ណាហ្គាពេញជើងល្អណាស់ ប៉ះ បឹងកេតចុងសប្ដាហ៍នេះ

2018-06-21 03:16:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ណាហ្គាវើល នឹងត្រូវជួបក្រុមខ្លាំងដូចគ្នា បឹងកេតនៅថ្ងៃអាទិត្យទី២៤ ខែមិថុនា ឆ្នាំ២០១៨ សម្រាប់ជំនួបសប្ដាហ៍ទី១១ នៃលីគកំពូលកម្ពុជា វេលាម៉ោង ៦:៣០ នាទីល្ងាចនៅពហុកីឡដ្ឋានជាតិ។

លោក មាស ចាន់ណា

លោក មាស ចាន់ណា គ្រូបង្វឹកណាហ្គាវើលបានឲ្យដឹងថា ណាហ្គាវើលគ្មានបញ្ហារបួសកីឡាករម្នាក់សោះឡើយ។ ប៉ុន្តែពួកគេហាក់មានការហត់នឿយខ្លះ ក្រោយធ្វើការងារខ្លាំងកាលពីសប្ដាហ៍មុន។ យ៉ាងណាកីឡាករទាំងអស់បានប្រមូលកម្លាំងមកវិញបានគ្រប់គ្រាន់ ពោលគឺមិនមានបញ្ហាអ្វីនោះទេ។

លោកបន្ថែមថា ការប៉ះបឹងកេតចុងសប្ដាហ៍នេះ ណាហ្គាវើល នឹងលេងរបៀបថ្មីមួយ ដែលខុសពីការប្រកួតកន្លងមក ប៉ុន្តែលោកក៏មិនអាចបញ្ជាក់ឲ្យបានក្បោះក្បាយថា របៀបលេងថ្មីនោះយ៉ាងណានោះទេ។ ចំណែកចំណុចខ្លាំងឬខ្សោយរបស់បឹងកេតលោកក៏បានដឹងដូចគ្នា គ្រាន់តែមិនអាចនិយាយបានប៉ុណ្ណោះ។

ណាហ្គាវើល កំពុងស្ថិតនៅកំពូលតារាងលីគកំពូលកម្ពុជា ដោយមាន ២៥ ពិន្ទុលើស បឹងកេត លេខ ២ ត្រឹម ១ ពិន្ទុប៉ុណ្ណោះ ហើយការប្រកួតបញ្ចប់ជើងទី១នេះ អាចនិយាយបានថា គឺជាការកាត់សេចក្ដីក្នុងការកាន់កាប់កំពូលតារាងផងដែរ៕