៥ ផ្នែកសំខាន់ចុងក្រោយលើរថយន្ត អ្នកបើកបរមិនគួរអានរំលង (ភាគបញ្ចប់)

2018-04-26 02:44:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ពេលកន្លងទៅ Sabay បាននាំយកផ្នែកសំខាន់ៗ និងឧបករណ៍របស់រថយន្ត ចំនួន ១៥ ក្នុង ភាគ១ ភាគ២ និង ភាគ៣ រួចមកហើយមកបង្ហាញទស្សនិកជន ដើម្បីឲ្យបានស្គាល់ និងប្រាប់ពីវិធីថែរក្សា តាមផ្នែកនីមួយៗផងដែរ។

ដូចគ្នាផងដែរ ក្នុងសប្ដាហ៍នេះ Sabay នឹងនាំយកផ្នែកសំខាន់ៗ និងឧបករណ៍របស់រថយន្ត ចំនួន ៥ ចុងក្រោយ មកពិពណ៌នា ពីរូបភាពទូទៅ និងគន្លឹះមួយចំនួនក្នុងការថែទាំផ្នែកទាំងនោះ៖

១៦. Catalytic Converter

Catalytic Converter ជាផ្នែកមួយនៃបំពង់ស៊ីមុាំងរថយន្ត ដែលជួយបម្លែងផ្សែងពុល ដែលហៀបនឹងបញ្ចេញទៅខាងក្រៅ ឲ្យមានសុវត្ថិភាពជាងមុន។ ការលេចធ្លាយសារធាតុរាវ ដូចជាប្រេងពីក្នុងម៉ាស៊ីន ឬហ្គាសម៉ាស៊ីនត្រជាក់ និងកម្ដៅខ្លាំងហួសប្រមាណចេញពីក្នុងម៉ាស៊ីនអាចធ្វើឲ្យ Catalytic Converter ពុកផុយបាន។ ជាសំណាងរបស់អ្នកប្រើប្រាស់ដែរ Catalytic Converter មានតម្លៃថោក និងងាយក្នុងការផ្លាស់ប្ដូរ មិនចាំបាច់ឲ្យអ្នកប្រើប្រាស់រថយន្តចំណាយលុយច្រើនទេ។

១៧. Muffler

Muffler គឺជាផ្នែកខាងចុងបំផុតនៃបំពង់ស៊ីមាំុង ដែលជួយកាត់បន្ថយសំឡេងដ៏លាន់ចេញពីម៉ាស៊ីន។ Muffler និងបន្ថយអានុភាពនៃសំឡេងរបស់ម៉ាស៊ីន ដែលកំពុងដំណើរការយ៉ាងពេញទំហឹង ឲ្យមានសំឡេងស្ងាត់ជាងមុន មុនពេលបញ្ចេញមកខាងក្រៅ។ អញ្ចឹង ប្រសិនបើបំពង់ស៊ីមាំុងអ្នករាងលាន់ខុសធម្មតានោះ អ្នកដឹងហើយថាអ្វីដែលខូចនោះ គឺ Muffler នេះឯង។

១៨. ឧបករណ៍វាស់សម្ពាធកង់ (Pressure Gauge)

វាជាឧបករណ៍ចាំបាច់មួយដែរ សម្រាប់ដាក់តាមរថយន្តព្រោះបើរថយន្តអ្នកមិនមានបំពាក់មកជាមួយប្រព័ន្ធវាស់សម្ពាធខ្យល់កង់នោះទេ អ្នកពិបាកប៉ាន់ស្មានថា កង់របស់អ្នកខ្វះឬលើសសម្ពាធណាស់ ដោយគ្រាន់មើលនឹងភ្នែកទទេនោះ។

១៩. ឌីណាម៉ូ (Alternator)

ឌីណាម៉ូ ផលិតភ្លើងដើម្បីជំនួយដល់អាគុយកុំឲ្យវាធ្វើការធ្ងន់នាំឲ្យខូចខាត ក្នុងរយៈពេលខ្លី។ ពេលរថយន្តចាប់ផ្ដើមបញ្ឆេះ ឌីណាម៉ូក៏ចាប់ផ្ដើមវិល និងផលិតភ្លើងដើម្បីដំណើរការរថយន្ត ជាមួយអាគុយតែម្ដង ដោយប្រព័ន្ធភ្លើងរបស់រថយន្តទាំងមូលនឹងភ្ជាប់ជាមួយគ្នា។ បើសិនជាមានបញ្ហាកើតឡើងនៅក្នុងប្រព័ន្ធភ្លើង ឌីណាម៉ូក៏ប្រឈមមុខនឹងការខូចខាតដែរ។ ដូចគ្នានេះ បើសិនជាឌីណាម៉ូខូចខាត នោះប្រព័ន្ធភ្លើងក៏អាចនឹងខូចខាតដូចគ្នា។ អញ្ចឹងហើយបើមានផ្នែកមួយណាខូចនោះ អ្នកគួរប្រញាប់ទៅរកជាងទៅ ជាជាងទុកយូរនាំឲ្យអស់លុយក្នុងការជួសជុលច្រើន។

២០. Power Steering Fluid

ប្រេងចង្កូតជារឿងមួយដ៏សំខាន់ សម្រាប់អ្នកប្រើប្រាស់រថយន្តទាំងអស់ ព្រោះថាបើប្រេងនេះស្ងួតអស់ នោះចង្កូតរបស់អ្នកនឹងតឹងខ្លាំង ឬគាំងមិនអាចបើកបរបានតែម្ដង អាចនាំឲ្យកើតមានគ្រោះថ្នាក់ផ្សេងៗបាន។ វិធីល្អគឺឧស្សាហ៍ពិនិត្យមើលកម្រិតប្រេង ចង្កូតហើយបញ្ចូលវាឲ្យស្ថិតនៅកម្រិតស្តង់ដារជានិច្ច។

សូមអរគុណ ដល់ការតាមដានរបស់មិត្តអ្នកអានទាំងអស់គ្នា ហើយ Sabay នឹងស្វែងរកអត្ថបទល្អៗ ដែលទាក់ទងនឹងគន្លឺះប្រើប្រាស់របស់រថយន្ត មកជូនមិត្តអ្នកអាន នៅក្នុងពេលក្រោយទៀត៕

ចុចអាន៖

ប្រភព៖ drivinglife ប្រែសម្រួល៖ ផាត សុវត្ថិ