កាន់ទូរសព្ទតម្លៃរាប់រយ ថតមិនស្អាត ទាល់មានបច្ចេកទេស

2018-06-14 01:59:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្មាតហ្វូនមានប្រើស្ទើរគ្រប់គ្នា ហើយយកតាមខ្លួនស្ទើររាល់ថ្ងៃ ខណៈសមត្ថភាពកាមេរ៉ាកាន់តែល្អទៅៗ ជាពិសេសលើម៉ូដែលទំនើបចុងក្រោយ ដូចជា iPhone X ឬ Pixel 2 XL ជាដើម។

ទិដ្ឋភាពស្រស់ស្អាតជាច្រើន បានផ្ដិតចេញពីស្មាតហ្វូន ត្បិតមិនដល់ DSLR តែអាចទទួលយកបាន។ ហើយនេះ ជាគន្លឹះជំនួយ អាចសាកប្រើលើរូបថតបន្ទាប់អ្នកបាន។

បច្ចេកទេស

១) ចូលឲ្យជិត កុំពង្រីក

បើអាច ចូលឲ្យជិតនឹង Subject ជៀសជាងពង្រីកពេលថត។ ទោះម៉ូដែលស្មាតហ្វូនថ្មីៗ មានទំហំ Megapixels ធំ ក៏រូបភាពបង្ហាញមិនច្បាស់ដែរ ពេលថតពង្រីកជាមួយស្មាតហ្វូន។

២) ប្រើ Portrait mode

ម៉ូដែលស្មាតហ្វូនថ្មីៗមានមុខងារ Portrait mode ដែលអាចផ្ដល់ផ្ទៃខាងក្រោយព្រាល ជាមួយ Subject ផ្ទៃខាងមុខច្បាស់ស្អាត។

៣) កំណត់កម្រិតពន្លឺ

ពេលចុចលើអេក្រង់ ខណៈពេលប្រើ Photo mode មានមុខងារអាចផ្លាស់ប្ដូរកម្រិតពន្លឺបានដោយខ្លួនឯង ជួយសម្រួលតុល្យភាពដល់ទិដ្ឋភាពបានយ៉ាងល្អ។

៤) កំណត់ Focus

ពេល Object នៅកៀកនឹង Lens គួរចុចលើអេក្រង់ កំណត់ Focus ដោយខ្លួនឯង ដើម្បីប្រាកដថាទីតាំងបង្ហាញច្បាស់ល្អ។

៥) ប្ដូរទីតាំងតួថតទៅចំណុចមានពន្លឺ

ពេលថតរូបមនុស្ស គួរប្ដូរទីតាំងពួកគាត់ទៅរកកន្លែងមានពន្លឺច្រើនបំផុត ក្នុងទីតាំងងងឹត ដើម្បីបង្កើតការចាប់អារម្មណ៍។

៦) មិនគួរថតរូបសរ ខ្មៅ

ពេលថតរូបសរ ខ្មៅ Lens របស់ស្មាតហ្វូន អាចមានបញ្ហាក្នុងដំណើរការថត ព្រោះ Sensor ភាគច្រើនក្នុងស្មាតហ្វូនពុំមានសមត្ថភាពនេះទេ។ នេះអាចផ្ដល់រូបភាព ដែលទិដ្ឋភាពពពកមិនបង្ហាញ ឬផ្នែកខ្មៅក្នុងរូបភាពដុតខ្លាំងពេក។

៧) ប្រើ HDR Mode

ចំពោះមុខងារ HDR (Hight Dynamic Range) នេះ ស្មាតហ្វូននឹងថតទិដ្ឋភាពបី រួចដាក់ត្រួតបង្រួមចូលគ្នា ដោយប្រើកម្រិតពន្លឺខុសគ្នាៗ។

៨) គ្រប់គ្រង Flash

Flash ជួយបន្ថែមពន្លឺដល់ Subject ក្នុងការថតពេលយប់ តែក៏ជាចំណុចរំខានមួយដែរ។ រូបមន្តល្អមួយ ពេល Object នៅជិតគួរប្រើ Flash តែបើនៅឆ្ងាយ Flash អាចរំខានដល់គុណភាពរូបភាព។

៩) ប្រើមុខងារ Burst mode

បើចង់ថត Object មានសកម្មភាពលឿន អាចប្រើមុខងារ Burst mode បាន។ លើស្មាតហ្វូនភាគច្រើន អាចបើកដំណើរការបានដោយចុចឲ្យជាប់លើប៊ូតុងថតរូប ហើយបណ្ដុំរូបភាពនឹងចាប់យក អាស្រ័យលើរយៈពេលចុច។

១០) ប្រើ Exposure រយៈពេលយូរ

ស្មាតហ្វូនមួយចំនួនដូចជា iPhone មានមុខងារ Exposure រយៈពេលយូរ ដោយអូសចុះក្រោម បើបើក Live photo ក្នុងកម្មវិធី Photo នឹងឃើញ ដែលអាចបង្កើតជាទឹកព្រាល ឬឆ្នូតៗ។

