កាស Bose សេរីថ្មី លក់តម្លៃឡើងកប់ តែបច្ចេកវិទ្យាឡើងឡូយ (មានវីដេអូ)

2018-04-06 04:16:09
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីខែវិច្ឆិកាឆ្នាំមុន ក្រុមហ៊ុន Bose បានធ្វើរឿងចម្លែកមួយ ដែលជាធម្មតាខ្លួនតែងតែបញ្ចេញលក់ កាស និងឧបករណ៍បំពងសំឡេងល្អៗនោះ មកធ្វើជាកាសសម្រាប់ជំនួយដល់ដំណេករបស់មនុស្សវិញម្ដង។ កាសនោះមានឈ្មោះថា Bose SleepBuds ហើយក្រុមហ៊ុន Bose ផ្ទាល់មិនបានបញ្ចេញកាសនោះលក់ជាលក្ខណៈផ្លូវការឡើយ គឺដាក់ជាគំរូហើយចាប់ផ្ដើមរៃអង្គាសថវិកាដើម្បីស្ទាបស្ទង់ពីការគាំទ្រនៅលើគេហទំព័រ Indiegogo ឯណោះវិញ។

កាសនេះមានរាងតូចនឹងស្រាលមែនទែន ដែលក្រុមហ៊ុន Bose មិនដែលផលិតកាសដែលតូចដូច្នេះពីមុនមកឡើយ។ ដំណើរការរបស់វាគឺ បង្កើតជាសំឡេងស្រាលស្រទន់ដូចជា រលកសមុទ្រ ខ្យល់ធ្លាក់ ជាដើម ហើយវាកាត់ផ្ដាច់ពីសំឡេងរំខាននៅខាងក្រៅទាំងអស់តែម្ដង រួមទាំងសំឡេងស្រម៉ុករបស់ដៃគូអ្នកទៀតផង។ អ្នកអាចកំណត់ប្រភេទនៃសំឡេងទាំងនោះបានតាមទូរសព្ទ ហើយអ្នកក៏អាចដាក់ជានាឡិការោទិ៍ផងដែរ ដោយកាសនេះនិងបញ្ចេញសំឡេងស្រទន់តែរាងឮខ្លាំងជាងមុន ដើម្បីដាស់អ្នកនៅពេលព្រឹកព្រលឹម។

កាសនេះផលិតមកពីសារធាតុដែលទន់ល្អ អាចបត់បែនបាន ដែលមានជាទំពក់សម្រាប់ឲ្យវានៅជាប់ត្រចៀក និងទ្រនាប់កាសដែលទន់ និងមិនធ្វើត្រចៀករបស់យើងឈឺចាប់ឡើយ។ ការសាកពេញម្ដង អាចប្រើប្រាស់បានរហូតដល់ទៅ ២យប់ ហើយវាក៏មានប្រអប់សាកប្រភេទ Wireless ដែលអាចឲ្យសាកបានមួយពេញម្ដងទៀតដែរ។

Bose នឹងលក់កាសនេះ ជាផ្លូវការក្នុងតម្លៃ ២៤៩ដុល្លារ នាពេលខាងមុខ តែចំពោះអ្នកដែលបានចូលជាថវិការៃអង្គាសលើកមុននោះ កាសនេះលក់ជូនក្នុងតម្លៃតែ ១៥០ដុល្លារ តែប៉ុណ្ណោះ។ ដោយពេលនោះតម្លៃចុះច្រើន ម៉្យាងអាចបានប្រើកាសនេះមុនគេផង ធ្វើឲ្យមនុស្សជាង ៣ ០០០ នាក់បានកក់កាសនេះ នាំឲ្យ Bose រកបានជាង ៤៥០ ០០០ដុល្លារ នៅពេលដែលកាសនេះនៅត្រឹមជាផលិតផលដំបូង (Prototype) តែម្ដង។

ដោយហេតុថា វាមិនទាន់មានលក់នៅលើទីផ្សារនៅឡើយ អ្នកដែលបានទទួលកាសក្នុងចំណោមមនុស្ស ៣ ០០០នាក់នោះ បានដាក់លក់កាសនេះវិញក្នុងតម្លៃយ៉ាងកប់ពពក ដោយតម្លៃខ្លះដល់ទៅជាង ៨០០ដុល្លារ ឯណោះ ថ្លៃជាងកាលគេទិញជាង ៥ ដង៕

នេះជាវីដេអូបង្ហាញពីកាស Bose SleepBuds ដែលនឹងចេញលក់ជាផ្លូវការក្នុងពេលខាងមុខ៖