ព័ត៌មានធ្លាយចេញ មិនត្រឹម សូដា នីតា ទេ តែតារាខ្មែរច្រើននាក់ទៀតធ្លាក់សម្ភាសន៍ទៅអាមេរិកបន្តកន្ទុយ
- 2018-04-04 02:54:25
- ចំនួនមតិ 0 | ចំនួនចែករំលែក 0
ព័ត៌មានធ្លាយចេញ មិនត្រឹម សូដា នីតា ទេ តែតារាខ្មែរច្រើននាក់ទៀតធ្លាក់សម្ភាសន៍ទៅអាមេរិកបន្តកន្ទុយ
ចន្លោះមិនឃើញ
តាមព័ត៌មានធ្លាយចេញថ្មីៗនេះ គឺមិនមែនមានត្រឹមតារាស្រី សូដា នីតា តែម្នាក់ទេ ដែលស្ថានទូតអាមេរិកប្រចាំនៅកម្ពុជាបដិសេធផ្ដល់ទិដ្ឋាការចូលទៅធ្វើបេសកកម្មសិល្បៈនៅលើទឹកដីរបស់ខ្លួន ពោលគឺនៅ មានសិល្បករ សិល្បការិនីខ្មែរជាច្រើននាក់ ក៏បានធ្លាក់បន្តកន្ទុយគ្នាដែរ។
ប្រភពសុំមិនបញ្ចេញឈ្មោះបានឲ្យដឹងថា រូបគេមិនបានដឹងពីមូលហេតុពិតប្រាកដដែលស្ថានទូតអាមេរិកប្រចាំនៅកម្ពុជា ទម្លាក់ភ្លើងក្រហមឲ្យតារាខ្មែរច្រើនយ៉ាងនេះទេ ខណៈខ្លះក្នុងចំណោមនេះ ធ្លាប់មានបទពិសោធន៍ទៅសម្ដែងនៅអាមេរិករួចមកហើយ នៅតែត្រូវបានទម្លាក់ដូចគ្នា។
"ដូចយ៉ាង សូដា នីតា អី នាងធ្លាប់ទៅសម្ដែងរួចមកហើយ ហើយក៏មិនមានបញ្ហាអសកម្មណាមួយដែរ ដល់ឥឡូវសុំទៅលើកទី២ ស្រាប់តែមិនជាប់ មិនដឹងថា មានមូលហេតុអ្វី ព្រោះតាមធម្មតា បើធ្លាប់ទៅហើយ មិនពិបាកនឹងទៅម្ដងទៀតទេ!"។ ប្រភពថ្លែង។
ក្រៅពី សូដា នីតា តារាប្រុសស្រី ផ្សេងទៀត ដែលអស់ឱកាសហោះទៅអាមេរិកដែរនោះ មាន នេន ទុំ តារាចម្រៀង ជុំ លីណូ តារាសម្ដែង អ៊ុន អាលីហ្សា និងតារាចម្រៀងជើងថ្មីមួយរូបទៀតដែលប្រភពអះអាងថា មិនបានស្គាល់ឈ្មោះ។
ជុំវិញបញ្ហាខាងលើ សាមីខ្លួនទាំងអស់ មិនទាន់អាចសុំទំនាក់ទំនងបានទេ ប៉ុន្តែ២នាក់ក្នុងចំណោមពួកគេខាងលើ ត្រូវបាន កញ្ញា រ៉ាប៊ី ដែលបច្ចុប្បន្នកំពុងនៅអាមេរិកស្រាប់នោះ បានបញ្ចេញឲ្យដឹងថា ពិតជាអ្នកដែលបរាជ័យក្នុងការសុំទិដ្ឋាការឆ្លងទៅដីអាមេរិកពិតមែន។ សិល្បករ២ដួងនោះ គឺ កញ្ញា អ៊ុន អាលីហ្សា និងតារាចម្រៀង ជុំ លីណូ។
នៅក្នុងវីដេអូឃ្លីបខ្លីមួយពីសហរដ្ឋអាមេរិកមក ម្ចាស់បទ "មាន់ស្រែ" ថ្លែងថា "...តាមពិត ត្រូវមានបង អាលីហ្សា និងបង ជុំ លីណូ ប៉ុន្តែដោយសារពួកគាត់អត់ទទួលបានវីហ្សា អីចឹងអត់បានជួបពួកគាត់ទេ"។ រ៉ាប៊ី ថ្លែងពីការសម្ដែងរបស់នាងនៅទីក្រុងហ្វីឡាដែលហ្វៀ នៅកាស៊ីណូ Sugarhouse នារាត្រីថ្ងៃស្អែក ដែលតាមគម្រោងពីដំបូង គឺមានសិល្បករ សិល្បការិនីទាំងនាក់នោះទៀត។
យ៉ាងណា នេន ទុំ ម្នាក់ក្នុងចំណោមសិល្បករធ្លាក់សម្ភាសន៍ទៅអាមេរិកលើកនេះ ទើបបានឆ្លើយប្រាប់ Sabay មុននេះថា លោកពិតជាបានបរាជ័យលើការងារឆ្លងទ្វីបនេះមែន។
វិលមកប្រភពទី១វិញ បានព្រលយឲ្យដឹងទៀតថា ក្រោយបរាជ័យរបស់សិល្បៈខ្មែរទាំងប៉ុន្មានខាងលើ ក្នុងការទទួលបានទិដ្ឋាការពីស្ថានទូតអាមេរិក ឥឡូវម្ចាស់ឧបត្ថម្ភ បាន និងកំពុងរៀបចំឯកសារសាថ្មីឡើងវិញ។ "តាមគម្រោង គឺគាត់(Sponsor)ចង់ឲ្យពួកគេទៅសម្ដែងនៅឱកាសបុណ្យចូលឆ្នាំខ្មែរហ្នឹងហើយ ដល់ទៅធ្លាក់អស់អីចឹង ឥឡូវគាត់កំពុងរៀបចំឯកសារដាក់ទៅម្ដងទៀត។ ដាក់ចេះតែដាក់ហើយ តែបើបានទៅ ទាល់តែរួចចូលឆ្នាំអីឯណោះ...ចូលឆ្នាំរួចហើយទៅធ្វើអី ព្រោះគេចង់បានទៅក្នុងឱកាសចូលឆ្នាំខ្មែរហ្នឹងហើយ...!”៕