Spotify អាចនឹងបញ្ចេញឧបករណ៍ចាក់ចម្រៀងឆ្លាតវៃរថយន្ត នៅចុងខែនេះ

2018-04-09 09:29:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនផ្ដល់សេវាកម្មស្ដាប់តន្ត្រីដ៏ធំ Spotify បានប្រកាសអញ្ជើញក្រុមអ្នកកាសែតឲ្យចូលរួមក្នុងពិធីមួយដ៏អាថ៌កំបាំងនាថ្ងៃទី ២៤ ខែមេសា ខាងមុខនេះនាទីក្រុង New York។ Spotify មិនបានបញ្ជាក់អ្វីទាំងអស់ទាក់ទិនទៅនឹងព្រឹត្តិការណ៍នោះ តែបើតាមអ្នកប្រើប្រាស់ Reddit ម្នាក់ ដែលបានបង្ហោះរូបភាពឧបករណ៍មួយ ដែលអាចចាក់ចម្រៀងក្នុងរថយន្តដោយការបញ្ជាតាមរយៈសំឡេង នោះវាទំនងជាពេលមួយដ៏សមគួរក្នុងការបង្ហាញផលិតផលថ្មីនេះហើយ។

រូបភាពលេចឡើងតាំងតែពីខែកុម្ភៈមកម្ល៉េះ ដោយគេឃើញមានឧបករណ៍មួយដែលបិទភ្ជាប់ក្នុងរថយន្ត និងមានអក្សរដែលអាចជាការបញ្ជាតាមរយៈសំឡេង។ គេរំពឹងទុកថា ឧបករណ៍នោះនឹងបំពាក់មកជាមួយនឹង Alexa ដែលជា AI របស់ Amazon តែម្ដង។

រូបភាព Screenshot ពីអ្នកប្រើប្រាស់ Reddit

អ្នកប្រើប្រាស់ Reddit ម្នាក់ទៀត ក៏បានលើកឡើងដែរថា អ្នកអាចប្រើឧបករណ៍នោះដោយឥតគិតថ្លៃដោយគ្រាន់តែបង់ថ្លៃសេវាចំនួន ១២.៩៩ដុល្លារ ក្នុងមួយខែ ស្មើនឹង ១៥៥ដុល្លារ ក្នុងរយៈពេល ១ឆ្នាំ ដោយតម្លៃនេះបូករួមនឹងសេវា Internet រួចស្រេចតែម្ដង។

Spotify ជាសេវាកម្មស្ដាប់តន្ត្រីដ៏ធំបំផុតមួយ ដែលមានមូលដ្ឋាននៅក្នុងប្រទេស ស៊ុយអែត។ វាមានប្រតិបត្តិការប្រហែលប៉ុន្មានប្រទេសប៉ុណ្ណោះនៅក្នុងពិភពលោក ដោយអ្នកប្រើប្រាស់នៅកម្ពុជាមិនអាច download យកកម្មវិធីនេះមកប្រើប្រាស់បានឡើយ លុះត្រាតែអ្នកប្រើប្រាស់ VPN ហើយប្ដូរទីតាំងទៅជាប្រទេស ដែល Spotify ដំណើរការដូចជាសហរដ្ឋអាមេរិកជាដើម៕

ចុចអាន៖

ប្រភព៖ Businessinsider ប្រែសម្រួល៖ ផាត សុវត្ថិ