មកស្គាល់រថភ្លើងដំបូងគេបង្អស់ ដែលមិនបើកលើផ្លូវដែក

2018-05-17 12:33:51
ចំនួនមតិ 0 | ចំនួនចែករំលែក 0

ចន្លោះមិនឃើញ

រថភ្លើងដើរដោយអគ្គិសនី The Autonomous Rail Rapid Transit (ART) គឺជារថភ្លើងដំបូងគេ ដែលមិនបើកលើផ្លូវដែក។

យានយន្តនេះត្រូវបានអភិវឌ្ឍផ្ទាល់ដោយក្រុមហ៊ុនចិនឈ្មោះ China Railway Rolling Stock Cooperation (CRRC)។

រថភ្លើង ART មាន ៣ ផ្នែក (ផ្នែកច្រើនទៀតអាចត្រូវបានបន្ថែម បើសិនជាត្រូវការ) ហើយអាចមានសមត្ថភាពទទួលអ្នកដំណើរចំនួន ៣០៧ នាក់។ ល្បឿនអតិបរមារបស់វា គឺ ៧០ គីឡូម៉ែត្រក្នុងមួយម៉ោង។

រថភ្លើងនេះមានរូបរាង ប្រវែង និងរបៀបទទួលអ្នកដំណើរ ដូចរថភ្លើងធម្មតាដែរ។ ទោះជាយ៉ាងណា ក្នុងការរត់ចម្ងាយ ២៥ គីឡូម៉ែត្រ វាត្រូវការ ការសាកថ្មត្រឹមតែ ១០ នាទីប៉ុណ្ណោះ។

លើសពីនេះ ART មិនត្រូវការផ្លូវដែកឡើយដើម្បីធ្វើដំណើរទៅមុខ។ វាមានកង់ធ្វើពីកៅស៊ូ ហើយរត់លើផ្លូវធម្មតាតាមគំនូសសៗគូសជាតម្រាយផ្លូវ។ វាត្រូវបានគ្រប់គ្រងដោយប្រព័ន្ធ Sensor ដើម្បីធានាសុវត្ថិភាព អាទិភាព និងកម្រិតល្បឿន។

បច្ចុប្បន្ន យានយន្តមួយនេះ មានសមត្ថភាពបើកបរទៅមុខក្នុងលក្ខណៈពាក់កណ្ដាលស្វ័យប្រវត្តិ (មានន័យថាពាក់កណ្ដាលទៀតមនុស្សជាអ្នករៀបចំឲ្យដំណើរការ)។ ទោះជាយ៉ាងណា បើតាមបណ្ដាវិស្វករដែលផលិតរថភ្លើង ART បានលើកថា វានឹងអាចបើកដោយស្វ័យប្រវត្តិនាពេលអនាគត ដោយប្រើប្រាស់ប្រព័ន្ធ Beidou Navigation System។

វាមានតម្លៃត្រឹមតែ ១ ភាគ ៥ ប៉ុណ្ណោះនៃរថភ្លើងប្រពៃណី។ បើតាម Xinhua រថភ្លើងប្រពៃណីរត់លើផ្លូវដែកនៅចិនមានតម្លៃចន្លោះពី ២២,៦ ទៅ ៣១,៤ លានដុល្លារសហរដ្ឋអាមេរិក។

សូមបញ្ជាក់ផងដែរ រថភ្លើង ARTត្រូវបានដាក់ឲ្យរត់សាកល្បងលើកដំបូងកាលពីតុលាឆ្នាំមុន។ យានយន្តត្រូវបានដាក់ឲ្យធ្វើដំណើរសាកល្បងម្ដងទៀត កាលពីពេលថ្មីៗនេះ នៅទីក្រុង Zhuzhou ប្រទេសចិន។

សូមទស្សនាវីដេអូនៃការរត់សាកល្បងនៃ ART កាលពីខែតុលាកន្លងទៅ៕