សាលាស្ដង់ដារអាមេរិកទី១នៅកម្ពុជា បន្តផ្ដល់អាហារូបករណ៍ជួយនិស្សិតក្រីក្រ

2018-05-19 03:31:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្ងៃទី ១៨ ឧសភា ២០១៨ ជាថ្ងៃពិធីចែកសញ្ញាបត្រ ដល់និស្សិត សាកលវិទ្យាល័យអាមេរិកាំងភ្នំពេញ ក្រោមកម្មវិធីសិក្សាសញ្ញាបត្រពីរ (Dual Degree Program) ដែលជាការបង្រៀនរួមគ្នារវាងសាកលវិទ្យាល័យ AUPP សាកលវិទ្យាល័យអារីហ្សូណា (UA)របស់សហរដ្ឋអាមេរិក និងសាកលវិទ្យាល័យរដ្ឋហ្វតហេស៍ (Fort Hays State University-FHSU) ធ្វើឱ្យប្រទេសកម្ពុជាបានទទួលសញ្ញាបត្រស្តង់ដារអប់រំពីសហរដ្ឋអាមេរិក ដោយមិនចាំបាច់ទៅសិក្សានៅបរទេស។

ពិធីចែកសញ្ញាបត្រ ដល់និស្សិត សកលវិទ្យាល័យអាមេរិកាំងភ្នំពេញ ក្រោមការអញ្ជើញចូលរួមជាអធិបតីភាពឯកឧត្ដមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីនៃក្រសួងអប់រំ យុវជន និងកីឡា។

លោក ពុយ គា អ្នកនាំពាក្យនៃ សាកលវិទ្យាល័យ AUPP ឲ្យដឹងថា «មកទល់ពេលនេះ សាលាបានទទួលសិស្សចំនួន ៣០០នាក់ ដែលថ្ងៃនេះ យើងបានរៀបចំពិធីចែកសញ្ញាបត្រដល់និសិ្សតចំនួន ២៨នាក់ ហើយភាគច្រើនជាសិស្សអាហារូបករណ៍ផងដែរ»។

លោក ពុយ គា

និសិ្សតដែលរៀនទីនេះ គឺអាចទទួលសញ្ញាបត្រពីរ ពោលគឺមួយបានពីសាលាផ្ទាល់ និងមួយទៀតសាលាលំដាប់ពិភពលោករបស់អាមេរិក អារីហ្សូណា ដោយសញ្ញាបត្រនេះត្រូវបានទទួលស្គាល់គុណភាពអប់រំស្ដង់ដារអាមេរិក។ ដោយឡែកសម្រាប់និសិ្សតអាហារូបករណ៍ គឺទទួលបានត្រឹមសាកលវិទ្យាល័យ AUPP ប៉ុណ្ណោះ ខណៈនិស្សិតត្រូវបង់ថ្លៃសិក្សាបន្ថែម ប្រសិនបើចង់បានសញ្ញាបត្រពីរ។ លោក ពុយ គា បន្ថែម។

អ្នកនាំពាក្យនៃ សាកលវិទ្យាល័យ បង្ហើប គម្រោងផ្ដល់អាហារូបករណ៍ឲ្យនិស្សិតឆ្នាំបន្ទាប់ គឺគិតតាមនិន្ទេសសិស្ស តួយ៉ាង និន្ទេសA គឺ ២០០០ដុល្លារ និង និទ្ទេស B គឺ១០០០ដុល្លារ ដោយតម្លៃសិក្សាសរុបប្រមាណ ៩០០០ដុល្លារ។ យ៉ាងណាមិញ សាលានៅតែបន្តជួយនិស្សិតក្រីក្រតាមរយៈការផ្ដល់អាហារូបករណ៍១០០% ប្រសិនបើមានការឧបត្ថម្ភពីស្ថាប័ន ឬអង្គការណាមួយដូចឆ្នាំមុនៗផងដែរ៕