កាន់តែយ៉ាប់យឺនហើយ មានបុគ្គលិកបណ្តើរៗបានសុំលាឈប់ការងារពី Facebook

2018-04-11 01:28:26
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមការរាយការណ៍របស់ the New York Times បានឲ្យដឹងថា វិស្វករផ្នែកកម្មវិធីមួយចំនួនរបស់ Facebook បានដាក់ពាក្យលាឈប់ ហើយខ្លះទៀតចង់ប្ដូរទៅជ្រកកោណ ក្រោមក្រុមហ៊ុនចំណុះរបស់ Facebook វិញដូចជា Instagram និង Whatsapp ជាដើម។

បញ្ហាដែលប្រឈមចំពោះការលាឈប់របស់បុគ្គលិកនេះ គឺបណ្ដាលមកពីរឿងអាស្រូវដដែលជាមួយក្រុមហ៊ុន Cambridge Analytica ដែលមានការលួចប្រើទិន្នន័យរបស់អ្នកប្រើប្រាស់ ដល់ទៅជាង ៨៧លានគណនីនោះ។

បញ្ហាស្នូលខាងក្នុងក្រុមហ៊ុននេះតែម្ដងគឺថា Facebook បានដឹងថាក្រុមហ៊ុន Cambridge Analytica មានទិន្នន័យអ្នកប្រើប្រាស់តាំងតែពីឆ្នាំ ២០១៥ មកម្ល៉េះ ដែលពេលនោះ Facebook បានឲ្យ Cambridge Analytica លុបទិន្នន័យទាំងនោះចោល តែ Facebook មិនដែលតាមដានថាក្រុមហ៊ុន Cambridge Analytica បានលុបចោលឬក៏អត់ទេ។

ម៉្យាងវិញទៀត បុគ្គលិកនៅក្នុង Facebook បានអាក់អន់ចិត្តនឹងភាពយឺតយ៉ាវក្នុងការដោះស្រាយបញ្ហារបស់មេ Facebook ដែរ ដោយពេលមានការលើកឡើងពីការបែកធ្លាយភ្លាមៗ មិនមានការបកស្រាយទេ ទាល់តែប៉ុន្មានថ្ងៃក្រោយទើបចេញមុខសុំទោសអ្នកប្រើប្រាស់។ លើសពីនេះទៅទៀត ដោយសារតែមានសំណៅលេចធ្លាយ របស់មេ Facebook ម្នាក់ទៀត លោក Andrew Bosworth ដែលបានសរសេរឡើងតាំងតែពីឆ្នាំ ២០១៦ នោះថាក្រុមហ៊ុន Facebook នឹងទទួលខុសត្រូវរាល់អ្វីដែលខ្លួនបានធ្វើដើម្បីការលូតលាស់របស់ក្រុមហ៊ុននោះ ធ្វើឲ្យបុគ្គលិក Facebook ជឿជាក់ថា អ្នកដឹកនាំខ្លួនបានដឹងពីបញ្ហានេះយូរណាស់មកហើយ តែមិនព្រមដោះស្រាយឲ្យចប់ស្រេចបាច់សោះ។

ស្របពេលជាមួយគ្នានេះដែរ ក្នុងពេលដែលមានស្ថានភាពតានតឹង ដែលពិបាកដោះស្រាយនេះ លោក Mark Zuckerberg ដែលជា CEO Facebook បានឆ្លើយតបទៅនឹងសំណួរដែលថាលោកអាចនឹងចាកចេញពីដំណែងនេះឬក៏យ៉ាងណា។ លោកបានឆ្លើយតបថា " Facebook បានចាប់កំណើតឡើងតាំងតែពីពេលលោកស្នាក់នៅក្នុងសាកលវិទ្យាល័យម្ល៉េះ ហើយឥឡួវនេះវារីកធំរហូតដល់មានបញ្ហា តែខ្ញុំជឿជាក់ថា យើងនឹងដោះស្រាយវាបាន" ។

ជាការពិត លោក លោក Mark Zuckerberg មិនត្រឹមតែជា CEO Facebook តែប៉ុណ្ណោះទេ តែលោកក៏ជាម្ចាស់ភាគហ៊ុនធំជាងគេផងដែរ។ នេះជាហេតុផល ដែលការសម្រេចចិត្តរបស់ Facebook ទាំងអស់គឺលោកមានឥទ្ធិពលជាងគេ។ ប៉ុន្តែ វាអាចដោយសារតែរឿងនេះដែរហើយ ដែលធ្វើឲ្យបុគ្គលិកមិនពេញចិត្តចំពោះការគ្រប់គ្រងរបស់លោក ដោយមិនមានការលាឈប់ពេលមិនអាចដោះស្រាយបញ្ហាធំៗបែបនេះបាន៕

ចុចអាន៖

ប្រភព៖ Businessinsider ប្រែសម្រួល៖ ផាត សុវត្ថិ