បច្ចុប្បន្ន ទុយ កុសល ហៅយុនស្រែស្រែជាកីឡាករបាល់ទះក្រៅផ្លូវការដ៏ល្អមួយរូបដោយលេងបីស្មើស្មាត់ធំស្រុកខ្មែរមួយ​ចំនួន​រួមទាំង គួន ម៉ុម ផងនោះ​សុំចៀសមិនចង់​ជួបដោយហេតុផលចាប់សេវាយុនមិនបាន។

អ្នកតាមដានបាល់ទះច្បាស់ណាស់ស្គាល់ស្មាត់យុន ប៉ុន្តែប្រិយមិត្តខ្លះក៏ប្រហែលមិនស្គាល់ពីស្មាត់រូបនេះដែរ។ គេឡើងខ្លាំងបំផុតនៅខេត្តក្នុងឆ្នាំណា?

បើតាមការឲ្យដឹងពីស្មាត់យុនស្រែស្រែ គឺរូបគេលេងបាល់ទះឡើងខ្លាំងបំផុតនៅឆ្នាំ២០១៤-២០១៥ ដែលកាលនោះគេឈ្នះ​អស់តាមភូមិស្រុករហូតដល់ខេត្តកំពត។ អាចនិយាយបានថាជាពេល​ដែល​គេ​លេងឡើង​នៅ​ក្នុង​ខេត្ត។ ក្រោយឈ្នះអស់ដៃគូ រូប​គេក៏បានឡើងមកភ្នំពេញ និង​ដើរលេងតាមតារាងបាល់ទះ​នៅ​ជាយៗក្រុង​ដូចជាតំបន់កាណាស៊ីធីផ្លូវវេងស្រេង តំបន់ព្រែកទា តំបន់​ត្រពាំងថ្លឹង និងតំបន់​ទឹកថ្លាជាដើមដោយយុនអះអាងថា ពុំមានអ្នកណាស្គាល់រូបគេឡើយ។

ដោយមានទេពកោសល្យ មានអេគីបល្អ និងមានភាពប៉ិនប្រសព្វក្នុងការចាប់គូ គឺ​ចេះតែធ្វើឲ្យក្រុមស្មាត់យុនចេះតែឈ្នះ មានទឹកចិត្តលេង ហើយសមត្ថភាពក៏ចេះតែកើនឡើងពី​មួយ​ថ្ងៃ​ទី​មួយ​ថ្ងៃ​។ តែយ៉ាងណាស្មាត់មានដើមកំណើតមកពីខេត្តកំពត មិនទាន់ហ៊ានប្រឡូកនៅកណ្ដាលក្រុងភ្នំពេញឡើយ ដ្បិត​សមត្ថភាព​នៅ​មាន​កម្រិត​។

លុះ​មកដល់អំឡុងឆ្នាំ២០១៨-២០១៩ កេរ្តិ៍ឈ្មោះរបស់យុនចាប់ផ្ដើមល្បីល្បាញខ្លាំង​តាម​រយៈ​ការ​លេង​បាល់​ទះ​ និងបានលេងប៉ះក្រុមល្បីៗជាច្រើន ពោល​មានឈ្នះមានចាញ់ទៅវិញទៅមក។

ឆ្នាំ២០២០ ស្មាត់យុនបានរងរបួសឈឺចង្កេះ បន្ទាប់​ពី​ការលេងបាល់ទះក្រៅផ្លូវការមួយនៅខេត្តកំពង់ធំ។ របួសរបស់គេបានអូសបន្លាយរហូតដល់ឆ្នាំ២០២១ ក្រោយគេបានប្រឡូកបាល់ទះផ្លូវការនិងក្រៅផ្លូវការជាថ្មី។

យ៉ាងណាបន្ទាប់ពីរវិបត្តិជម្ងឺ​កូវីដ-១៩បានបញ្ចប់ យុន​ ហាក់បាន​ធូរស្រាលនិងចាប់គូលេងជា​ហូរហែរហូតដមកទល់បច្ចុប្បន្ន។ គេជាស្មាត់បាល់ទះក្រៅផ្លូវការលំដាប់ជួរមុខល្អបំផុត​មួយ​រូប​នៅកម្ពុជា ព្រោះ​តែ​គេបានឈ្នះអស់ស្មាត់ធំៗក្នុងជំនួបបីស្មើពេញសាច់ដូចគ្នានិងលេងសេរី៕

អត្ថបទ៖ Um Sopheak