ល្បីថា ប្រាក់ មុន្នីឧត្តម ចង់ចេញពីក្លឹបម៉ាឡេស៊ីពាក់កណ្តាលរដូវកាលនេះ

2018-04-30 02:24:48
ចំនួនមតិ 0 | ចំនួនចែករំលែក 0

ចន្លោះមិនឃើញ

សមាជិកជម្រើសជាតិកម្ពុជា និងជាអតីតកីឡាករព្រះខ័នរាជស្វាយរៀង ប្រាក់ មុន្នីឧត្តម មានអារម្មណ៍ចង់ចាកចេញពីក្លឹប Negeri Sembilan FA នៃលីគកំពូលម៉ាឡេស៊ី បន្ទាប់ពីទៅលេងនៅទីនោះមួយរយៈពេលដោយលទ្ធផលមិនល្អ។

ប្រាក់ មុន្នីឧត្តម

អ្នកជិតសិទ្ធិនឹងប្រាក់ មុន្នីឧត្តម ដែលនិយាយប្រាប់ Sabay ដោយមិនបញ្ចេញឈ្មោះថា ប្រាក់ មុន្នីឧត្តម ពិតជាចង់ចេញពីក្លឹប Negeri Sembilan FA មែននៅពេលលីគកំពូលម៉ាឡេស៊ីចប់ជើងទី១នាពេលខាងមុខ បន្ទាប់ពីផ្លាស់ចេញពីព្រះខ័នរាជស្វាយរៀងទៅទីនោះតាំងពីដើមរដូវកាល២០១៨។

ប្រភពព័ត៌មានបានបញ្ជាក់ថា អតីតសមាជិកព្រះខ័នរាជស្វាយរៀងនេះបារម្ភធ្លាក់ចុះសមត្ថភាពកាន់តែខ្លាំង បន្ទាប់ពីលេងមួយរយៈពេលនៅក្លឹបម៉ាឡេស៊ីមួយនេះ។ តាំងពីលីគកំពូលម៉ាឡេស៊ីចាប់ផ្តើមរដូវកាល២០១៨នេះមានរយៈ៧សប្តាហ៍ហើយ ប៉ុន្តែក្លឹប Negeri Sembilan ឈ្នះ១ ស្មើ១ និងចាញ់៤ដែលមាន៤ពិន្ទុកំពុងស្ថិតនៅបាតតារាងក្នុងចំណោម១២ក្លឹប។

ប្រភពបន្តថា នៅពេលក្លឹបមិនទទួលបានលទ្ធផលល្អបែបនេះអាចធ្វើឲ្យកម្លាំងចិត្តកាន់តែធ្លាក់ចុះ និងកម្រិតសមត្ថភាពក៏អាចកាន់តែថមថយដែរ ដូច្នេះហើយទើបបានជាកីឡាករកម្ពុជារូបចង់ចាកចេញ។ យ៉ាងណា ប្រភពព័ត៌មានមិនប្រាប់ថា ប្រាក់ មុន្នីឧត្តម ចង់បន្តនៅម៉ាឡេស៊ី ឬវិលត្រឡប់មកកម្ពុជា។

PKNP FC ចែកផ្លូវគ្នាជាមួយ កែវ សុខផេងក្រោមមូលហេតុជាច្រើន

ជុំវិញករណីលើកឡើងនេះ Sabay បានព្យាយាមទាក់ទងទៅ ប្រាក់ មុន្នីឧត្តម ប៉ុន្តែមិនទាន់មានការឆ្លើយតបយ៉ាងណានោះទេ។ ប្រាក់ មុន្នីឧត្តម ជាកីឡាករកម្ពុជាម្នាក់ក្នុងចំណោមកីឡាករកម្ពុជា៤នាក់ដែលបានទៅលេងលីគកំពូលម៉ាឡេស៊ីនារដូវកាល២០១៨នេះ។ ចាន់ វឌ្ឍនាកាទៅក្លឹប Pahang FA ដែលកំពុងមានលទ្ធផលល្អប្រសើរទាំងលីគកំពូល និង FA Cup ខណៈ ធារី ចន្ថាប៊ីន ចូលក្លឹប Terengganu ក៏ល្អប្រសើរដែរ។ ចំណែក កែវ សុខផេង អតីតសមាជិកភ្នំពេញក្រោនត្រូវបានគ្រូបង្វឹកក្លឹប PKNP ប្រាប់អ្នកសារព័ត៌មានថា បានបញ្ចប់កុងត្រាហើយ ប៉ុន្តែក្លឹបមិនទាន់ឃើញចេញសេចក្តីប្រកាសផ្លូវការណាមួយឡើយ៕