រឿងភាគអាពាហ៍ពិពាហ៍ក្នុងកុងត្រាទាំង៧ អ្នកមើលសរសើរកប់ៗមាត់គ្រប់ពេល
- 2018-05-24 04:35:00
- ចំនួនមតិ 0 | ចំនួនចែករំលែក 0
រឿងភាគអាពាហ៍ពិពាហ៍ក្នុងកុងត្រាទាំង៧ អ្នកមើលសរសើរកប់ៗមាត់គ្រប់ពេល
ចន្លោះមិនឃើញ
ភាពយន្តភាគកូរ៉េល្បីភាគច្រើនបានបង្កើតជាទស្សីយភាពប្លែកមិនធ្លាប់មានដល់អ្នកមើល កើតចេញពីការដកស្រង់នូវរឿងរ៉ាវពិតក្នុងសង្គម បូករួមនឹងគំនិតច្នៃប្រឌិត ដើម្បីឲ្យរឿងនោះកាន់តែមានសោភ័ណ។ តួយ៉ាងដូចរឿងកូរ៉េទាំង ៧ខាងក្រោមនេះ សុទ្ធតែមានសាច់រឿងប្រហាក់ប្រហែលគ្នា និយាយពីអាពាហ៍ពិពាហ៍កុងត្រា ពោលមុនពេលរៀបការតួប្រុសស្រីសុទ្ធតែគ្មានចិត្តឲ្យគ្នា។
ប៉ុន្តែក្រោយមកចំណងអាពាហ៍ពិពាហ៍កើតចេញពីកុងត្រានេះ ក៏ទាញតួទាំង ២ស្រឡាញ់គ្នាឲ្យទាល់តែបាន។ក្នុងចំណោមរឿងទាំងនោះមាន ៧រឿងដែលគ្រប់គ្នាចាំមិនភ្លេចទល់សព្វថ្ងៃ រួមមាន៖
១ . រឿង "Sweet 18” បញ្ចាំងឆ្នាំ ២០០៤
មង្គលការក្នុងរឿងនេះ កើតឡើងចេញពីការផ្សំផ្គុំរបស់ចាស់ទុំទាំងសងខាង ទោះបីស្អប់គ្នា តែគ្មានជម្រើសសម្រាប់តួប្រុសស្រីទាំង ២ទេ។ អ្វីដែលជាបញ្ហាធំនោះគឺ តួស្រីដែលសម្ដែងដោយ Han Ji Hye ទើបនៅជាសិស្សវិទ្យាល័យអាយុ ១៨ឆ្នាំ ខណៈតួប្រុសសម្ដែងដោយ Lee Dong Gun មានអាយុបងនាងដល់ទៅ ១០ឆ្នាំ ហើយរាល់ថ្ងៃផ្ដោតតែលើការងារប៉ុណ្ណោះ។ ទោះបីរៀបការជាមួយគ្នា តែអ្នកទាំង ២សម្រេចរស់នៅបែកគ្នាដើម្បីសុខរៀងខ្លួន រហូតដល់ពេលមួយដែលពួកគេចាប់ផ្ដើមយល់ចិត្តគ្នា។
២. រឿង "Full House” ឬ "បំណុលផ្ទះជំពាក់ស្នេហ៍” ចេញឆ្នាំ ២០០៤
គ្រាន់តែឮចំណងជើងរឿង ប្រិយមិត្តនឹកឃើញមុនគេ គឺតួអង្គ២នាក់ លីយ៉ុងចេ និងហាន់ ជីអ៊ុន។ តួទាំង គឺជាប្ដីប្រពន្ធកុងត្រា ដែលរៀបការដោយបង្ខំ ដោយសារខាងប្រុសមានបំណងចង់បញ្ឈឺសង្សារចាស់ រីឯខាងស្រីគ្មានលុយសងតួប្រុស ក្រោយពេលផ្ទះខ្លួនតួប្រុសទិញយក។ មង្គលការក្លែងក្លាយ ធ្វើឲ្យអ្នកទាំង ២ រួមសុខរួមទុក្ខជាមួយគ្នាក្រោមដំបូលផ្ទះតែមួយជាមួយគ្នាគ្រប់រឿងរ៉ាវ។ ងារម្មណ៍ស្នេហាកើតឡើងដោយមិនដឹងខ្លួន ហើយចុងបញ្ចប់អ្នកទាំង ២ក៏ស្រឡាញ់គ្នាក្នុងនាមជាប្ដីប្រពន្ធពិតប្រាកដ។
