ម្សិលមិញ Prius 2016 ថ្មីចែស ចតទុកមុខផ្សារធំថ្មី ឡូយយ៉ាងណា?

2018-04-20 03:22:53
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីម្សិលមិញនេះ មានការបង្ហាញខ្លួនដ៏ថ្មីចែងចាំងរបស់រថយន្ត Prius ម៉ូដែលឆ្នាំ ២០១៦ ដែលមានតែប៉ុន្មានគ្រឿងប៉ុណ្ណោះនៅប្រទេសកម្ពុជា។ នេះបើតាមម្ចាស់ហាងលក់រថយន្ត Prius មួយកន្លែងប្រាប់ Sabay។

រថយន្ត ០១៦ នេះមានការកែប្រែរាងខុសប្លែកខ្លាំងជាងម៉ូដែលចាស់ ដែលសឹងតែមើលមិនស្គាល់ថាជារថយន្តម៉ូដែល Prius បើសិនមិនបានឃើញ អក្សរផុស Prius និង ឡូហ្កូពណ៌ខៀវបញ្ជាក់ថាជារថយន្តប្រភេទ Hybrid របស់ Toyota។

រូបភាពពី Facebook: សុវណ្ណ រដ្ឋ

Prius ២០១៦ មានម៉ាស៊ីនរួមគ្រប់ option គឺ ម៉ាស៊ីនសាំងទំហំ ១.៨ លីត្រ មាន ៤ស៊ីឡាំង និងម៉ូទ័រអគ្គិសនី I4 ដែលផ្ដល់ថាមពលបានដល់ទៅ ១២១ សេះ។ ផ្នែកខាងក្នុងត្រូវបានរចនាយ៉ាងថ្មីស្រឡាង ដោយមានបំពាក់អេក្រង់ Infortainment ប្រភេទ Touch Screen ថ្មី និងប្រអប់បង្ហាញព័ត៌មាននានាទាក់ទងនឹងរថយន្ត (កុងទ័រ ប្រអប់លេខ ស៊ីញ៉ូ...) ត្រូវបានផ្លាស់ប្ដូរឲ្យមានភាពស្រស់ស្អាតជាងមុនជាប្រភេទ Color Display ។

Prius ២០១៦ ក៏មានប្រព័ន្ធសុវត្ថិភាពច្រើន ដែលអាចជួយអ្នកបើកបរបញ្ចៀសពីគ្រោះថ្នាក់ផ្សេងៗដូចជា៖

ប្រព័ន្ធហ្រ្វាំង ABS
ពោងសុវត្ថិភាពចំនួន ៨
ប្រព័ន្ធបញ្ចេញសញ្ញាព្រមានពេលប្ដូរគន្លង (Land Departure Warning)
ប្រព័ន្ធជំនួយដល់កន្លែងមើលមិនឃើញ (Blind Spot Monitor)
ប្រព័ន្ធទប់លំនឹងរថយន្ត (Traction Control)
ប្រព័ន្ធការពារកូនក្មេងពីការបើកទ្វាររថយន្តដោយចៃដន្យ (Child Safety Locks)

អ្វីដែលពិសេសបំផុតសម្រាប់ Prius 2016 គឺរថយន្តនេះអាចរត់បានដល់ទៅជិត ២៣ គ.ម ឯណោះសម្រាប់សាំងមួយលីត្រ តិចជាងរថយន្តទូទៅដែលជាមធ្យម រត់បានតែជាង ១០ គ.ម ប៉ុណ្ណោះ ក្នុងមួយលីត្រ៕

សែស្រឡាយ Prius របស់ក្រុមហ៊ុនជប៉ុន Toyota គឺជារថយន្តប្រភេទ Hybrid មិនថានៅទីណាឡើយក្នុងពិភពលោក រថយន្តម៉ាស៊ីនកូនកាត់របស់ជប៉ុននេះ តែងតែទទួលបានការគាំទ្រ ដោយសារតែកម្រិតស៊ីសាំងដ៏តិចរបស់វា និងការជួយដល់បរិស្ថាន។

និយាយពីរថយន្ត Prius នៅក្នុងស្រុកវិញ គឺមានការគាំទ្រដ៏ច្រើនលើសលប់ ជាពិសេសពីសំណាក់យុវវ័យ និងអ្នកមានគ្រួសារថ្មីថ្មោង ដែលគេមានឃើញចាប់តាំងតែពីស៊េរីឆ្នាំ ២០០៤ ដល់ ២០០៨ ដែលមានការប្រើប្រាស់ច្រើនជាងគេ។