ទូរសព្ទឆ្នាំ ២០១៨ ចេញច្រើន តែមុនសម្រេចចិត្តទិញ ពិចារណាប៉ុន្មានចំណុចនេះសិន

2018-04-16 02:59:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ទូរសព្ទជាច្រើនមានការរចនារូបរាង ស្ដើង ស្រាល និងមានមុខងារពិសេសជាច្រើនក្នុងឆ្នាំ ២០១៨។

សម្រាប់អ្នកចង់ផ្លាស់ប្ដូរម៉ូដែលថ្មី ឬទើបទិញស្មាតហ្វូនដំបូង ប្រហែលត្រូវមានចំណុចច្រើនក្នុងការពិចារណា មានដូចជា តម្លៃ រូបរាង កាមេរ៉ា និងកត្តាមួយចំនួនទៀត ជាពិសេសថាតើអ្នកចង់គាំទ្រ Apple (iOS) ឬ Google (Android)។

គន្លឹះអាទិភាព

ដឹងពីអ្វីអ្នកខ្វល់ខ្វាយបំផុត៖ ទំហំអេក្រង់ គុណភាពកាមេរ៉ា ឬថាមពលថ្ម។
កុំបង្អាប់ទូរសព្ទកម្រិតកណ្ដាល៖ អ្នកអាចទទួលបានទូរសព្ទមានស្ទើរគ្រប់យ៉ាង ដែលទូរសព្ទកម្រិតខ្ពស់អាចធ្វើបាន។
ស្វែងរកអត្ថប្រយោជន៍៖ អ្នកអាចចាំមើលការបញ្ចុះតម្លៃពិសេស នៅថ្ងៃឈប់សម្រាក ឬថ្ងៃបុណ្យធំៗ ឬចុងឆ្នាំ។
ទូរសព្ទម៉ូដែលឆ្នាំមុនក៏ល្អដែរ៖ រង់ចាំទូរសព្ទចេញឆ្នាំនេះ ចាំទិញឆ្នាំក្រោយ ក្នុងការចំណាយថវិកាតិចជាងមុន។
កាន់ទូរសព្ទនៅហាង៖ អ្នកប្រហែលចូលចិត្ត ឬស្អប់ រូបរាង និងភាពងាយស្រួលពេលបានការកាន់ប្រើ។
បើអ្នកទិញទូរសព្ទក្រៅប្រទេស៖ អ្នកគួរប្រាកដថាទូរសព្ទអាចប្រើ SIM Card ក្នុងស្រុកបាន។
បើអ្នកបានទិញកម្មវិធី លើ iPhone ជាច្រើន និងរឿងក្នុង iTunes អ្នកគួរបន្តប្រើ iPhone បើអ្នកចង់បន្តប្រើប្រាស់កម្មវិធីទាំងនោះ។ បើអ្នកបានចំណាយលើកម្មវិធីរបស់ Android គួរបន្តប្រើទូរសព្ទ Android។ បើមិនដូច្នេះទេ អ្នកអាចផ្លាស់ប្ដូរបទពិសោធន៍ថ្មីបាន។
ទិញសម្បក និងកញ្ចក់ការពារទូរសព្ទ៖ អ្នកអាចបន្ថយកម្រិតខូចខាតលើតួទូរសព្ទ ងាយស្រួលបង្កើនតម្លៃពេលលក់ចេញក្រៅវិញ។

ទូរសព្ទម៉ូដែលបច្ចុប្បន្ន

កម្រិតចុងក្រោយ៖ Samsung S9, Samsung Galaxy Note 8, iPhone X, iPhone 8 Plus, Galaxy S8, Google Pixel 2, Pixel 2 XL, LG V30, Huawei Mate 10 Pro។
កម្រិតកណ្ដាល៖ OnePlus 5T, Motorola Moto X4, Huawei Honor 7X។
កម្រិតល្មម៖ Motorola Moto G5 Plus, Moto E4។

បើអ្នកទិញទូរសព្ទ Android

Android មានកម្មវិធីផែនទីដ៏ល្អ និងមុខងារជំនួយការប្រើប្រាស់ដូចជា Google Now ឬ Google Voice Search។ កំណែទម្រង់ចម្បងធម្មតាប្រកាសនៅខែឧសភា ឬមិថុនា ដោយទូរសព្ទ Google ទទួលកំណែទម្រង់មុនគេ ហើយក្រុមហ៊ុនផលិតទូរសព្ទផ្សេងទៀត រៀងចំណាយពេលបន្តិច។

Android 8.0 Oreo ឬ ខ្ពស់ជាងនេះ៖ OS ថ្មីៗ អ្នកនឹងទទួលបានមុខងារថ្មីជាមួយដែរ បច្ចុប្បន្នរួមមាន Autofill ក្នុងកម្មវិធី Chrome និងបង្រួមវីដេអូទំហំតូច អាចរំកិលចុះឡើងបាន ខណៈធ្វើការងារផ្សេង។
Android 7.0 Nougat៖ ជាជំនាន់ឆ្នាំមុន ប៉ុន្តែនៅតែខ្លាំង។ ជំនាន់ចាស់ជាងនេះ អ្នកនឹងបាត់បង់ចំណុចមួយចំនួនដូចជាល្បឿន និងមុខងារបន្ថែមថ្មីៗ។

