លម្អិតកាន់តែច្បាស់ពីកាមេរ៉ាទាំង ៣ គ្រាប់លើ Huawei P20 Pro ខ្លាំងប៉ុណ្ណា

2018-04-03 03:24:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកាសបង្ហាញ Huawei P20 Pro នាថ្ងៃទី ២៧ មិនាកន្លងទៅ បានរង្គោះរង្គើចិត្តអ្នកនិយមប្រើប្រាស់ស្មាតហ្វូនកំពូល ឲ្យមានការចាប់អារម្មណ៍គ្រប់ៗគ្នា។ ចំណុចរសើបត្រង់កាមេរ៉ាទាំង ៣ គ្រាប់ សមត្ថភាពខ្ពស់លើសពីកាមេរ៉ាភ្លោះធម្មតាដែលក្រុមហ៊ុនផលិតស្មាតហ្វូនជាច្រើនកំពុងព្យាយាមអភិវឌ្ឍ។

Sabay បកស្រាយប៉ុន្មានចំណុចទាក់ទងនឹងលក្ខណៈពិសេសលើកាមេរ៉ា Huawei P20 Pro ដែលមនុស្សភាគច្រើនមិនទាន់បានដឹង។

+លក្ខណៈសម្បត្តិកាមេរ៉ា P20 Pro:

គ្រាប់ទីមួយ: ទំហំ 40MP ប្រភេទ RGB Sensor មាន Aperture f/1.8
គ្រាប់ទីពីរ: ទំហំ 20MP ប្រភេទ Monochrome មាន Aperture f/1.6
គ្រាប់ទីបី: ទំហំ 8MP ប្រភេទ Telephoto អាច Zoom ដល់កម្រិត 3x អមមុខងារ OIS និង Aperture f/2.4
កាមេរ៉ាមុខ: ទំហំ 24MP មាន Aperture f/2.0
សម្រួលដោយ Sensor ប្រភេទ Laser AF និង Colour Temperature

ដូចរៀបរាប់ខាងលើកាមេរ៉ាទាំង ៣ គ្រាប់ក្នុងនោះមានពីរជាប្រភេទ RGB និង Monochrome ដែល Huawei ធ្លាប់ប្រើលើស្មាតហ្វូនកាមេរ៉ាភ្លោះជំនាន់មុន ស្ថិតក្រោមការអភិវឌ្ឍដោយ Leica។ មានន័យថាមួយគ្រាប់ចាប់យកទិន្នន័យពណ៌ (RGB) និងមួយគ្រាប់ទៀតចាប់យកទិន្នន័យសខ្មៅ (Monochrome) ហើយការបង្រួមនៃគ្រាប់កាមេរ៉ាទាំងពីរ អាចផលិតចេញនូវរូបភាពដ៏ល្អឥខ្ចោះមួយ និងចំណុចខ្លឹមក្រុមហ៊ុនចិនមួយនេះក៏អភិវឌ្ឍទំហំ Sensor ឡើងដល់ 1/1.7in ធំជាងគូប្រជែង។

គ្រាប់កាមេរ៉ាទីបីទំហំ 8MP ជាប្រភេទ Len Zoom ស្ថិតក្នុងកម្រិតស្តង់ដារ 3x Optical អនុញ្ញាតឲ្យអ្នកអាចចាប់យកកាន់តែជិតទៅនឹង Subject ដោយពុំបាត់បង់គុណភាពរូប និងអ្វីដែលពិសេសអមមុខងារទប់លំនឹង OIS បន្ថែម Aperture ដល់ f/2.4។ មួយគ្រាប់នេះផ្តល់ឲ្យអ្នកនូវមុខងារ Hybrid Zoom កម្រិត 5x ដែលឆ្លងកាត់ការ Crop រូប ចេញពី Sensor ទំហំ 40MP បន្សំការគាំទ្រនូវមុខងារ Laser Autofocus និង Colour Temperature ដើម្បីឲ្យប្រាកដថាកម្រិត White Balance មានភាពច្បាស់លាស់។

សរុបជារួមក្រោយដំណើរការនៃគ្រាប់កាមេរ៉ាទាំង ៣ រាល់ទិន្នន័យរូបភាពដែលផ្តិតចេញមកគឺមានលក្ខណៈច្បាស់ខ្លាំង ទោះអ្នក Zoom ដល់កម្រិតខ្ពស់បន្តិចក៏ដោយ ជាពិសេសត្រូវប៉ាន់អ្នកនិយមថត Portrait ជំរុញឲ្យកម្រិត Bokeh (ព្រាល) មានភាពកាន់តែប្រាកដ សក្ដិសមនឹងមុខងារ Variable Aperture អនុញ្ញាតឲ្យអ្នកប្តូរទីតាំងព្រាលទៅតាមចិត្ត ក្រោយថតរួចហើយ។

+ស្វែងយល់ពី Sensor ទំហំ 40MP:

ចំណុចនេះជាការចាប់អារម្មណ៍ខ្លាំងបំផុតរបស់អតិថិជន ប៉ុន្តែអ្នកត្រូវចាំថាមិនប្រាកដទំហំ Megapixel កាន់តែធំ កាន់តែថតរូបបានប្រសើរនោះទេ សំខាន់ទៅលើបច្ចេកវិទ្យានៃកាមេរ៉ាគួបផ្សំ។ ក្រឡេកទៅគូប្រជែង Apple, Samsung និង Google ប្រើត្រឹមទំហំ 12MP ក៏មានសមត្ថភាពផលិតរូបភាពបានប្រហាក់ប្រហែលគ្នា។

