផុត

យោងតាមស្ថិតិបានអោយដឹងថា ៨២% នៃស្ត្រីជាម្ដាយនៅដាណឺម៉ាកធ្វើការជាទៀងទាត់ ខណៈនៅប្រទេស ក្រិក មានម្តាយតិចជាង ៥០% ប៉ុណ្ណោះដែលធ្វើការ។

១២. McDonald's លក់ Burger បាន ៧៥ ក្នុងមួយវិនាទី

ហាងអាហារដ៏ល្បីមួយឈ្មោះ McDonald's បានបង្ហាញស្ថិតិថា ខ្លួនលក់ Burger បាន ៧៥ ក្នុងរយៈពេលមួយវិនាទី។

១៣. នៅអាមេរិក មានមនុស្ស ១ ៧០០ នាក់ក្លាយជាមហាសេដ្ឋីជារៀងរាល់ឆ្នាំ

យោងតាមស្ថិតិមួយបង្ហាញថា នៅសហរដ្ឋអាមេរិកមានគ្រួសារជាង ៨ លាន គ្រួសារដែលមានប្រាក់ចំណូលប្រចាំឆ្នាំលើសពី ១ លានដុល្លារ ដែលជាហេតុធ្វើឲ្យមានមនុស្ស ១ ៧០០ នាក់ក្លាយខ្លួនជាមហាសេដ្ឋីជារៀងរាល់ថ្ងៃ៕