ច្បាប់ម៉ាឡេស៊ីថ្មី អ្នកចែកចាយព័ត៌មានក្លែងក្លាយ អាចត្រូវជាប់គុកដល់ ៦ ឆ្នាំ

2018-04-03 03:22:37
ចំនួនមតិ 0 | ចំនួនចែករំលែក 0

ចន្លោះមិនឃើញ

រដ្ឋាភិបាលម៉ាឡេស៊ីបានអនុម័តច្បាប់ថ្មីកាលពីម្សិលមិញនេះ ដោយនឹងដាក់ទោសប្រជាពលរដ្ឋនៅបណ្ដាញសង្គម ឬ អ្នកផ្សាយដំណឹងបែបឌីជីថល ដែលចែករំលែកព័ត៌មានក្លែងក្លាយ ជាមួយការពិន័យជាទឹកប្រាក់ ១២៣ ០០០ ដុល្លារ និង អាចត្រូវជាប់គុករយៈពេលដល់ ៦ ឆ្នាំទៀតផង។

រូបតំណាង

ច្បាប់ប្រឆាំងនឹងព័ត៌មានក្លែងក្លាយនេះបានអនុម័ត ដោយមានការរិះគន់ថានឹងអាចបង្អាក់ដល់សិទ្ធបញ្ចេញមតិ និងអាចជួយបិទបាំងរឿងអាស្រូវមានទំហំទឹកប្រាក់រាប់ពាន់លានដុល្លារដែលជាប់ពាក់ព័ន្ធនឹងនាយករដ្ឋមន្ត្រីប្រទេសនេះទៀតផង។

លោក Najib Razak នាយករដ្ឋមន្ត្រីប្រទេសម៉ាឡេស៊ី

ករណីព័ត៌មានក្លែងក្លាយនេះនឹងត្រូវដោះស្រាយដោយតុលាការឯករាជ្យមួយ ហើយអ្នកល្មើសច្បាប់អាចគិតបញ្ចូលទាំងអ្នកដែលស្ថិតនៅក្រៅទឹកដីម៉ាឡេស៊ី ដរាបណាពួកគេសរសេររឿងរ៉ាវអំពីប្រទេសនេះ រួមទាំងប្រជាជននៃប្រទេសនេះ។

ច្បាប់របស់ប្រទេសម៉ាឡេស៊ីបានឲ្យនិយមន័យ "ព័ត៌មានក្លែងក្លាយ" ថាជាព័ត៌មាន, ដំណឹង, ទិន្នន័យ និង របាយការណ៍ណាដែលមិនពិតទាំងស្រុង ឬ មិនពិតខ្លះៗ។ ព័ត៌មាននេះរួមមានរឿងរ៉ាវ, វីដេអូ ឬ ជាខ្សែអាត់សំឡេង។

ម៉ាឡេស៊ីជាប្រទេសដំបូងគេមួយដែលបង្កើតការហាមឃាត់លើព័ត៌មានក្លែងក្លាយ និងដាក់ទោសលើគូភាគីដែលបង្កើតព័ត៌មានក្លែងក្លាយនេះ។ ប្រទេសដទៃទៀតជុំវិញពិភពលោកកំពុងស្វែងរកវិធីដើម្បីដោះស្រាយនឹងព័ត៌មានក្លែងក្លាយនេះក្នុងប្រទេសជាតិរបស់ខ្លួន ដែលក្នុងនោះរួមមានអាល្លឺម៉ង់ និង ហ្វីលីពីនជាដើម៕

--> Sabay ត្រូវការរើស Accounting Manager ។ បើមានចំណាប់អារម្មណ៍ដាក់ CV មក hr@sabay.com ឬចូលទៅកាន់ https://goo.gl/AsCd4N

ចុចអាន៖

ប្រភព៖ The Verge ប្រែសម្រួល៖ សុខហេង