គម្រោងអភិវឌ្ឍអស្ចារ្យរបស់ហ្វីលីពីន គឺគម្រោងអភិវឌ្ឍទីក្រុងឆ្លាតវៃ ចេញតម្រុយខ្លះៗហើយ!

2018-04-10 15:00:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រទេសហ្វីលីពីនបានប្រកាសពីគម្រោងនៃការកសាងទីក្រុងឆ្លាតវៃឲ្យឈ្មោះ New Clark City ដែលមានចម្ងាយ ១២០ គីឡូម៉ែត្រពីរដ្ឋធានីម៉ានីល។ ក្នុងគោលដៅអភិវឌ្ឍនូវភាពឆ្លាតវៃ, និរន្តរភាព និងភាពធន់នឹងគ្រោះមហន្តរាយ ទីក្រុងបៃតងមួយនេះនឹងបំពាក់ទៅដោយបច្ចេកវិទ្យាកម្រិតខ្ពស់ មានតាំងពីការប្រើប្រាស់មនុស្សយន្តឈានដល់ Drone និងប្រភេទយានជំនិះបើកបរស្វ័យប្រវត្តិ។

យោងតាមអ្នកដឹកនាំការអភិវឌ្ឍ គម្រោងនេះមានការចូលរួមសហការពីដៃគូសាធារណៈ-ឯកជន ដែលជាតម្រូវការចាំបាច់សម្រាប់ប្រទេសដែលកំពុងខ្វះខាតថវិកា។ ថ្លែងបញ្ជាក់ពីនាយកប្រតិបត្តិលោក Heang Fine Wong នៃក្រុមហ៊ុន Surabana Jurong នៅសិង្ហបុរីដែលជាដៃគូរៀបចំទីក្រុងឆ្លាតវៃបានប្រាប់ CNBC ដូច្នោះថា៖ "ដើម្បីជាការដោះស្រាយកំណើនដង់ស៊ីតេប្រជាជនកើនឡើងខ្ពស់នៅប្រទេសក្នុងតំបន់អាស៊ី បែបនេះបច្ចេកវិទ្យាកម្រិតខ្ពស់ដូចជារថយន្តបើកស្វ័យប្រវត្តិនឹងដាក់ឲ្យប្រើប្រាស់ក្នុងតំបន់នោះ"។

រូបតំណាងលោក Heang Fine Wong

ផលចំណេញមួយផ្សេងទៀតក៏ជួយទាក់ទាញក្រុមហ៊ុនបរទេសឲ្យមកបោះទីតាំងក្នុងតំបន់ New Clark City ថ្វីបើរដ្ឋាភិបាលហ្វីលីពីនទើបតែប្រកាសមុននេះបន្តិច ជុំវិញការប្តូរការិយាល័យក្នុងស្រុកមួយចំនួនមកប្រមូលផ្ដុំនៅទីតាំងនេះក្តី តែការវិនិយោគពីក្រុមហ៊ុនក្រៅស្រុកនឹងនៅតែបន្តធ្វើ ព្រោះជាគោលដៅដែលសំខាន់ជាង។

ដើម្បីតភ្ជាប់ការធ្វើដំណើរពីទីក្រុងម៉ានីលទៅ New Clark City លោក Wong ក៏បញ្ជាក់ថាផ្លូវរថភ្លើងដ៏ទំនើប បច្ចុប្បន្នស្ថិតក្នុងចង្វាក់ផលិតកម្មក្រោមការវិនិយោគពីក្រុមហ៊ុនប្រទេសជប៉ុន ដែលអាចជួយកាត់បន្ថយពេលធ្វើដំណើរមកសល់ត្រឹម ១ ម៉ោង តិចជាងសព្វថ្ងៃត្រូវប្រើពេលយ៉ាងតិច ២ ទៅ ៣ ម៉ោងឯណោះ។ គម្រោងនៃដំណាក់កាលទី ១ នឹងត្រូវបញ្ចប់ក្នុង ឆ្នាំ ២០២២ ហើយអ្វីដែលត្រូវត្រៀមទុកគឺការដំឡើងប្រព័ន្ធទូរគមនាគមន៍ និងប្រព័ន្ធសុវត្ថិភាពអ៊ីនធឺណិត (Cyber Security) នៅតំបន់នោះជាចាំបាច់។