ចំណូលខ្លះរបស់ Facebook កំពុងជាប់គាំង ក្រោយម្ចាស់លុយ ចាំមើលក្រុមហ៊ុនដោះស្រាយរឿងនេះសិន

2018-04-06 14:01:49
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកស្រី Sheryl Sandberg កាន់តំណែង COO ក្នុងក្រុមហ៊ុន Facebook ខ្ពស់ជាងគេបង្អស់បន្ទាប់ពីលោក Mark Zuckerberg ថ្មីៗនេះក៏បានចេញមកបកស្រាយជុំវិញរឿងរ៉ាវបែកធ្លាយទិន្នន័យរបស់អ្នកប្រើប្រាស់។

ថ្លែងក្នុងបទសម្ភាសន៍នៅទីស្នាក់ការកណ្ដាលនៃទីក្រុង Menlo Park រដ្ឋ California អ្នកស្រី Sandberg បានមានប្រសាសន៍ថា៖ "យើងសង្កេតឃើញអ្នកផ្សព្វផ្សាយពាណិជ្ជកម្មលើ Facebook មួយភាគតូច កំពុងផ្អាកការដាក់ Ads ដោយពួកគេទាំងនោះសុទ្ធសឹងតែរង់ចាំនូវការឆ្លើយតប ដូចទៅនឹងសំណួរដែលមនុស្សឯទៀតបានចោទសួរមកកាន់ពួកយើង"។

ស្រ្តីវ័យ ៤៨ ឆ្នាំសង្កត់ធ្ងន់ទៀតថា៖ "ពួកគេចង់ឲ្យប្រាកដថាការប្រើប្រាស់ទិន្នន័យលើ Facebook ពិតជាមានសុវត្ថិភាព"។ បច្ចុប្បន្នក្រុមហ៊ុនក៏កំពុងទាក់ទងរកដំណោះស្រាយរវាងបណ្ដាអ្នកផ្សព្វផ្សាយពាណិជ្ជកម្មដែរ ព្រោះចំណូលសឹងតែទាំងអស់គឺបានមកពីកត្តានេះឯង ។

រូបតំណាងលោក Zuckerberg និងអ្នកស្រី Sandberg

រំឭកថា បណ្ដាញសង្គមយក្សមួយនេះ ក៏កំពុងដុតដៃដុតជើង ត្រួតពិនិត្យឡើងវិញនូវរាល់ផលិតផល និងគោលការណ៍ទាំងអំបាលម៉ាន ដើម្បីរកមធ្យោបាយពង្រឹងកិច្ចការពារទិន្នន័យអ្នកប្រើប្រាស់ពីការបែកធ្លាយដោយសម្ងាត់ ក្រោយពីថ្មីៗនេះ ក្រុមហ៊ុន Cambridge Analytics បានត្រួសត្រាយផ្លូវចូលលួចយកព័ត៌មានពីគណនីជាង ៨៧ លាន ដោយគ្មានការអនុញ្ញាត ហើយចម្លើយឆ្លើយតបរបស់មេធំ Facebook លោក Mark Zuckerberg ថា នឹងកំណត់នូវដើមចមបញ្ហាក្នុងសវនាការសភានាសប្ដាហ៍ក្រោយជាសាធារណៈ៕