សម្រាប់ក្រុមហ៊ុន Huawei ពុំមានន័យថាកាមេរ៉ាដែលអ្នកផ្តិតយករូបភាពស្ថិតក្នុងទំហំ 40MP នោះទេ ផ្ទុយទៅវិញវាជាការលាយឡំគ្នានូវបច្ចេកវិទ្យា Pixel Fusion ដោយបើកចំហនៅទីតាំង Pixel ក្នុងទំហំ 2,0µm ជួយឲ្យការទទួលយកពន្លឺបានកាន់តែច្រើន នោះក៏ជាជំនួយក្នុងការថតបែប Low Light បានយ៉ាងល្អ។ ទៅតាមស្តង់ដារគឺប្រើត្រឹមទំហំ 10MP នៅមាត្រដ្ឋាន ៤:៣ ប៉ុណ្ណោះ ប៉ុន្តែបើអ្នកចង់ផ្លាស់ប្តូរទំហំនេះ ក៏អាចធ្វើបានតាមចិត្ត។

មួយផ្សេងទៀតកាមេរ៉ា 40MP ក៏ប្រើប្រាស់សម្រាប់មុខងារ Hybrid Zoom ដែលជាការច្របាច់បញ្ចូលគ្នារវាង Optical 3x Zoom របស់គ្រាប់ Lens ទីបីដែលមានទំហំ 8MP ដូចបញ្ជាក់ពីខាងលើ។ ប៉ុន្តែត្រូវចាំមុខងារ Zoom នឹងមិនអនុញ្ញាតឲ្យប្រើប្រាស់នោះទេ ប្រសិនអ្នកកំណត់កាមេរ៉ាឲ្យថតនូវទំហំ 40MP។

+ការថតនៅទីងងឹត (low-light):

មិនធ្លាប់មានស្មាតហ្វូនណាអាចធ្វើបាន ដោយ Huawei ជាក្រុមហ៊ុនដំបូងដែលផ្តល់ឲ្យអ្នកប្រើប្រាស់អាចដំឡើងកម្រិត ISO សម្រាប់ការថតនៅទីងងឹតឡើងដល់ ១០២ ៤០០ ។ សឹងតែភ្នែកមនុស្សធម្មតាមើលមិនឃើញ តែកាមេរ៉ាដ៏ឆ្លាតវៃមួយនេះអាចធ្វើបានយ៉ាងប្រសើរ។

អមនឹងការជំនួយពីបច្ចេកវិទ្យា Pixel Fusion ដែលផ្តល់ឲ្យលំហូរពន្លឺអាចជះចូលកាន់តែខ្លាំង ជាកត្តាជំរុញឲ្យការផ្តិតយករូបភាពបែប Low-Light អាចធ្វើបានល្អជាងស្មាតហ្វូនដទៃ។ បន្ថែមពីនេះក៏មានមុខងារ Handhold Longer Exposure ដំឡើងដល់ ៨ វិនាទី ជាជំនួយមិនចាំបាច់ឲ្យអ្នកប្រើ ត្រូវស្ពាយ Tripod ទៅតាមខ្លួនអំឡុងថតពេលរាត្រី។

+ការថតបែប AI:

ស្ថិតក្នុងការរចនា ១៩ បែបបទខុសពីគ្នា បច្ចេកវិទ្យា AI របស់ក្រុមហ៊ុន Huawei ក៏ធ្វើបានល្អ មិនចាញ់គូបដិបក្ខ Google ដោយផ្តល់នូវការថតបែប Food, Portrait, Cat, Landscape កំណត់ Settings មកពីនាយ។ ប៉ុន្តែនេះពុំមែនជាអ្វីដែលថ្មីនោះទេ បើក្រឡេកទៅ SONY មានប្រើដូចគ្នាកាលពីប៉ុន្មានឆ្នាំមុន ឲ្យឈ្មោះថា Superior Auto ។

+ការថតវីដេអូ Slo-mo លក្ខខណ្ឌ 960fps:

Huawei បានប្រលូកចូលសង្រ្គាមថតវីដេអូលក្ខខណ្ឌ 960fps ជាមួយ SAMSUNG និង SONY ដែលធ្វើបាននូវកម្រិត 720p ស្មើក្រុមហ៊ុនកូរ៉េខាងត្បូង ប៉ុន្តែមិនអាចឈោងដល់ SONY គាំទ្រដល់កម្រិត 1080p ឡើយ។

ប៉ុន្តែតាមការតេស្តផ្ទាល់របស់គេហទំព័រ Pocket-lint បានបញ្ជាក់ថាការថត Slo-mo នៅទីតាំងងងឹតបែប Indoor ស្មាតហ្វូន Huawei ជំនាន់ឆ្នាំ ២០១៨ នេះ ផ្តល់នូវសាច់វីដេអូច្បាស់និងមានពន្លឺល្អជាង បើធៀបទៅនឹង Samsung ដែលត្រូវឧបសគ្គបន្តិចបន្តួច។

-->Sabay ត្រូវការរើស 5 Corporate Sales Executives ។ បើមានចំណាប់អារម្មណ៍ដាក់ CV មក hr@sabay.com ឬចូលទៅកាន់ https://goo.gl/iTqDWW