ជិតដល់វគ្គផ្ដាច់ព្រ័ត្រ Champions League តម្លៃសណ្ឋាគារខ្លះក្នុងទីក្រុងគាវ ឡើងកប់ពពក
- 2018-05-16 13:24:14
- ចំនួនមតិ 0 | ចំនួនចែករំលែក 0
ជិតដល់វគ្គផ្ដាច់ព្រ័ត្រ Champions League តម្លៃសណ្ឋាគារខ្លះក្នុងទីក្រុងគាវ ឡើងកប់ពពក
ចន្លោះមិនឃើញ
បើតាមការចុះផ្សាយរបស់ Marca តម្លៃសណ្ឋាគារ-ផ្ទះសំណាក់ខ្លះបានឡើងកប់ពពកនៅរដ្ឋធានីគាវ ប្រទេសអ៊ុយក្រែន ខណៈការប្រកួត Champions Leagueវគ្គផ្ដាច់ព្រ័ត្រកាន់តែខិតជិតចូលមកដល់។
យោងតាមប្រភពដដែល នៅពេលនេះ តម្លៃស្នាក់នៅផ្ទះសំណាក់ ឬសណ្ឋាគារជាមធ្យមក្នុងមួយយប់គឺ ៧០០ អឺរ៉ូ (ជាង ៨២០ដុល្លារសហរដ្ឋអាមេរិក)។
បន្ទប់ដែលថ្ងៃធម្មតាមានតម្លៃមួយយប់ត្រឹមតែ ៤៨ អឺរ៉ូ (៥៦ ដុល្លារ)សោះ បានឡើងថ្លៃដល់ទៅ ៣ពាន់អឺរ៉ូ (ជាង ៣៥០០ដុល្លារ) នៅយប់ថ្ងៃទី ២៦ ឧសភា។
សណ្ឋាគារផ្កាយបីចំនួនពីរនៅទីក្រុងគាវ បានប្រាប់ Marca កាលពីម្សិលមិញថា ខ្លួនត្រូវបានកក់ពេញអស់ហើយ។ ក្នុងនោះ សណ្ឋាគារមួយថា តម្លៃសម្រាប់បន្ទប់ចុងក្រោយរបស់ខ្លួនគឺ ២១០០ អឺរ៉ូ (ជិត ២៥០០ ដុល្លារ) ឯមួយទៀតបញ្ជាក់ថា មានតម្លៃ ១៥៩០ អឺរ៉ូ (ជិត ១៩០០ ដុល្លារ)។
ដោយឡែក ចំពោះតម្លៃនៃការស្នាក់នៅផ្ទះ Apartment វិញ ក៏មានតម្លៃមិនថោកដែរ។ ផ្ទះមួយកន្លែងមានចម្ងាយ ៩ គីឡូម៉ែត្រពីកណ្ដាលក្រុងគាវ មានផ្ទៃ ៥០ ម៉ែត្រការ៉េ ហើយមានតម្លៃស្នាក់នៅដល់ទៅ ៦៣០០ អឺរ៉ូ (ជិត ៧៥០០ ដុល្លារ)។ ឯផ្ទះមួយកន្លែងទៀត មានផ្ទៃ ៣៨ ម៉ែត្រការ៉េ ថ្លៃដល់ទៅ ១៦៨៥ អឺរ៉ូ (ជិត ២ ពាន់ដុល្លារ)។
សូមបញ្ជាក់ផងដែរថា Liverpool នឹងត្រូវប្រកួតជាមួយ Real Madrid ក្នុងវគ្គផ្ដាច់ព្រ័ត្រ Champions League នៅកីឡដ្ឋាន NSC Olimpiyskiy ស្ថិតក្នុងរដ្ឋធានីគាវ ប្រទេសអ៊ុយក្រែន នាថ្ងៃទី ២៦ ឧសភាខាងមុខ៕