មកដឹងពីរឿងរ៉ាវស្នេហាដ៏គួរឲ្យស្រលាញ់របស់តួ "Deadpool” និងភរិយា
- 2018-05-23 07:15:00
- ចំនួនមតិ 0 | ចំនួនចែករំលែក 0
មកដឹងពីរឿងរ៉ាវស្នេហាដ៏គួរឲ្យស្រលាញ់របស់តួ "Deadpool” និងភរិយា
ចន្លោះមិនឃើញ
តារាសម្ដែង Ryan Reynold ដែលអ្នកគាំទ្រភាគច្រើនស្គាល់តាមរយៈការសម្ដែងជាតួអង្គ Deadpool តាមពិតមានរឿងរ៉ាវស្នេហាគួរឲ្យស្រលាញ់ជាមួយភរិយារបស់ខ្លួន Black Lively។
Ryan និងភរិយាត្រូវបានគេចាត់ទុកថា ជាគូស្នេហ៍ដ៏សមគ្នាមួយនៅក្នុងវិស័យភាពយន្តនៅហូលីវូដ។ អ្នកទាំងពីរបានរស់នៅជាមួយគ្នាយ៉ាងមានសុភមង្គលអស់រយៈពេល៨ឆ្នាំមកហើយ ចំណែកឯរឿងរ៉ាវស្នេហាអ្នកទាំងពីរវិញបានធ្វើឲ្យអ្នកគាំទ្រជាច្រើនច្រណែនមិនចេះតិច។
ពួកគេបានជួបគ្នាដំបូងនៅពេលសម្ដែងរឿង "Green Lantern” កាលពីឆ្នាំ២០០៩ ខណៈពេលនោះ Ryan ជាស្វាមីរបស់តារាសម្ដែង Scarlett Johansson ខណៈឯ Blake Lively កំពុងតែទាក់ទងជាមួយតារាសម្ដែង Penn Badgley ខណៈពេលសម្ដែងរឿងភាគល្បី "Gossip Girl”។
ក្រោយមកអ្នកទាំងពីរបានចំណាយពេលជាមួយគ្នាយ៉ាងច្រើន ដើម្បីផ្សព្វផ្សាយរឿង "Green Lantern” ពេលនោះពួកគេមើលទៅគឺដូចជាគូស្នេហ៍ពិតប្រាកដអីចឹង។
រហូតដល់ឆ្នាំ ២០១០ Blake បានបែកបាក់ជាមួយសង្សារខ្លួនដែលបាននៅជាមួយគ្នារាប់ឆ្នាំ ខណៈ Ryan កំពុងតែបញ្ចប់ការលែងលះផ្លូវការជាមួយអតីតភរិយា Scarlett Johansson នៅខែកក្កដា។ មូលហេតុមួយសំខាន់នៃការបែកបាក់គឺដោយសារតែភាពល្បីល្បាញខ្លាំងពេករបស់ Scarlett។
នៅខែកញ្ញាឆ្នាំ ២០១២ គូស្នេហ៍មួយគូនេះបានរៀបការយ៉ាងសំងាត់នៅរដ្ឋ South Carolina សហរដ្ឋអាមេរិក បន្ទាប់ពីទាក់ទងគ្នាជិតមួយឆ្នាំ។ អ្នកទាំងពីរបានប្រារព្ធកម្មវិធីជួបជុំមួយជាមួយបងប្អូននិងមិត្តភ័ក្ដិ។ មុនពេលរៀបការ Blake Lively បានសារភាពប្រាប់ទស្សនាវដ្ដី Allure ថានាងមិនដែលសប្បាយចិត្តដូចពេលនេះទេ។
តាំងពីរៀបការមក អ្នកទាំងពីរត្រូវបានគេចាត់ទុកថាជាកំពូលប្ដីប្រពន្ធល្អមួយនៅហូលីវូដ។ ទោះបីជាមិនមានភាពជោគជ័យខ្លាំងក្នុងវិស័យភាពយន្តដូច Scarlett, Blake ត្រូវបានគេស្រលាញ់ពេញចិត្តដោយសារសម្រស់ស្រស់ស្អាត ភាពរីករាយរាក់ទាក់ និងគ្មានរឿងអាស្រូវផ្សេងៗជាដើម។
នៅឆ្នាំ ២០១៤ តួរឿង "Gossip Girls” រូបនេះមានផ្ទៃពោះកូនស្រីដំបូង។ Ryan និយាយថា "តាំងពីយើងមានកូនមក ខ្ញុំស្រលាញ់ភរិយាខ្ញុំជាងអ្វីទាំងអស់ក្នុងជីវិតរបស់ខ្ញុំ។
ទោះបីជាអ្នកទាំងពីររស់នៅក្នុងជីវិតយ៉ាងឯកជនជាមួយគ្នា និងរវល់ការងារសិល្បៈរៀងៗខ្លួន ក៏អ្នកទាំងពីរមិនដែលបែកគ្នាក្នុងរយៈពេលច្រើនជាងមួយអាទិត្យដែរ។
រហូតមកដល់ពេលនេះអ្នកទាំងពីរនៅតែជិតស្និទ្ធដូចគូស្នេហ៍ថ្មោងថ្មី ទោះជាមានកូន២ជាមួយគ្នាហើយក៏ដោយ និយាយរួមគឺបេះមិនចេញតែម្ដង៕