១១) គ្រប់គ្រង Camera settings

មានកម្មវិធីច្រើន អាចឲ្យអ្នកគ្រប់គ្រង Camera settings លើស្មាតហ្វូន។ លើ iOS មានមួយដែរ Procam អាចគ្រប់គ្រងស្ទើរតែដូចនឹង DSLR។

១២) ភាពទាញរីករបស់ Lens

Lens ស្មាតហ្វូនមានភាពទាញរីកនៅគែមរូបភាព អាចសម្គាល់បាន ពេលថតរូបមនុស្សបញ្ឈរ (Portrait orientation) ពេញទិដ្ឋភាព។ នេះអាចសម្រួលបាន ដោយថយក្រោយមួយ ឬពីរជំហាន ដើម្បីកុំឲ្យមនុស្សបំពេញ Frame ទាំងស្រុង ឬកាន់ស្មាតហ្វូនថតផ្ដេកវិញ។

ការចាប់ប្លង់

បច្ចេកទេសចាប់ប្លង់ មានច្រើន អាចជ្រើសរើសសាកល្បងលើស្មាតហ្វូនបាន។

១) Rule of thirds

នេះជួយកំណត់ផ្នែកសំខាន់ Subject ឲ្យស្ថិតនៅចំណុចប្រសព្វ នៃបន្ទាត់គំនូសបង្ហាញលើអេក្រង់។

២) Straight horizon

នេះល្អពេលថតទិដ្ឋភាព សមុទ្រ ឬផ្លូវ ដោយបង្ហាញប្លង់ទិដ្ឋភាពឆ្ពោះទៅទីតាំងណាមួយ ក្នុងលំហរទំហំធំ។

៣) ប្រើ Landscape orientation

គួរថតរូបផ្ដេក ចំពោះទិដ្ឋភាពទំហំធំ ដើម្បីចាប់បានអត្ថន័យបន្ថែមបានច្រើន។

៤) សាមញ្ញ

ពណ៌ ឬវត្ថុច្រើនពេកក្នុងរូបភាព អាចផ្ដល់ផលអាក្រក់ដល់ទិដ្ឋភាព។ គួរផ្ដោតលើផ្នែកសំខាន់ជាចម្បង។ បើចង់ថតបញ្ឈរ ផ្ដោតលើមនុស្ស ឬវត្ថុមួយៗ (ប្រើ Portrait mode)។ បើចង់ថតផ្ដេក គួរស្វែងរកទីធ្លាធំទូលាយ។

៥) ថតសរ ខ្មៅ

សាមញ្ញ បើថតទិដ្ឋភាពមានពណ៌ច្រើនពេក យល់ល្អគួរឲ្យកាមេរ៉ាថតសរ ខ្មៅ។

៦) ផ្លាស់ប្ដូរទស្សនវិស័យ

អាចបង្កើនការចាប់អារម្មណ៍លើរូបភាព ដោយផ្លាស់ប្ដូរប្លង់មើល កាន់កាមេរ៉ាងើយឡើងលើ ឬចុះក្រោមពេលតម្រង់ថត Subject។

៧) ផ្លាស់ប្ដូរទស្សនវិស័យតិចតួច

អាចផ្លាស់ប្ដូរទ្រង់ទ្រាយរូបភាព ថតរូបបីដងក្នុងទម្រង់ មុំខុសៗគ្នា ដើម្បីងាយស្រួលជ្រើសរើសមួយណាល្អជាងគេ។

៨) មុខងារ Panorama

ស្មាតហ្វូនភាគច្រើន មានមុខងារ Panorama ជួយថតទិដ្ឋភាពបានធំពេញវែងល្អ។ នេះល្អ ពេលថតរូបឆ្នេរសមុទ្រ ឬភ្នំ។

ការកាត់ត

ស្មាតហ្វូន ផលិតបានរូបភាពល្អៗ តែបូកផ្សំនឹងការកែច្នៃបន្តិចបន្តួច ជំរុញសម្រស់រូបថតកាន់តែស្អាត។

១) ប្រើ Filter

នេះអាចកែប្រែពណ៌រូបភាព ដោយមុខងារនេះមានស្រាប់លើកម្មវិធី Photo របស់ស្មាតហ្វូនភាគច្រើន។

២) ប្រើកម្មវិធីកាត់ត

កម្មវិធី Snapseed ឬ Lightroom អាចជួយបន្ថែមសម្រស់រូបភាពនីមួយៗបានយ៉ាងល្អ។

៣) ថតប្រើទម្រង់ RAW

រូបភាព RAW ជារូបភាពទម្រង់ដើម។ ពេលថតរូបភាពធម្មតា Device នឹងបន្ថែមពណ៌មួយចំនួនដោយស្វ័យប្រវត្តិ។ ថតទម្រង់ RAW គ្រប់យ៉ាងអាចកែប្រែបានពេញលេញដោយខ្លួនឯង។ នេះមានជម្រើសកម្មវិធីដូចជា Procam ឬ Lightroom៕