បើមាន iPad ចាស់ដើរយឺត អាចសាកវិធីនេះបាន

2018-04-29 01:22:39
ចំនួនមតិ 0 | ចំនួនចែករំលែក 0

ចន្លោះមិនឃើញ

បើអ្នកមាន iPad ចាស់ទុកចោល ដំណើរការយឺត អាចទាញយកមកសាកថ្ម រួចអាចសាកល្បងវិធីទាំងនេះ ក្រែងពេញចិត្តនឹងយកតាមខ្លួនប្រើឡើងវិញ។

១) បង្កើន Space ទំនេរ

បើអ្នកប្រើ iPad ចាស់ ការងារដំបូង គួរសម្អាតទុក Storage ទំនេរខ្លះ ដោយសារប្រព័ន្ធ iOS និងកម្មវិធីតម្រូវមាន Space ទំនេរ ដើម្បីបំពេញការងារបានពេញលេញ។ ពេលទំហំ Storage នៅសល់តិច តិច ឬច្រើនអាចប៉ះពាល់ដល់ល្បឿនដំណើរការបាន។

ចូលទៅកាន់ Settings > General > Storage > រង់ចាំបន្តិច កម្មវិធីបានដំឡើងនឹងបង្ហាញ។ នៅក្បែរឈ្មោះកម្មវិធី អ្នកនឹងឃើញចំនួន Space កំពុងប្រើប្រាស់។

បើឃើញកម្មវិធីណាមួយ មិនដែលប្រើ អាចចុចលើកម្មវិធីនោះ > ចុច Delete App នេះនឹងលុបចោលកម្មវិធី ក៏ដូចជាទិន្នន័យទាក់ទងនឹងកម្មវិធីនោះផងដែរ។

២) លុបសម្អាតទិន្នន័យមួយចំនួនក្នុងកម្មវិធី Photos លើ iPad

បើកកម្មវិធី Photos > ចុចលើ Albums > ជ្រើសរើស Videos ដើម្បីឃើញរាល់វីដេអូបានរក្សាទុកលើ iPad > ចុចលើ icon Trash នៅជ្រុងស្ដាំខាងក្រោមអេក្រង់ ក្នុងការលុបវីដេអូ។

អ្នកប្រហែលជាដឹង វីដេអូ ចំណាយទំហំរក្សាទុកច្រើនជាងរូបភាព ដូច្នេះការលុបវីដេអូ ជាវិធីដ៏ល្អ ពិតណាស់បើវីដេអូនោះមិនសំខាន់។

ពេលបើកវេបសាយនានា បើមានអារម្មណ៍ថាយឺត អាចលុប Cache (ទិន្នន័យបណ្ដោះអាសន្នរក្សាទុកងាយស្រួលបើកវេបសាយណាមួយបានលឿន) ក្នុង Safari បាន ដោយចូលទៅកាន់កម្មវិធី Settings > Safari > ចុចលើ Clear History and Website Data។ នេះនឹងលុបរាល់ History និងទិន្នន័យវេបសាយបានរក្សាទុក។

មានកម្មវិធីជំនួយជាច្រើនអាចសម្អាតបង្កើត Space ទំនេរ ដូចជា Magic Phone Cleaner តែជាការល្អមុនពេលធ្វើ គួរ Backup ក្នុង iTune ក្រែងប៉ះពាល់ទិន្នន័យអ្នកចង់ទុកលើ Device។

៣) កែប្រែ Settings មួយចំនួន

មាន Settings មួយចំនួន អាចកែប្រែ ដើម្បីសម្រួលដំណើរការប្រព័ន្ធឲ្យប្រសើរឡើង។

ចូលទៅកាន់កម្មវិធី Settings > General > Background App Refresh មុខងារនេះអាចឲ្យកម្មវិធីបន្តដំណើរការនៅ Background ដើម្បីប្រមូលព័ត៌មានថ្មីៗ។ អ្នកអាចបិទដំណើរការទាំងស្រុង ឬបើកចំពោះកម្មវិធីណាមួយ។

