ជំនួសដោយភាពតានតឹង មកមើលការសួរសំណួរកំប្លែងៗដល់ Mark Zuckerberg វិញម្ដង!

2018-04-12 03:13:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ទាក់ទិនទៅនឹងការសាកសួរពីសមាជិកសភាអាមេរិក ទៅកាន់នាយកប្រតិបត្តិក្រុមហ៊ុន Facebook លោក Mark Zuckerberg អស់រយៈពេល ២ ថ្ងៃមកនេះ ពិតជាមានភាពតានតឹងចំពោះភាគីទាំងសងខាង។ ប៉ុន្តែនៅក្នុងនោះ ក៏មានការលើកឡើងសំណួរខ្លះៗ ពីសំណាក់សមាជិកសភាអាមេរិក ដែលមានលក្ខណៈកំប្លែងដែរ ព្រោះសំណួរទាំងនោះ មនុស្សទូទៅដែលជាអ្នកប្រើប្រាស់អ៊ីនធឺណិត ប្រចាំថ្ងៃប្រាកដជាដឹងពីចម្លើយហើយ។

ហេតុផលម៉្យាងទៀត ក៏អាចនិយាយបានថា សមាជិកសភា ភាគច្រើនជាមនុស្សវ័យចំណាស់ ដូចនេះហើយ អាចមានរឿងជាច្រើនដែលពួកគេមិនដឹង បើប្រៀបធៀបនឹងមនុស្សខ្ទង់វ័យ ៤០ឆ្នាំចុះ។

ខាងក្រោមនេះជាការសាកសួរមួយចំនួន ដែលគេគិតថាលោក Mark Zuckerberg កំពុងបង្រៀនសមាជិកសភា (មនុស្សវ័យចំណាស់) ពីរបៀបប្រើអ៊ីនធឺណិត ៖

->សមាជិកសភា៖ “តើលោកអាចពន្យល់បានទេ ម្ដេចបានមុខជំនួញលោកនៅដើរបាន បើអ្នកប្រើប្រាស់មិនបង់លុយ?” Mark Zuckerberg៖ "ពួកយើងដាក់ផ្សាយពាណិជ្ជកម្មឲ្យគេមើល (មុខខំទប់សើច)” ។

->សមាជិកសភា៖ “បើខ្ញុំប្រើ Whatsapp តើវានឹងផ្ដល់ទិន្នន័យដល់អ្នកផ្សាយពាណិជ្ជកម្មរបស់អ្នកទេ?”

Mark Zuckerberg៖ “អត់ទេលោក ពីព្រោះគ្រប់សារនៅក្នុង Whatsapp ត្រូវបាន Encrypted ហើយ” ។

->សមាជិកសភា៖ “អញ្ចឹងឧទាហរណ៍ថា ខ្ញុំបានផ្ញើសារទាក់ទងនឹងរឿង Black Panther ក្នុង Whatsapp តើខ្ញុំនឹងឃើញការផ្សាយពាណិជ្ជកម្មរបស់រឿងនោះទេ?” Mark Zuckerberg៖ “អត់ទេលោក ប្រព័ន្ធរបស់ Facebook មិនអាចទាញទិន្នន័យពី Whatsapp ទេ” ។

->សមាជិកសភា៖ “ខ្ញុំដឹងហើយ តែខ្ញុំចង់សួរថា ប្រព័ន្ធ ២ ហ្នឹងមានលួចទាក់ទងគ្នាដោយសម្ងាត់ដែរឬទេ?” Mark Zuckerberg៖ “និយាយឲ្យខ្លីទៅ បើលោកផ្ញើសារទាក់ទងនឹងរឿង Black Panther ក្នុង Whatsapp លោកនឹងមិនទទួលបានផ្ទាំងផ្សាយពាណិជ្ជកម្មលើ Facebook ទេ” ។

->សមាជិកសភា៖ “មានគេថា Facebook នៅតាមដានសកម្មភាពរបស់អ្នកប្រើប្រាស់ ទោះបីជាពួកគេ Log off ចេញពី Facebook ទៅហើយក្ដី។ តើវាជារឿងពិតទេ?”

Mark Zuckerberg៖ “លោក ខ្ញុំចង់ឲ្យក្រុមខ្ញុំតាមដានរឿងនេះ...”

->សមាជិកសភា៖ “លោកមិនដឹងរឿងទេ?”

Mark Zuckerberg៖ “តាមពិតទៅ ពួកយើងប្រើ Cookies សម្រាប់បញ្ហាសុវត្ថិភាព និងការវាស់ស្ទង់ការដាក់ផ្សាយពាណិជ្ជកម្ម...”។ (Websites សឹងតែទាំងអស់លើលោកទៅហើយ ដែលប្រើ Cookies)

->សមាជិកសភា៖ “តើ Facebook នឹងផ្ដល់ជម្រើសឲ្យអ្នកប្រើប្រាស់ Log In ចូលម្ដងទៀតឬអត់ មុនពេលគេចង់ប្រើ App ពីខាងក្រៅ? (មុខសង្ស័យ)”

Mark Zuckerberg៖ “ប្រាកដណាស់លោកស្រី Facebook តែងតែធ្វើបែបហ្នឹងរាល់ដងទេតើ” ។

->សមាជិកសភា៖ “ចុះបើមានអ្នកណាម្នាក់តេមកលោក ហើយប្រាប់ថាចង់មើលឯកសាររបស់ខ្ញុំ តើលោកនឹងធ្វើទេ?”

Mark Zuckerberg៖ “ប្រាកដជាអត់ទេ” ។

->សមាជិកសភា៖ “និយាយទៅ...បើលោក....មិនធ្វើ....លោកអាចធ្វើបានទេ? ”

Mark Zuckerberg៖ “បើតាមទ្រឹស្ដី...”

->សមាជិកសភា៖ “តើលោកមានសិទ្ធក្នុងការចែករំលែកឯកសារខ្ញុំឲ្យគេទេ? ”

Mark Zuckerberg៖ “ខ្ញុំគ្មានសិទ្ធធ្វើបែបនោះទេ” ។

->សមាជិកសភា៖ “ចុះលោកមានសមត្ថភាពធ្វើបានអត់?”

Mark Zuckerberg៖ “លោកសមាជិកសភា នៅក្នុងប្រព័ន្ធរបស់យើង...”

->សមាជិកសភា៖ “លោកធ្វើបានឬអត់? ”

Mark Zuckerberg៖ “បើនិយាយតាមភាសាបច្ចេកទេស ខ្ញុំថាមានជនដទៃធ្វើបាន (សំដៅលើ Hacker) តែវានឹងក្លាយជាការបែកធ្លាយដ៏ធំមួយ ដូច្នេះក្រុមហ៊ុនយើងខ្ញុំនឹងមិនធ្វើរឿងទាំងនោះដាច់ខាត”។ (ចង់សំដៅថា បើសមាជិកសភាមានឯកសារ ហើយត្រូវគេ Hack បាននោះគឺវាបែកធ្លាយហើយ មិនមែន Facebook ជាអ្នកផ្ដល់ឲ្យគេទេ)

នេះជាវីដេអូ ដែលសារព័ត៌មាន Cnet កាត់ចេញពីការសាកសួរបែបកំប្លែងទាំងឡាយនោះ៖

ចុចអាន៖

ប្រភព៖ Cnet | facebook ប្រែសម្រួល៖ ផាត សុវត្ថិ