នារីល្បុក្កតោ សំ ថារ័ត្ន ប៉ះម្ចាស់ផ្ទះហ្វីលីពីន ក្នុងទ្រុង ONE FC នាថ្ងៃទី៥ ធ្នូ

2014-11-14 13:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាការិនីល្បុក្កតោខ្មែរ សំ ថារ័ត្ន នឹងលេចមុខប្រឈមនឹងជើងខ្លាំងម្ចាស់ផ្ទះហ្វីលីពីនក្នុងព្រឹត្តិការណ៍អន្តរជាតិ One FC: WARRIOR’S WAY នាថ្ងៃទី៥ ខែធ្នូ ឆ្នាំ២០១៤ខាងមុខនេះ នៅទីក្រុងម៉ានីល ប្រទេសហ្វីលីពីន។

បន្ទាប់បានផ្តួលមិត្តរួមជាតិ វី ស្រីឆាយ ក្នុងទឹកទី១ នៅព្រឹត្តិការណ៍ One FC: Rise of the Kingdom កាលពីថ្ងៃទី១២ ខែកញ្ញា ឆ្នាំ២០១៤ នៅមណ្ឌលកោះពេជ្រ រាជធានីភ្នំពេញ សំ ថារ័ត្ន ទទួលបានការចាប់អារម្មណ៍យ៉ាងខ្លាំងពីអ្នកគ្រប់គ្រងស្ថាប័ន One FC ដែលកំពុងតែស្វែងរកអ្នកប្រដាល់នារីចូលរួមប្រកួតជាលក្ខណៈអន្តរជាតិ។

ពេលនេះ One FC បានផ្តល់ឱកាសឲ្យ សំ ថារ័ត្នចូលខ្លួនប្រកួតជាលើកទីពីរក្នុងព្រឹត្តិការណ៍ប្រដាល់អន្តរជាតិក្នុងទ្រុងដ៏ធំរបស់ខ្លួនដោយត្រូវប្រឈមនឹងជើងខ្លាំង Jujeath Nagaowa ដែលជាកីឡាការិនីម្ចាស់ផ្ទះ។ កីឡាការិនីហ្វីលីពីនរូបនេះជាអតីតម្ចាស់ខ្សែក្រវាត់ប្រដាល់សាកល WBC Asia Atomweight Champion ដែលធ្លាប់ល្បីឈ្មោះនៅ ONE FC ហើយ បន្ទាប់ពីបានផ្តួលកីឡាការិនីឥណ្ឌា Jeet Toshi នៅទីក្រុងម៉ានីលកាលពីដើមឆ្នាំ២០១៤។ សម្រាប់អាជីពប្រដាល់សាកល នាងធ្លាប់ទទួលបានជ័យជម្នះ១២ដងជាប់គ្នា។

កីឡាការិនីហ្វីលីពីន Jujeath Nagaowa

ក្នុងព្រឹត្តិការណ៍ FC: WARRIOR’S WAY នៅមានជើងខ្លាំងជាច្រើនទៀតដែលនឹងបង្ហាញខ្លួនដូចជា អ្នកលេងល្បីឈ្មោះ Eduard Folayang កីឡាការិនីអតីតម្ចាស់ខ្សែក្រវាត់ប្រដាល់សាកល WBO និង IBA នាង Ana Julaton ដែលប្រឈមនឹងកីឡាការិនីអេហ្ស៊ីប Walaa Abas។ ចំណែក Rene Catalan ត្រូវប្រកួតនឹងជើងខ្លាំង Muay Thai កីឡាករ Dejdamrong Sor Amnuaysirichoke ព្រមទាំងមានគូប្រកួតជាច្រើនទៀត៕