Notification ក៏អាចបន្ថយល្បឿន iPad ដែរ ពេលទទួលបានសារច្រើន ហើយ ថាមពលថ្ម ក៏ប្រើច្រើនតាមនោះដែរ។ ពេលទទួលបាន Notification Tablet នឹងបើក ទាញទិន្នន័យ បង្ហាញលើអេក្រង់ ហើយក៏បញ្ចេញសំឡេងផងដែរ។ អ្នកអាចបិទបាន ដោយចូលទៅកាន់ Settings > Notifications។

អ្នកក៏អាចបើកដំណើរការមុខងារ Reduce Motion ដោយចូលទៅ Settings > General > Accessibility។ នេះនឹងបិទនូវ Effect ឬ Animation ជួយសម្រួលដំណើរការ GPU។

ចំពោះមុខងារស្រាវជ្រាវកម្មវិធីក៏អាចបិទបានដែរ ដោយចូលទៅកាន់ Settings > Siri & Search > បិទមុខងារ Suggestions in Search និង Suggestions in Look Up។

៤) ធ្វើកំណែទម្រង់ប្រព័ន្ធ iOS

iPad ទុកចោលមិនប្រើរយៈពេលយូរ ប្រព័ន្ធអាចហួសសម័យ ដែលចាំបាច់គួរធ្វើកំណែទម្រង់ថ្មី។

iPad គួរសាកថ្មគ្រប់គ្រាន់អាចលើសពី ៦០% > ដោតភ្ជាប់នឹង Mac ឬ PC > បើកដំណើរការកម្មវិធី iTune > Backup បើអ្នកចង់រក្សាទុកជំនាន់ចាស់ការពារក្រែង ដំណើរការខុសប្រក្រតី > ជ្រើសរើស Device > បើក Tab ឈ្មោះ Summary > ចុចលើ Update។

នេះនឹងទាញយក iOS ជំនាន់ចុងក្រោយ ហើយដំឡើងលើ iPad។ ពេលដំណើរការចប់ ដក iPad ចេញ។ បើអ្នកមានរូបភាពច្រើនលើ iPad ប្រព័ន្ធអាចយឺតបន្តិច ខណៈពេលរៀបចំរូបភាពក្នុងកម្មវិធី Photos។

ជាទូទៅ កំណែទម្រង់ iOS ថ្មីអាចចំណាយពេល ២ ទៅ ៣ ថ្ងៃ ដើម្បីដឹងថាប្រព័ន្ធនៅតែយឺត ឬអត់។ បើនៅតែយឺត អាចពិចារណា Reinstall ប្រព័ន្ធ iOS បាន។

ដោតភ្ជាប់ Device រួចបើកកម្មវិធី iTune > ជ្រើសរើស iPad > ចុចលើ Tab ឈ្មោះ Summary > Restore។ គ្រប់យ៉ាងលើ iPad នឹងបាត់បង់ ដូច្នេះគួរ Backup ឬចម្លងទុកឯកសារសំខាន់ចេញ។

៥) ប្ដូរថ្ម iPad

បើ iPad ដំណើរការយឺត ហើយស៊េរីក៏មិនចាស់ណាស់ណា ដោយមិនចង់ផ្លាស់ប្ដូរថ្មី អាចសាកផ្លាស់ប្ដូរថ្មបាន។ Device ប្រហែលអាចដំណើរការខុសប្រក្រតីបន្តិច ពេល iOS សម្គាល់ឃើញបញ្ហាជាមួយថ្ម។

គួរដឹងផងដែរ ការផ្លាស់ប្ដូរថ្មនេះ ក៏មិនប្រាកដថាល្បឿនអាចដំណើរការដូចដើមដែរ។

ត្បិតតែ iPad ចាស់ពេក មិនអាចឡើងជំនាន់ ប្រើបច្ចេកវិទ្យាចុងក្រោយបាន តែមានការងារមួយចំនួននូវតែអាចដំណើរការបាន ដូចជាចាក់បទចម្រៀង, មើលវីដេអូពី Youtube, មើលបញ្ជីគ្រឿងទេសប្រើក្នុងចង្ក្រានបាយ, អានអត្ថបទ ផ្សេងៗ, ទុកឲ្យក្មេងៗចុចលេង ឬការងារកម្រិតស្រាលមួយចំនួនទៀត៕