កំពុងរកទិញរថយន្ត Hybrid អាចគិតគូរប៉ុន្មានម៉ូដែលនេះ
- 2018-06-07 01:05:00
- ចំនួនមតិ 0 | ចំនួនចែករំលែក 0
កំពុងរកទិញរថយន្ត Hybrid អាចគិតគូរប៉ុន្មានម៉ូដែលនេះ
ចន្លោះមិនឃើញ
និយាយដល់រថយន្តប្រភេទហាយប្រ៊ីដ មនុស្សភាគច្រើនប្រហែលជាដឹងពីគុណប្រយោជន៍ដ៏ពិសេសរថយន្តនេះ ដោយវាជួយសន្សំសំចៃសាំងបានច្រើន ព្រោះក្រៅពីការប្រើប្រាស់សាំងតែមួយមុខ រថយន្តហាយប្រ៊ីដប្រើប្រាស់ថាមពលអគ្គិសនី ចេញពីអាគុយ ដើម្បីធ្វើការលាយជាមួយម៉ាស៊ីនសាំង។
រថយន្តហាយប្រ៊ីដទទួលបានការគាំទ្រ គ្រប់ទិសទីជុំវិញពិភពលោក សូម្បីតែក្នុងស្រុកខ្មែរ ក៏មានអ្នកប្រើប្រាស់រថយន្តប្រភេទនេះ មិនចេះតិចគ្នាដែរ។ Sabay បង្ហាញរថយន្តហាយប្រ៊ីដ ៥ ម៉ូដែល ដែលពេញនិយមជិះនៅក្នុងប្រទេសកម្ពុជា៖
១. Toyota Prius
Toyota Prius ចេញជាច្រើនជំនាន់ តែជំនាន់ពេញនិយមជាងគេចាប់ពីឆ្នាំ ២០០៤ ដល់ ២០០៩។ រថយន្តនេះ មានម៉ាស៊ីនទំហំ ១,៥ លីត្រ បូករួមនឹងអាគុយដែលផលិតថាមពលបាន ៥០ គីឡូវ៉ាត់។ Prius ជំនាន់ទី ២ (២០០៤-២០០៩) មានកម្រិតស៊ីសាំង ៤,៩ លីត្រ/១០០គ.ម សម្រាប់ផ្លូវក្នុងក្រុង និង ៥,២ លីត្រ/១០០គ.ម សម្រាប់ផ្លូវក្រៅក្រុង។
២. Toyota Camry
Camry Hybrid ជារថយន្តក្នុងសែស្រឡាយ Toyota Camry ចាប់ពីឆ្នាំ ២០០៧ ឡើងទៅ។ Toyota Camry ប្រភេទហាយប្រ៊ីដ ក៏ឃើញមានអ្នកជិះមួយៗដែរចាប់ពីឆ្នាំ ២០០៧ ដល់ ២០១១។ រថយន្តនេះមានម៉ាស៊ីនទំហំ ២,៤ លីត្រ និងម៉ូទ័រអាគុយ ដែលមានកម្លាំង ១០៥ គីឡូវ៉ាត់។
៣. Lexus RX400h
Lexus RX400h ជារថយន្តហាយប្រ៊ីដប្រភេទតួខ្ពស់ SUV។ Lexus RX កូនកាត់នេះចេញដល់ RX450h ទៅហើយក្ដី ក៏ RX400h ម៉ូដែលឆ្នាំ ២០០៤-២០០៩ នៅតែមានការគាំទ្រពីអ្នកប្រើប្រាស់មួយចំនួន។ RX400h ប្រើប្រាស់ម៉ាស៊ីនសាំងទំហំ ៣,៣ លីត្រ និងមានម៉ូទ័រអគ្គសនី ២ មុខក្រោយ មានកម្លាំង ១២៣ គីឡូវ៉ាត់ មានកម្រិតស៊ីសាំងជាមធ្យម ៩,៤ លីត្រ/១០០គ.ម។
៤. Lexus HS250h
Lexus HS250h ជាប្រភេទរថយន្តស៊េរីថ្មី តួទាប Sedan ដែលមានចាប់ពីស៊េរីឆ្នាំ ២០១០ ឡើងទៅ។ HS250h ប្រើប្រាស់ម៉ាស៊ីនដែលមានទំហំ ២,៤ លីត្រ ដូច Toyota Camry ដែរ ហើយកម្រិតស៊ីសាំង ៦,៧ លីត្រ/១០០គ.ម សម្រាប់ផ្លូវក្នុងក្រុង និង ៦,៩ លីត្រ/១០០គ.ម សម្រាប់ផ្លូវក្រៅក្រុង ដោយមានជំនួយពីម៉ូទ័រអគ្គិសនីដែលបង្កើតកម្លាំងបាន ១០៥ គីឡូវ៉ាត់។
៥. Porsche Panamera S Hybrid
ក្រៅពីរថយន្តហាយប្រ៊ីដក្រុមហ៊ុនជប៉ុន នៅក្នុងប្រទេសកម្ពជាយើងក៏មានក៏មានរថយន្តមកពីខាងប្រទេសអាឡឺម៉ង់ មួយដែរគឺ Porsche Panamera S hybrid។ រថយន្តហាយប្រ៊ីដមកពីប៉ែកអឹរ៉ុប ស្ដិតក្នុងត្រកូល Panamera នេះ មានចេញលក់តាំងតែពីឆ្នាំ ២០១១។ ខុសពីរថយន្តប្រភេទហាយប្រីដ ធម្មតាដែលមានម៉ាស៊ីនសាំងទំហំតូច មិនសូវមានថាមពលខ្លាំង Porsche Panmera S hybrid ប្រើប្រាស់ម៉ាស៊ីនទំហំ ៣ លីត្រ ប្រភេទ Supercharged មានកម្លាំងដល់ទៅ ៣២៨ សេះ ជាមួយម៉ូទ័រអគ្គិសនី ដែលផលិតថាមពលបាន ៣៥ គីឡូវ៉ាត់។ រថយន្ត Porsche Panamera S hybrid មានកម្រិតស៊ីសាំងជាមធ្យម ៩,៤ លីត្រ/១០០គ.ម ដូចគ្នានឹង Lexus RX400h។
ចុចអាន៖