បើអ្នកទិញ iPhone

កំណែទម្រង់ iOS មានទាន់ពេលវេលា ស្ទើរគ្រប់ទូរសព្ទ។
Apple ជាធម្មតាប្រកាសជំនាន់ iOS ចុងក្រោយនៅខែមិថុនា និងចេញជាផ្លូវការនៅខែកញ្ញា។

iPhone ចាស់មានតម្លៃធូរថ្លៃ តែប្រឈមនឹងការបាត់បង់សមត្ថភាព និងមុខងារថ្មី ផ្អែកលើ Hardware បំពាក់លើទូរសព្ទថ្មី។

អេក្រង់ទូរសព្ទតូច ឬធំ

បើអ្នកនៅចង់ប្រើទូរសព្ទអេក្រង់តូច (ក្រោម ៤.៥ អ៊ីង) អ្នកអាចមានជម្រើស iPhone SE។ បើមិនដូច្នោះទេ អ្នកប្រហែលត្រូវប្រើទូរសព្ទចាស់ ដូចជា Sony Xperia Compact ឆ្នាំ ២០១៦ ឬ ត្រូវប្រើអេក្រង់ធំមានចាប់ពី ៤.៧ ទៅ ៦ អ៊ីង ឬធំជាងនេះ។

សម្រាប់អេក្រង់ ៤.៧ អ៊ីង និងធំជាងនេះ៖

រកមើលអេក្រង់ Resolution ទាបបំផុត ១០៨០p។
ទំហំ Resolution ២ ៥៦០ x ១ ៤៤០ Pixels កាន់តែល្អ ជាពិសេសសម្រាប់អេក្រង់ ៥.៥ អ៊ីង និងធំជាងនេះ។
បើអ្នកចង់ប្រើ VR headset ដូចជា Gear VR ឬ PlayStation VR ទំហំ Resolution កាន់តែខ្ពស់ កាន់តែល្អ ពេលទូរសព្ទដាក់ពីមុខអ្នក ចំនួន Pixels ជាចំណុចសំខាន់។

គុណភាពកាមេរ៉ា

ទំហំ Megapixels កាន់តែធំ មិនតែងតែមានគុណភាពរូបភាពកាន់តែខ្ពស់នោះទេ។ កាមេរ៉ាទំហំ ១២ Megapixels ប្រហែលអាចថតរូបបានល្អជាងកាមេរ៉ាទំហំ ១៦ Megapixels។ ចំនួនពន្លឺដែលកាមេរ៉ាអនុញ្ញាតឲ្យចូលជាចំណុចសំខាន់ទទួលបានរូបភាពល្អ។
បច្ចុប្បន្ន កាមេរ៉ាក្រោយ ៨ Megapixels មានលើទូរសព្ទកម្រិតល្មម។ បើទូរសព្ទអ្នកមានកាមេរ៉ាពីរគ្រាប់ កាមេរ៉ាទីពីរបង្កើតលក្ខណៈព្រាលផ្ទៃខាងក្រោយ ឬ Bokeh effects, Telephoto, ជម្រើសមុំធំ។
OIS (Optical Image Stabilization) បន្ថយកម្រិតព្រាលពីការថតរង្គើដៃ មានប្រយោជន៍ពេលអ្នកថតទិដ្ឋភាពក្រោមស្ថានភាពងងឹត តែមិនជួយដល់ភាពព្រាលបណ្ដាលមកពី Subject មានចលនានោះទេ។ កាមេរ៉ាទូរសព្ទភាគច្រើន មាន HDR, Self-timers, Beauty mode និង Filters អាចប្រើជាមធ្យោបាយបន្ថែមកែប្រែលទ្ធផលរូបភាព។

ថាមពលថ្ម និងល្បឿនប្រើប្រាស់

ទូរសព្ទកម្រិតកណ្ដាលភាគច្រើន អាចឲ្យអ្នកបំពេញការងារបានយូរដែរ ដូចជាការCall អ៊ីមែល លេងហ្គេម និងស្ដាប់តន្ត្រី។

ទូរសព្ទភាគច្រើន អ្នកត្រូវការសាកថ្មមួយដង ក្នុងមួយថ្ងៃ។
ថាមពលថ្មប្រើបានយូរចាប់ពី ៣ ០០០mAh ឡើងទៅ។
ផែនទី និងតន្ត្រីប្រើប្រាស់ថាមពលថ្មច្រើនជាងសកម្មភាពផ្សេងទៀត។
Chip Octa-core មិនតែងតែល្អជាង Chip Quad-core នោះទេ។
សម្រាប់ Processor របស់ Qualcomm ចំនួនតួលេខកាន់តែខ្ពស់ (ថ្មី) ល្បឿនកាន់តែលឿន ឧទាហរណ៍ Snapdragon ៨៤៥ លឿនជាង ៦៣០ និង ៤២៥។

មុខងារចម្បងៗលើទូរសព្ទ ល្អបើមាន ដូចជា ស្កេនក្រយៅដៃ (Fingerprint scanner), MicroSD Storage លើទូរសព្ទ Android មួយចំនួន, ការពារជម្រាបទឹក (Water-resistant) ប្រើបច្ចេកវិទ្យា IP67 ឬខ្ពស់ជាងនេះ, សាកថ្មតាម Wireless, Stereo audio, USB-C connector, Headphone jack, ថ្មអាចដោះបានងាយស្រួល៕