ត្បិតលេងក្លឹបគូប្រជែងគ្នាមែន Ramos គិតថា Iniesta គួរណាស់តែឈ្នះពានមួយនេះ

2018-04-26 11:24:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែការពារ Sergio Ramos ក្នុងថ្ងៃនេះ បាននិយាយថាខ្សែបម្រើ Andres Iniesta គួរណាស់តែធ្លាប់បានឈ្នះពានរង្វាន់កីឡាករល្អបំផុតលើលោក Ballon D'or ក្នុងមួយអាជីពបាល់ទាត់ខ្លួន។

កីឡាករអេស្ប៉ាញបានបរិយាយថា៖ "ប្រសិនបើ Andres មានឈ្មោះ Andresinho វិញណា គេប្រហែលជាបានឈ្នះពាន Ballon D'or ពីរដងរួចទៅហើយ ក្នុងអាជីពរបស់រូបគេ"។

Ramos មិនបានបកស្រាយ ឬបញ្ជាក់ហេតុផលនៅពីក្រោយពាក្យ "Andresinho” នេះឡើយ។ ទោះជាយ៉ាងនេះក្ដី ឈ្មោះប្រភេទនេះច្រើនជាប្រភេទឈ្មោះប្រេស៊ីល។ មុន Crisitiano Ronaldo និង Lionel Messi ចាប់ផ្ដើមដូរគ្នា ឈ្នះ Ballon D'or តាំងពី ២០០៨ មក គិតចាប់ពីឆ្នាំ ២០០០ មានកីឡាករប្រេស៊ីល ៣ រូបដែលឈ្នះពាននេះ រួមមាន Ronaldo (២០០២), Ronaldinho (២០០៥) និង Kaka (២០០៧)។

Iniesta ជាកីឡាករបង្គោលរបស់ Barcelona ជាច្រើនឆ្នាំមកហើយ និងបានជួយក្លឹបឲ្យឈ្នះពានជាច្រើន។ មិនតែប៉ុណ្ណោះ កីឡាករបានជួយអេស្ប៉ាញឲ្យលើកពាន World Cup កាលពីឆ្នាំ ២០១០ ទៀតផង។

Iniesta ធ្លាប់ជាប់បេក្ខភាព Top 3 ប្រជែងពាន Ballon D'or កាលពីឆ្នាំ ២០១០ និង ២០១២។ ទាំងពីរឆ្នាំនោះ គឺខ្សែប្រយុទ្ធ Lionel Messi ជាអ្នកឈ្នះ។ ទោះជាយ៉ាងណា មានមតិជាច្រើនបានលើកឡើងថា ដោយសារតែភាពជោគជ័យទាំងក្លឹប និងក្រុមជម្រើសជាតិនៅឆ្នាំ ២០១០ កីឡាករអេស្ប៉ាញ Iniesta ទៅវិញទេ ដែលគួរតែជាអ្នកឈ្នះពានមួយនេះកាលនោះ៕