ទ័ពអត់កីឡាករបរទេសសំខាន់៣នាក់ប៉ះវិសាខារសៀលនេះ

2018-05-19 01:09:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្ងៃនេះ ក្រសួងការពារជាតិអវត្តមានកីឡាករបរទេសសំខាន់ៗដល់ទៅ៣នាក់នៅពេលធ្វើជាភ្ញៀវទៅស្វែងរក៣ពិន្ទុពីម្ចាស់ផ្ទះជាចំណូលថ្មីវិសាខា សប្តាហ៍ទី៦នៃលីគកំពូលកម្ពុជានៅកីឡដ្ឋានវេស្ទើនវេលាម៉ោង៣រសៀលនេះ។

លោក ភា សុភ័ត្ត្រា

តាមការឲ្យដឹងពីលោក ភា សុភ័ត្ត្រា គ្រូបង្គោលក្រសួងការពារជាតិថា កីឡាករខ្សែបម្រើលេខ៦ជនជាតិជប៉ុន Yudia Ogawa មិនអាចលេងបានទេសប្តាហ៍នេះដោយសារជាប់ពិន័យ១ប្រកួត។ កីឡាករជប៉ុនរូបនេះជាអ្នករកគ្រាប់បាល់បានច្រើនឲ្យក្រុមទ័ព៥សប្តាហ៍កន្លងទៅនេះ។ ថ្វីបើលេងក្នុងតំណែងបម្រើ ប៉ុន្តែរកបាល់បាន៤គ្រាប់ក្នុងនោះសប្តាហ៍ទី១ស៊ុតចូលអង្គរថាយហ្គឺរ១គ្រាប់ សប្តាហ៍ទី៣ស៊ុតចូលអាស៊ីអឺរ៉ុប១គ្រាប់ និងសប្តាហ៍ទី៤ស៊ុតចូលវេស្ទើនភ្នំពេញ២គ្រាប់។

ក្រៅពីបាត់បង់កីឡាករជប៉ុនសំខាន់នោះ ខ្សែការពារសញ្ជាតិកូរ៉េខាងត្បូងលេខ២០ Yoo Jae-ho ក៏មិនអាចលេងបានដែរដោយសារមានជំងឺគ្រុនឈាម។ ចំណែកកីឡាករជប៉ុនលេខ៨ត្រូវបានក្លឹបបញ្ឈប់កិច្ចសន្យាបាត់ហើយ ដូច្នេះការប្រកួតថ្ងៃនេះក្រសួងការពារជាតិមានកីឡាករបរទេសតែ២នាក់គឺលេខ៩ខ្សែប្រយុទ្ធកូរ៉េ Na Hyo-sang និងលេខ១០ខ្សែប្រយុទ្ធកូរ៉េ Song Chi-hun។

ក្រុមក្រសួងការពារជាតិ

យ៉ាងណា លោក ភា សុភ័ក្ត្រា និយាយថា ៖«ខ្ញុំរំពឹងថា ទ័ពនឹងស្តារកិត្តិយស និងស្វែងរកជ័យជម្នះមកវិញ ក្រោយពីរចាញ់ក្រុមដែលមានកម្រិតប្រជែងខ្ពស់ប្រហាក់ប្រហែលគ្នា។ ពួកគាត់នឹងលេងបានល្អដោយឆន្ទៈខ្ពស់ ស្ថានភាពវិសាខា ដែលធ្លាប់ដឹង និងបានមើលការលេងរបស់ពួកគេកន្លងមក គឺខ្ញុំទទួលស្គាល់ថា ក្រុមគេពិតជាមានកម្រិតប្រកួតប្រជែងខ្ពស់មួយដែរ បើប្រៀបធៀបជាមួយក្រុមខ្លាំងៗមួយចំនួន»។

ស្ថិតិ៥ប្រកួតក្នុងលីគកន្លងទៅ ក្រសួងការពារជាតិឈ្នះ៣ និងចាញ់២ដោយមាន៩ពិន្ទុស្ថិតនៅចំណាត់ថ្នាក់លេខ៥។ សប្តាហ៍ទី១ ឈ្នះ អង្គរថាយហ្គឺរ ១-០, សប្តាហ៍ទី២ ចាញ់ ភ្នំពេញក្រោន ២-០, សប្តាហ៍ទី៣ ឈ្នះ អាស៊ីអឺរ៉ុប ២-១, សប្តាហ៍ទី៤ ឈ្នះ វេស្ទើនភ្នំពេញ ៨-០ និងសប្តាហ៍ទី៥៖ ចាញ់ បឹងកេត ២-០៕