ផ្លូវសាករថយន្តអគ្គិសនីដំបូងបង្អស់ បើកជាផ្លូវការនៅស៊ុយអែត
- 2018-04-29 02:59:40
- ចំនួនមតិ 0 | ចំនួនចែករំលែក 0
ផ្លូវសាករថយន្តអគ្គិសនីដំបូងបង្អស់ បើកជាផ្លូវការនៅស៊ុយអែត
ចន្លោះមិនឃើញ
ប្រទេសស៊ុយអែតបានបើកសម្ភោធផ្លូវសាកភ្លើងដំបូងគេដែលអនុញ្ញាតឱ្យឡានដឹកទំនិញសាកភ្លើងដោយឯង ខណៈបើកបរនៅតាមបណ្តោយផ្លូវ នៅមុនផែនការរៀបចំប្រព័ន្ធដឹកជញ្ជូនឥតប្រើប្រេងឥន្ធនៈក្នុងឆ្នាំ ២០៣០។
ផ្លូវប្រវែង ២ គីឡូម៉ែត្រដែលរត់រវាងអាកាសយានដ្ឋានស្ដុកខូម និង ទីតាំងភស្តុភារមួយកន្លែង គឺជាផ្នែកមួយនៃផែនការដ៏ធំដើម្បីឱ្យមានភ្លើងសាកលើផ្លូវហាយវ៉េប្រវែង ២០ ០០០ គីឡូម៉ែត្ររបស់ប្រទេសនេះ។
បច្ចេកវិជ្ជានេះគឺមានគោលបំណងដោះស្រាយបញ្ហាធំជាមួយនឹងរថយន្តអគ្គិសនី នោះគឺវិធីរក្សាឱ្យរថយន្តទាំងនោះបន្តសាកភ្លើងលើការធ្វើដំណើរផ្លូវឆ្ងាយ។
ផ្លូវដែកអគ្គិសនីនេះត្រូវបានដំឡើងនៅតាមបណ្តោយផ្លូវសាធារណៈលេខ ៨៩៣ រវាងស្ថានីយដឹកជញ្ជូនទំនិញអាឡាន់ដា និងតំបន់ភស្តុភាររ៉ូសឺស្បឺកនៅខាងក្រៅរដ្ឋធានីស្តុកខូម។
ថាមពលត្រូវបានផ្ទេរពីផ្លូវដែកពីរខ្សែដែលដាក់ជាប់លើផ្លូវ ទៅកាន់រថយន្ត តាមរយៈដងភ្ជាប់នៅបាតរថយន្ត ស្រដៀងទៅនឹងរថភ្លើងអគ្គិសនីដែរ។
ដងសាកនោះនឹងផ្តាច់ចេញដោយស្វ័យប្រវត្តិនៅពេលដែលឡានដឹកទំនិញផ្លាស់ប្តូរគន្លងផ្លូវ ហើយបន្ទាប់មកភ្ជាប់ឡើងវិញជាមួយខ្សែអគ្គិសនីផ្សេងទៀត៕