Apple ចង់ឈប់ខ្ចីដង្ហើមគេដក នឹងផលិតឈីបកុំព្យូទ័រផ្ទាល់ខ្លួននៅឆ្នាំ ២០២០

2018-04-03 02:26:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Apple បាននឹងកំពុងដុតដៃដុតជើង ក្នុងការផលិតឈីបផ្ទាល់ខ្លួនដើម្បីបំពាក់លើកុំព្យូទ័រប្រភេទ Mac ដែលពឹងផ្អែកលើឈីបរបស់ Intel ជិតពីរទសវត្សរ៍ទៅហើយនោះ។ ក្រុមហ៊ុនដែលផលិតបន្ទះឈីបស៊េរី A ដ៏ជោគជ័យលើ iPhone, iPad និង iPod នេះអាចនឹងបង្កើតអ្វីដែលជារបស់ខ្លួនសឹងទាំងអស់តែម្ដង។ តាមប្រភពពី Bloomberg បានប្រាប់មកថា Apple មានគម្រោងនឹងជំនួសឈីប Intel នៅលើ Mac ដោយបន្ទះឈីបផ្ទាល់ខ្លួននៅដើមឆ្នាំ ២០២០ នេះ។

តាមប្រភពខាងក្នុងមក គម្រោងនេះមានឈ្មោះថា Kalamata ។ ប៉ុន្តែ វានៅមិនទាន់អាចទៅរួចនៅឡើយទេ ដែល Kalamata នឹងត្រូវដាក់ឲ្យអនុវត្តភ្លាមៗនោះ ព្រោះការសិក្សានិងអភិវឌ្ឍនៅត្រូវការពេលយូរទៀត ទម្រាំអាចផលិតចេញដាក់លើ Mac របស់ខ្លួនបាន។ ម៉្យាងទៀត ឈីបរបស់ Intel ដែលបំពាក់លើ Mac សព្វថ្ងៃមានសមត្ថភាពមិនអន់ឡើយ ពិសេសគឺមុខងារ Power Nap ដែលអាចឲ្យ Mac ដំណើរការ Update ឬ Setting នានាក្នុងពេលដែល Mac កំពុង Sleep ។ បច្ចេកវិទ្យានេះ ធ្វើឲ្យ Mac អាចធ្វើការបានទោះមិនមានការបើកប្រើក៏ដោយ ហើយសន្សំសំចៃថ្មបានច្រើនទៀតផង។

នេះមិនមែនជារឿងថ្មីឡើយ ដែល Apple អាចនឹងសម្រេចចិត្តប្ដូរឈីបលើកុំព្យូទ័ររបស់ខ្លួននោះ ព្រោះកាលពីដើមឆ្នាំ ២០០០ Apple ក៏បានប្ដូរឈីបពី Power PC មក Intel នេះផងដែរ។ ម៉្យាងទៀត ដោយសារមានរឿងអាស្រូវផ្នែកសុវត្ថិភាព របស់ឈីបក្រុមហ៊ុន Intel ដែល hacker អាចលួចយកព័ត៌មានបានដោយសារកំហុសនៃស្ថាបត្យកម្មឈីបខ្លួននោះ ធ្វើឲ្យ Apple ត្រូវរំកិលខ្លួនមួយកម្រិតទៅមុខទៀត ជាជាងពឹងផ្អែកទៅលើគេទាំងស្រុង៕

ចុចអាន៖

ប្រភព៖ engadget ប្រែសម្រួល៖ ផាត សុវត្ថិ