Facebook ឆ្លើយត្រង់ៗថា រាល់សារអ្នកប្រើប្រាស់ផ្ញើឲ្យគ្នា ត្រូវបានឆែកខ្ទេចគ្មានសល់ទេ

2018-04-05 08:31:52
ចំនួនមតិ 0 | ចំនួនចែករំលែក 0

ចន្លោះមិនឃើញ

Facebook បានចេញមកបញ្ជាក់ច្បាស់ថា រាល់រូបភាព និងតំណភ្ជាប់ (Link) នានា ដែលអ្នកគ្រប់គ្នាបានផ្ញើឲ្យគ្នានៅលើ Facebook Messenger ដែលជាកម្មវិធីផ្ញើសាររបស់ Facebook នោះត្រូវបានត្រួតពិនិត្យទាំងអស់គ្មានសល់។

កាលពីបទសម្ភាសន៍លើកមុនជាមួយ Vox លោក Mark Zuckerberg បានឆ្លើយនឹងសំណួរបញ្ជាក់ថា តើ Facebook Messenger ពិតជាបានត្រួតពិនិត្យសារជាលក្ខណៈឯកជនរបស់អ្នកប្រើប្រាស់មែន ឬមួយក៏យ៉ាងណា។ លោកបានប្រាប់ថា វាជាការពិត ដែលរាល់រូបភាព និង Link នៅក្នុង Messenger របស់អ្នកប្រើប្រាស់ ត្រូវបានត្រួតពិនិត្យដើម្បីការពារពីការចែកចាយមាតិកា មិនល្អនៅលើ Platform របស់ Facebook។ បើសិនជា ចាប់បានថារូបភាព និង Link ដែលផ្ញើចេញនោះបង្កប់អត្ថន័យមិនសមរម្យ ដូចជាការរើសអើងពូជសាសន៍ ការបៀតបៀនផ្លូវភេទកុមារជាដើម Messenger នឹង Block រាល់ Link និងរូបភាពនោះចោលមិនឲ្យផ្ញើចេញតែម្ដង។

រាល់អ្វីដែលត្រូវបានផ្ញើឆ្លងកាត់ Messenger ប្រព័ន្ធស្វ័យប្រវត្តិមួយ ឬអាចជាមនុស្សមួយក្រុមនឹងធ្វើការត្រួតពិនិត្យគ្រប់សារទាំងនោះ។ ខុសប្លែកពី Whatsapp ដែលជាកម្មវិធីផ្ញើសារ របស់ខ្លួនដែរនោះ គឺមិនអនុញ្ញាតឲ្យមានបុគ្គលពីខាងក្រៅអាចឆែកសារដែលអ្នកប្រើប្រាស់ផ្ញើឲ្យគ្នាឡើយ។ រាល់ទិន្នន័យទាំងអស់ត្រូវបានបម្លែង (Encrypted) ដែលមិនអាចឲ្យ Hacker យល់ពីអ្វីដែលអ្នកប្រើប្រាស់ផ្ញើចេញនោះទេ។

ចង់បញ្ជាក់ថា Facebook Messenger ក៍មានមុខងារ Encryption ដែរ ទាស់ត្រង់ថាតម្រូវឲ្យអ្នកប្រើប្រាស់ចូលទៅកាន Secret Conversations នឹងចាប់ផ្ដើមការសន្ទនាឡើងវិញ ទោះជាអ្នកប្រើនោះធ្លាប់ផ្ញើសារឲ្យគ្នារួចហើយក៏ដោយ។

ម៉្យាងទៀត Facebook បានចេញមកបញ្ជាក់ហើយថា ដើម្បីឲ្យ Platform របស់ខ្លួនមានមាតិកាដែលគោរពទៅតាមគោលការណ៍ដែលបានចេញមក ទិន្នន័យទាំងអស់នៅលើ Facebook និង Intagram នឹងត្រូវឆ្លងកាត់អ្នកត្រួតពិនិត្យ (Moderator) ជាមុនសិន។

បើតាមហេតុផលដែល Facebook លើកឡើងនេះ វាមានផលវិជ្ជមានសម្រាប់អ្នកប្រើប្រាស់ទូទៅ ប៉ុន្តែក៏បង្កើតឲ្យមានការព្រួយបារម្ភ ពីព័ត៌មានឯកជនដែលត្រូវបានឆែកឆេរនេះដែរ ព្រោះទើបតែមានរឿងអាស្រូវពេលកន្លងទៅថ្មីៗនេះទេ ដែលក្រុមហ៊ុន Cambridge Analytica របស់អង់គ្លេស អាចយកទិន្នន័យអ្នកប្រើប្រាស់ដោយមិនមានការអនុញ្ញាតទៅប្រើដើម្បីការឃោសនាបោះឆ្នោតបាន៕

ចុចអាន៖

ប្រភព៖ Bloomberg ប្រែសម្រួល៖ ផាត សុវត្ថិ