គីម ជុងអ៊ុន អាម៉ាស់មុខខ្លាំង ក្រោយអ្នកវិភាគថាមិនអាចទៅជួបអាមេរិកព្រោះហេតុផលមួយ

2018-04-11 07:06:31
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកវិភាគជាច្រើនអះអាងថា លោក គីម ជុងអ៊ុន ប្រហែលមិនអាចទៅជួបពិភាក្សា ជាមួយមេដឹកនាំអាមេរិកបានទេដោយសារតែគ្មានយន្តហោះដែលមានសមត្ថភាព អាចនាំលោកទៅបាន។

យោងតាមការវិភាគជាច្រើនឲ្យដឹងថា លោក គីម ជុងអ៊ុន ធ្លាប់បានធ្វើដំណើរទៅអន្តរជាតិតែម្ដងប៉ុណ្ណោះ គឺទៅប្រទេស ចិន ដោយជិះរថភ្លើង។ ការវិភាគបន្ដថា មេដឹកនាំកូរ៉េខាងជើង ប្រហែលមិនមានយន្តហោះសមត្ថភាពខ្ពស់ដែលអាចធ្វើដំណើរឥតឈប់ក្នុងរយៈចម្ងាយឆ្ងាយបានទេ។

អតីតអ្នកវិភាគរបស់ភ្នាក់ងារ CIA លោក Sue Mi Terry និយាយថា "យើងធ្លាប់សើចចំអកពីយន្ដហោះរបស់កូរ៉េខាងជើង ព្រោះវាជារបស់ចាស់ៗ។ យើងតែងចំអកពីយន្តហោះសូវៀតដ៏ចាស់របស់ពួកគេ។" ជាមួយគ្នាដែរ អ្នកវិភាគម្នាក់ទៀត គឺលោក Joseph Bermudez បន្ថែមថា "ពួកគេមិនមានយន្តហោះសមត្ថភាពខ្ពស់អាចហោះឆ្លងមហាសមុទ្រ ប៉ាស៊ីហ្វិក បានទេហើយយន្តហោះភាគច្រើនសុទ្ធតែចាស់ៗទៀត។"

ទោះជាយ៉ាងណាក៏ដោយ ទីប្រឹក្សាជាន់ខ្ពស់ម្នាក់គឺលោក Victor Cha បានអះអាងផ្ទុយពីនេះថា "ទាក់ទងនឹងការធ្វើដំណើររបស់មេដឹកនាំកូរ៉េខាងជើង វាមិនមែនជាបញ្ហានោះទេ ដោយសារតែកូរ៉េខាងត្បូង និង Swedes អាចផ្ដល់មធ្យោបាយធ្វើដំណើរដល់លោកបាន។ ប៉ុន្តែច្បាស់ណាស់ វាជារឿងដ៏អាម៉ាស់មួយរបស់កូរ៉េខាងជើង។"

គួរឲ្យដឹងថា កូរ៉េខាងជើងគ្រោងនឹងពិភាក្សាជាលើកដំបូងជាមួយអាមេរិកជុំវិញការលុបបំបាត់អាវុធនុយក្លេអ៊ែរនៃឧបទ្វីបកូរ៉េក្នុងពេលឆាប់ៗនេះ។ ទោះយ៉ាងណាក៏ដោយ ពេលវេលា និងទីកន្លែងជាក់លាក់នៃកិច្ចប្រជុំនេះ មិនទាន់បានកំណត់នៅឡើយទេ៕