៣. រឿង "Sassy Girl, Chun Hyang” បញ្ចាំងឆ្នាំ ២០០៥
ភាពយន្តភាគមួយនេះវិញ ចាប់ផ្ដើមដំបូងគឺតួស្រី Chun Hyang(សម្ដែងដោយ Han Chae Young) និង Mong Ryong (សម្ដែងដោយ Jae Hee) បានដេកក្នុងបន្ទប់មួយជាមួយគ្នាដោយចៃដន្យ រហូតសាលាដឹងក៏បានគំរាមបណ្ដេញចេញ។ គ្មានជម្រើសឪពុកម្ដាយពួកគេក៏បានកុហកថា អ្នកទាំង ២ជាគូដណ្ដឹងនឹងគ្នា ហើយក្រោយក៏បានរៀបការជាមួយគ្នាតែម្ដង។
៤. រឿង "Goong” ឬ "ក្រមុំឡិកឡក់កំលោះទុយមុយ" បញ្ចាំងឆ្នាំ ២០០៦
នេះ គឺជារឿងភាគដែលទទួលបានការគាំទ្រច្រើនមិនធម្មតាជុំវិញទ្វីបអាស៊ី ដោយសារវាបានផ្ដោតសំខាន់លើសិស្សវិទ្យាល័យម្នាក់ (សម្ដែងដោយ Yoon Eun Hye) និងព្រះអង្គម្ចាស់ស្នងរាជ្យ (សម្ដែងដោយ Joo Ji Hoon)ដែលត្រូវរៀបការនឹងគ្នា គោរពតាមពាក្យបណ្ដាំរបស់ជីតាទាំងសងខាង។ តាំងពីជួបគ្នាដំបូង តួទាំង ២ឈ្លោះគ្នាឥតល្ហែ សូម្បីថ្ងៃរៀបការក៏ដោយ។ ប៉ុន្តែយូរៗទៅ ក្ដីស្នេហ៍ក៏កើតមានក្នុងអារម្មណ៍រៀងៗខ្លួន ហើយស្រឡាញ់គ្នាខ្លាំង សឹងបាត់មុខមិនបាន។
៥. រឿង "Prime Minister and I” បញ្ចាំងឆ្នាំ ២០១៣
និយាយពីអ្នកសារព័ត៌មានម្នាក់ សម្ដែងដោយ Yoona ដែលតាមដានជីវិតរស់នៅរបស់នាយករដ្ឋមន្ត្រីវ័យក្មេង Kwon Yul (សម្ដែងដោយ Lee Beom Soo) គ្រប់ពេល។ នៅពេលថ្ងៃមួយ មហាជនចាប់បានពីទំនាក់ទំនងរបស់អ្នកទាំង ២ ហើយដោយគិតថាវាជះឥទ្ធិពលដល់ការងារនយោបាយ តួទាំង ២ក៏សម្រេចរៀបការជាមួយគ្នា តែស្ថិតក្រោមកុងត្រា។
៦. រឿង "Marriage Contract” បញ្ចាំងឆ្នាំ ២០១៦
តារាសម្ដែង Han Ji Hoon និង Kang Hye Soo បានក្លាយជាតួឯកដែលតម្រូវឲ្យរៀបការនឹងគ្នា ដោយសារកុងត្រា និងបំណងរបស់ម្ដាយរបស់ពួកគេ។ដោយសារជាគូព្រេងពិតៗ យូរៗទៅប្ដីប្រពន្ធកុងត្រា ទាំង ២ក៏ផ្ដើមស្រលាញ់គ្នា។
៧. រឿង "Because This Is My First Life” បញ្ចាំងឆ្នាំ ២០១៧
បន្ទាប់ពីជួបគ្នាត្រឹមតែ ២-៣ថ្ងៃ តួប្រុសស្រីសម្ដែងដោយ Lee Min Ki និង Jung So Min ក៏បង្ខំចិត្តរៀបការជាមួយគ្នា ផ្អែកលើហេតុផលជាច្រើន។ រឿងរ៉ាវជាច្រើនបានកើតឡើងក្នុងជីវិតអាពាហ៍ពិពាហ៍ក្លែងក្លាយនេះ ដោយបង្កើតជាផ្ទាំងទស្សីយភាពអស្ចារ្យមិនអាចបំភ្លេចបាន៕