វិបត្តិ Chelsea៖ ប្រធានក្លឹបផុតកំណត់ Visa កីឡាករមិនទាន់បន្តកុងត្រា គ្រូបង្វឹកស្រពិចស្រពិល

2018-06-03 09:27:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ការសម្រេចចិត្តរបស់លោក Roman Abramovich ម្ចាស់ក្លឹបតោខៀវក្នុងការលុបចោលគម្រោងជួសជុលកីឡដ្ឋាន Stamford Bridge ត្រូវបានគេមើលឃើញថាអាចបណ្ដាលមកពីបញ្ហាដ៏ស្មុគស្មាញពិបាកដោះស្រាយ។

បន្ទាប់ពីក្លាយជាម្ចាស់ក្លឹបនៅ Chelsea អស់រយៈពេល១៥ឆ្នាំ សេដ្ឋីរុស្ស៊ីបានសម្រេចពង្រីកកីឡដ្ឋាន ដែលធ្លាប់ផ្ទុកទស្សនិកជនបានប្រមាណ ៤ ម៉ឺននាក់ ដល់ ៦ ម៉ឺននាក់ ដោយចំណាយទុនវិនិយោគជាង ១,៣ ប៊ីលានដុល្លារ ប៉ុន្តែលោកបានសម្រេចដកលុយទាំងនោះចេញវិញកាលពីថ្ងៃព្រហស្បតិ៍ដោយសារអង់គ្លេសមិនទាន់សម្រេចបន្តទិដ្ឋាការឲ្យលោក បន្ទាប់ពីស្ថានភាពតានតឹងផ្នែកនយោបាយរវាង អង់គ្លេស-រុស្ស៊ី។ នេះបើតាម The Guardian ទើបបានចុះផ្សាយ។

លោក Conte បានទទួលស្គាល់ថា អនាគតរបស់លោកជាមួយក្លឹបតោខៀវកាន់តែផុយស្រួយបើទោះជាគ្រូបង្វឹកសញ្ជាតិអ៊ីតាលីបានជួយក្លឹបសេដ្ឋីរុស្ស៊ីលើកពាន FA Cup យ៉ាងណាក្តី។ ចំពោះភាពស្រពិចស្រពិលនៃអនាគតគ្រូបង្វឹកនេះ ក៏ជាកត្តាធ្វើឲ្យកីឡាករជាច្រើនក្នុងក្លឹបមិនពេញចិត្ត។ តួយ៉ាង Cesar Azpilicueta ដែលជាកីឡាករដ៏មានឥទ្ធិពលម្នាក់ក្នុងក្លឹប ក៏ដូចជា Olivier Giroud សុទ្ធតែមិនចង់ឃើញ Conte ចាកចេញឡើយ។

ដោយឡែក តួសំខាន់ Eden Hazard នឹងត្រូវផុតកុងត្រានៅដើមខែសីហានេះ ប៉ុន្តែតារាឆ្នើមបែលហ្ស៊ិកមិនទាន់សម្រេចថាបន្ត ឬ មិនបន្តកុងត្រានៅឡើយ។ ស្រដៀងគ្នានេះដែរ អ្នកចាំទី Thibaut Courtois បានពន្យារពេលចុះកុងត្រាជាមួយ Chelsea រហូតដល់ចប់ World Cup ខណៈដែលកុងត្រាបច្ចុប្បន្នរបស់អ្នកចាំទីកម្ពស់ ១,៩៩ ម៉ែត្រសល់តែ១២ខែប៉ុណ្ណោះ។

អតីតនាយកប្រតិបត្តិរបស់ក្លឹបតោខៀវ លោក Trevor Birch បាននិយាយថា "ប្រសិនបើបញ្ហាទិដ្ឋាការមិនត្រូវបានដោះស្រាយ ខ្ញុំគិតថាអ្វីៗក៏អាចកើតឡើងបានដែរ។ ប្រាកដណាស់ថា វាគឺជាកង្វល់មួយ [សម្រាប់ Chelsea] ពេលនេះ"។

ប៉ុន្តែលោក Trevor Birch មើលឃើញបែបវិជ្ជមានយ៉ាងដូច្នេះថា បើទោះជា Abramovich មិនអាចសុំទិដ្ឋាការប្រកបជំនួញបាន ក៏លោកអាចប្រើទិដ្ឋាការទេសចរដែលអនុញ្ញាតឲ្យម្ចាស់ក្លឹបតោខៀវអាចស្នាក់នៅអង់គ្លេសបាន៦ខែក្នុងពេលចេញចូល១លើកៗដែរ។

ម្យ៉ាងទៀត ជាមួយការកើនឡើងនៃការទិញសិទ្ធិផ្សាយរបស់ទូរទស្សន៍ បើ Man Utd អាចរកចំណូលពីការលក់សិទ្ធិផ្សាយបាន ៤ ប៊ីលានដុល្លារ (៤ ពាន់លានដុល្លារ) ក៏ Chelsea អាចរកបាន ២ ប៊ីលានដុល្លារ ពីការលក់សិទ្ធិផ្សាយផងដែរ។ លោក Trevor Birch បន្ត៕

ប្រភព៖ theguardian ប្រែសម្រួល៖ សុខ លាងហ៊ត