សំអាង ឌុន ជើងឯកពាន Grand Prix របស់ One FC រងការរិះគន់ចាស់ដៃ

2014-09-15 21:24:58
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រដាល់ក្នុងទ្រុង សំអាង ឌុន រងការរិះគន់យ៉ាងខ្លាំងរយៈពេលពីរបីថ្ងៃចុងក្រោយនេះ បន្ទាប់ពីរូបគេត្រូវបានឲ្យឈ្នះពានរង្វាន់ Grand Prix របស់ព្រឹត្តិការណ៍ប្រដាល់គុនចម្រុះអន្តរជាតិ One FC: Rise of the Kingdom កាលពីរាត្រីថ្ងៃសុក្រសប្ដាហ៍កន្លងទៅនេះនៅសាលមហោស្រពកោះពេជ្រ បន្ទាប់ពីដៃគូ ចាន់ រតនាវាយខុសបច្ចេកទេស។

សំអាង ឌុន លើកពាន

ប្រភពអ្នកស្និទ្ធនឹងកីឡាករម្នាក់និយាយដោយមិនបញ្ចេញឈ្មោះកាលពីថ្ងៃម្សិលមិញបានឲ្យដឹងថា តាមពិតប្រសិនបើ សំអាង ឌុនក្រោកឡើងប្រកួតវិញក៏អាចងើបបានដែរ ប៉ុន្តែកីឡាកររូបនេះធ្វើពុតជាមិនអាចក្រោករួចដើម្បីចង់ឈ្នះតែម្តង ពីព្រោះប្រហែលជាគាត់គិតថាមិនអាចយកឈ្នះ ចាន់ រតនាបាន។

ប្រភពដដែលខាងលើបញ្ជាក់ថា ៖«ការធ្វើបែបនេះមិនស័ក្ដិសមជាកីឡាករឡើយ។ ប្រកួតទៅ ទោះឈ្នះ ឬចាញ់គឺបង្ហាញពីភាពខ្លាំងពិតប្រាកដរបស់កីឡាករខ្មែរយើង។ កីឡាករខ្មែរមួយចំនួននៅតែមិនចោលទម្លាប់ធ្វើពុតជាឈ្នះ។ ខ្ញុំសូមសរសើរកីឡាករខ្មែរមកពីប្រទេសអូស្ត្រាលី Suasday Chau ត្រូវបានដៃគូកីឡាករបារាំងជាន់លើមុខឡើងសន្លប់យ៉ាងយូរ ប៉ុន្តែគាត់នៅតែតស៊ូក្រោកឡើងប្រកួតបានដើម្បីឲ្យដឹងច្បាស់ពីឈ្នះចាញ់»។

ចំណែកលោក សេរី ណាថាន់ ពិធីករនៅទូរទស្សន៍ស៊ីធីអិនដែលជាពិធីករក្នុងព្រឹត្តិការណ៍ One FC នារាត្រីនោះក៏បានសរសេរនៅលើទំព័រ Facebook របស់លោកមួយថ្ងៃបន្ទាប់ពីការប្រកួតថា ៖«សំអាង ឌុន គួរតែបន្តការប្រកួតរបស់ខ្លួន។ ទោះឈ្នះ ឬចាញ់ វានឹងស្ថិតក្នុងរូបភាពជាអ្នកប្រដាល់អាជីព»។

ចាន់ រតនា បង្ហាញការមិនពេញចិត្តចំពោះ សំអាង ឌុន

លើសពីនេះទៀតមានអ្នកលេង Facebook ជាច្រើនបានរិះគន់សំអាង ឌុនថាមិនសមជាកីឡាករ។ អ្នកស្នេហាប្រដាល់ទាំងនោះបែរជាទៅកោតសរសើរចំពោះ កីឡាករ ចាន់ រតនាថាពិតជាជើងខ្លាំង។

ការប្រកាសលទ្ធផលឲ្យឈ្នះបែបនេះហាក់ខុសប្លែកពីធម្មតាដែលតាមទម្លាប់របស់ One FC ប្រសិនបើមានការប្រកួតខុសពីប្រក្រតីគឺមិនប្រកាសលទ្ធផលទេ។ ជាក់ស្តែងនាគខ្មៅកម្ពុជា ឃីម ឌីម៉ា ត្រូវបានចាត់ទុកជាមោឃៈ បន្ទាប់ពីវាយកីឡាករហ្វីលីពីនដោយខុសបច្ចេកទេស ហើយកាលពីខែមិថុនានៅប្រទេសសិង្ហបុរីកីឡាករតៃវ៉ាន់ម្នាក់ត្រូវបានដៃគូឡើងជង្គង់ចំប្រដាប់ភេទរហូតមិនអាចបន្តការប្រកួតក៏ចាត់ទុកជាមោឃៈដែរ។

សំអាង ឌុនត្រូវបានប្រកាសឲ្យឈ្នះពានរង្វាន់ Grand Prix នេះ បន្ទាប់ពី ចាន់ រតនាទាត់បកក្រោយហើយជាន់ត្រូវបំពងកធ្វើឲ្យរូបគេដេកដួលមិនអាចបន្តការប្រកួតបាន។ ប៉ុន្តែកីឡាកររូបនេះអាចបាននិយាយធម្មតាតាមរយៈបទសម្ភាសន៍របស់ពិធីករ។ ពេលនោះលោក ហុន ចាន់រាជគ្រូបង្វឹករបស់ សំអាង ឌុន បានបង្ហាញសកម្មភាពឡាំប៉ាមួយប្រាវ។

ពាក់ព័ន្ធនឹងករណីនេះតំណាង One FC មិនបានបញ្ជាក់លំអិតទេគ្រាន់តែប្រាប់ខ្លីថា ផ្ដល់លទ្ធផលទៅឲ្យ សំអាង ឌុន ពីព្រោះ ចាន់ រតនាវាយខុសបច្ចេកទេស។