កុំឲ្យឈឺក្បាលទៀត ចេះរបៀបបិទកម្មវិធីលួចទិន្នន័យលើ Facebook

2018-04-11 23:32:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តាំងពីល្បីរឿងក្រុមហ៊ុន Cambridge Analytica ប្រមូលទិន្នន័យអ្នកប្រើប្រាស់ Facebook ជាង ៥០ លាន គណនី ការប្រើប្រាស់ត្រូវតែមានការប្រុងប្រយ័ត្នជាងមុន។

ក្រុមហ៊ុន Cambridge Analytica បានប្រមូលទិន្នន័យតាមរយៈកម្មវិធី thisisyourdigitallife ដើម្បីចូលលួចទិន្នន័យពី Profile អ្នកប្រើប្រាស់។

ការប្រើគណនី Facebook ឬ Google ដើម្បីចុះឈ្មោះប្រើសេវាកម្មណាមួយលើអ៊ីនធឺណិត ហាក់មានភាពពេញនិយមច្រើន ដោយសារភាពរហ័ស ងាយស្រួលត្រឹមចុចប៊ូតុង Confirm តែប៉ុណ្ណោះ។

ការ Login ចូលកម្មវិធីជាមួយគណនី Facebook អាចចែករំលែកព័ត៌មាន ដែលមានតម្លៃដល់អ្នកផ្សព្វផ្សាយ និងក្រុមហ៊ុនជំនួញរួមមាន ឈ្មោះពេញ, បញ្ជីមិត្តភក្តិ, រូបភាព Profile, រូបថតនានា, កម្រិតអប់រំ និង ប្រវត្តិការងារ។

របៀបផ្ដាច់ពីកម្មវិធីនានា

មើលបញ្ជីកម្មវិធីនានា ដែលអ្នកបានផ្ដល់សិទ្ធិអនុញ្ញាតចូលប្រើទិន្នន័យ ដោយចូលទៅកាន់ ទំព័រ App Settings។

ចុចលើកម្មវិធីណាមួយ នឹងឃើញព័ត៌មានដែលអ្នកកំពុងចែករំលែកជាមួយ Developer (អ្នកបង្កើតកម្មវិធី)។ អ្នកអាចជ្រើសរើសបញ្ឈប់ការចែករំលែកប្រភេទព័ត៌មាន ដោយចុចលើ Edit Settings នៅក្បែរនឹងប្រអប់ជ្រុងតូចនៃកម្មវិធីនីមួយៗ រួចកែប្រែតាមការគួរ។

បើចង់លុបចោលតែម្ដង ចុចលើប្រអប់ជ្រុងក្បែរនឹងឈ្មោះកម្មវិធីនោះ រួចចុចលើប៊ូតុង Remove > នឹងឃើញមានជម្រើសចុចលើប្រអប់ជ្រុងនោះ រួចចុច Remove។

បើចង់បញ្ឈប់ការចែករំលែកទិន្នន័យ Facebook ជាមួយកម្មវិធីផ្សេងៗ ជ្រើសរើស Edit ក្រោម Apps, Websites and Games > ចុច Turn Off។ នេះនឹងធ្វើឲ្យកម្មវិធី ឬសេវាកម្មនានាដែលអ្នកចូលប្រើតាម Facebook មិនអាចដំណើរការបាននោះទេ។

គួរដឹងដែរថា បើអ្នកលុបកម្មវិធី Developer ប្រហែលនៅតែមានទិន្នន័យអ្នកលើ File។ Facebook បញ្ជាក់ថា វិធីតែមួយគត់ ដែលអាចលុបព័ត៌មានទាំងនេះបាន គឺទំនាក់ទំនង Developer ដោយផ្ទាល់។

លើកក្រោយ ពេលអ្នក Login ចូលទំព័រនានាប្រើគណនី Facebook ឬភ្ជាប់ទៅកាន់កម្មវិធីថ្មី គួរត្រួតពិនិត្យមើលថាតើព័ត៌មានអ្វី ដែលវាស្នើសុំ៕