ចង់បើក MasterCard និង Visa Card គេត្រូវការឯកសារអីខ្លះ?

2018-06-08 03:04:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ប៉ុន្មានសប្តាហ៍មុន Sabay បានចុះផ្សាយអំពីភាពខុសគ្នារវាង MasterCard និង Visa ដើម្បីឲ្យអ្នកអានបានដឹង និងស្វែងយល់ពីការប្រើប្រាស់កាតធនាគារទាំងពីរនេះ។

ចំពោះថ្ងៃនេះវិញ Sabay សូមនាំអ្នកទស្សនាមកដឹងពីរបៀបដើម្បីទទួលបានកាត MasterCard និង Visa និងឯកសារសំខាន់ដើម្បីទទួលបានកាតទាំងនោះ។

ដូចដែល Sabay បានប្រាប់ពីក្នុងអត្ថបទមុនដូច្នោះដែរ MasterCard និង Visa គឺជាក្រុមហ៊ុន ២ ផ្សេងគ្នា ដែលមានប្រតិបត្តិការលើដំណើរការរបស់សាច់ប្រាក់នៅក្នុងគណនីធនាគារ។ ដូច្នេះហើយ ដើម្បីទទួលបាន MasterCard និង Visa គឺយើងត្រូវមានគណនីធនាគារមួយជាមុនសិន។

តាមបុគ្គលិកធនាគារមួយរូបប្រាប់ថា អ្នកចង់បើកគណនី (កុង) ធនាគារ ចាំបាច់ត្រូវតែមានឯកសារសម្គាល់ខ្លួនមកជាមួយ ដោយធនាគារក្នុងស្រុកភាគច្រើនយក អត្តសញ្ញាណប័ណ្ណ សម្រាប់ជនជាតិខ្មែរ និង លិខិតឆ្លងដែន សម្រាប់ជនបរទេស។ ការបើកគណនីធនាគារ ត្រូវការលុយដាក់តម្កល់ប្រមាណ ១០ ដុល្លារសម្រាប់គណនីសន្សំ (អាស្រ័យតាមធនាគារ) ដែលអាចដកដាក់លុយបានធម្មតា។

ក្រោយពេលបើកគណនីរួចរាល់ហើយ ទើបអាចស្នើសុំយក MasterCard និង Visa ពីខាងបុគ្គលិកធនាគារតែម្ដង។ ក្នុងដំណាក់កាលនេះ ពួកគេនឹងពន្យល់ពីគុណប្រយោជន៍ផ្សេងគ្នា របស់កាតទាំង ២ នោះ ដែលអាចខុសគ្នាទៅតាមធនាគារមួយៗ។ នៅពេលដែលអ្នកស្នើសុំ MasterCard និង Visa បានជោគជ័យ អ្នកត្រូវបង់ថ្លៃសេវាកម្ម ៥ ដុល្លារជារៀងរាល់ឆ្នាំ សម្រាប់កាតដែលភ្ជាប់ MasterCard និង Visa ប្រភេទBasic។

បញ្ជាក់ថា៖ Visa ចែកចេញជា ៣ កម្រិត៖ Basic, Signature និង Infinite។ ធនាគារនៅក្នុងស្រុកយើងមិនទាន់មានកាតប្រភេទ Visa Signature, Visa Infinite នៅឡើយទេ ដោយមានប្រើតែ Basic ដែលបែងចែកប្រភេទ (Normal, Platinum, Gold ជាដើម)។

ចំណែក MasterCard មានកាត ៣ កម្រិតដូចគ្នា ដែលមានពីថ្នាក់ទាបទៅខ្ពស់ ដូចជា Basic, World និង World Elite ។ ដូចគ្នាទៅនឹង Visa ដែរ កាតកម្រិតខ្ពស់ World និង World Elite មិនមានប្រើប្រាស់នៅក្នុងស្រុកយើងឡើយ។

លម្អិតពីភាពខុសគ្នា និងអត្ថប្រយោជន៍កាតទាំងពីរ Visa និង Master Card អាច ចុចទីនេះ

ដូច្នេះបើសរុបមក បើសិនជាអ្នកចង់បានកាតដែលមាន MasterCard និង Visa ភ្ជាប់មកជាមួយអ្នកត្រូវចំណាយប្រហែល ១៥ ដុល្លារ។

អ្វីដែលត្រូវចងចាំនោះ គឺគណនីដែលអ្នកបើកនោះគួរណាស់តែជាគណនីប្រាក់ដុល្លារ ព្រោះបើអ្នកចង់ប្រើលើការចំណាយលើអនឡាញតាម MasterCard និង Visa នោះការទូទាត់សឹងតែទាំងអស់លើពិភពលោក នឹងត្រូវគិតជាប្រាក់ ដុល្លារ ធ្វើឲ្យមិនខាតអត្រាប្ដូរប្រាក់ ព្រោះគណនីរបស់អ្នកជាគណនីដែលប្រើសាច់ប្រាក់ដូចគ្នាក្នុងការទូទាត់។

ចំណុចសំខាន់មួយទៀត គឺការទទួលបានកាត។ ជាធម្មតាបន្ទាប់ពីអ្នកបើកគណនីធនាគារ និងស្នើសុំ MasterCard ឬ Visa បានជោគជ័យហើយនោះ អ្នកអាចនឹងទទួលបានកាតធនាគារ ដែលមានជាប់សញ្ញា MasterCard ឬ Visa ក្នុងរយៈពេល ៧ ថ្ងៃ ឬតាមការប្រាប់ផ្ទាល់របស់បុគ្គលិក។

បើសិនជាអ្នកមិនទទួលបានកាតក្រោយ ៧ ថ្ងៃ និងតាមការប្រាប់របស់បុគ្គលិកទេនោះ អ្នកគួរប្រញាប់មកធនាគារ ដែលអ្នកបើកគណនីនោះ ហើយប្រាប់មកបុគ្គលិកធនាគារជាបន្ទាន់៕

ចុចអាន៖

អត្ថបទ៖ ផាត សុវត្ថិ