Facebook នៅតែកើនអ្នកប្រើប្រាស់ ទោះបីរងព្យុះចលនាលុប Facebook ចោល

2018-05-21 06:22:35
ចំនួនមតិ 0 | ចំនួនចែករំលែក 0

ចន្លោះមិនឃើញ

តាំងតែពីលេចធ្លាយរឿងអាស្រូវរបស់ Facebook ដែលមានការលេចធ្លាយព័ត៌មានអ្នកប្រើប្រាស់ជាង ៨៧ លានគណនីទៅដល់ដៃក្រុមហ៊ុន Cambridge Analytica នោះ ធ្វើឲ្យក្រុមហ៊ុននេះ មានភាពតានតឹងខ្លាំងមែនទែន ក្នុងប្រវត្តិសាស្ត្ររបស់ខ្លួន រហូតដល់ថ្នាក់សភាអាមេរិកកោះអញ្ជើញលោក Mark Zuckerberg ដែលជានាយកប្រតិបត្តិ Facebook ទៅសួរតទល់ផ្ទាល់តែម្ដង។

លើសពីនេះទៅទៀត ក៏មានលេចចេញជាចលនាលុបកម្មវិធី Facebook ពីសំណាក់អ្នកប្រើប្រាស់ផងដែរ ដោយប្រើ Hastag #deleteFacebook ដែលមានលេចចេញជាហូរហែ លើបណ្ដាញសង្គម Twitter ។ ប៉ុន្តែ បើតាមស្ថិតិថ្មីៗនេះរបស់ក្រុមហ៊ុនវិនិយោគ Goldman Sachs បានបង្ហាញថាចលនាលុប Facebook ចោលនេះ មានផលប៉ះពាល់តិចតួចបំផុតដល់ Facebook។

លើសពីនេះទៅទៀត បើតាមការរាយការណ៍របស់ Business Insider បានបង្ហាញពីស្ថិតិនៃអ្នកប្រើ Facebook ក្នុងអំឡុងពេលមានវិបត្តិនោះ មានចំនួនកើនឡើងដល់ទៅ ៧ ភាគរយនៃការប្រើប្រាស់។

មិនមែនត្រឹមតែការប្រើប្រាស់កើនឡើងប៉ុណ្ណោះទេ សូម្បីតែចំនួននាទីដែលអ្នកប្រើប្រាស់ចំណាយលើការលេង Facebook នោះក៏កើនឡើងដែរ។ ខាងធនាគារ Deutsche ក៏បាននិយាយថា ការលុបចោលគណនីក្លែងក្លាយជាង ៥៨៣ លានគណនីពីសំណាក់ Facebook ផ្ទាល់មានផលប៉ះពាល់តិចតូចប៉ុណ្ណោះ ដល់ការផ្សាយពាណិជ្ជកម្មរបស់ក្រុមហ៊ុនបណ្ដាញសង្គមយក្សមួយនេះ។