អាវ PSGដំបូងរបស់ Neymar ត្រូវបានលក់ក្នុងតម្លៃខ្ពស់កប់

2018-05-17 11:51:06
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីល្ងាចម្សិលមិញ មូលនិធិរបស់ក្លឹប PSG បានរៀបចំពិធីដេញថ្លៃមួយ ដើម្បីរៃអង្គាសប្រាក់ទុកប្រើប្រាស់ក្នុងសកម្មភាពសប្បុរសធម៌។ ក្នុងនោះ អាវ PSG ដែល Neymar ពាក់ដំបូងបំផុតក៏ត្រូវបានយកទៅដាក់ដេញថ្លៃផងដែរ។

ក្រោយដេញថ្លៃរួច អាវ PSG ដំបូងរបស់កីឡាករប្រេស៊ីល ត្រូវបានលក់ក្នុងតម្លៃខ្ពស់រហូតដល់ទៅ ២៤ ម៊ឺនអឺរ៉ូ (ជិត ២៨ ម៊ឺនដុល្លារសហរដ្ឋអាមេរិក)។ នេះបើតាមការចុះផ្សាយរបស់សារព័ត៌មាន Marca។ ទោះជាយ៉ាងណា ប្រភពដដែលមិនបានបង្ហាញមុខអ្នកដែលសម្រេចឲ្យថ្លៃខ្ពស់ប៉ុណ្ណឹងឡើយ។

កម្មវិធីដេញថ្លៃរបស់មូលនិធិក្លឹបនេះ បានរៃអង្គាសបានប្រាក់សរុប ១,៦ លានអឺរ៉ូ (ប្រមាណ ១,៨ លានដុល្លារសហរដ្ឋអាមេរិក)។

សូមបញ្ជាក់ផងដែរថា កាលពីខែសីហា ឆ្នាំមុន Neymar បានចាកចេញពី Barcelona មកចូលរួមជាមួយ PSG ក្នុងតម្លៃផ្ទេរថ្លៃបំផុត ២២២ លានអឺរ៉ូ (ជាង ២៦០លានដុល្លារសហរដ្ឋអាមេរិក)។ នៅរដូវកាលដំបូងរបស់ខ្លួននៅក្លឹបថ្មី កីឡាករស៊ុតចូលសរុប ២៨ គ្រាប់ ក្នុងការបង្ហាញខ្លួន ៣០ លើក៕

ប្រភព៖ Marca ប្រែសម្រួល៖ ហ៊ីម រស្មី