ស្ងាត់ៗ អតីតតារាសម្ដែងម្នាក់ ក្លាយជាមេធាវី

2018-06-22 02:35:42
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីផ្អាកសិល្បៈមួយរយៈ លោក វ័ន្ត លាងហៃ អតីតតារាសម្ដែងស្រស់សង្ហាដែលកន្លងមកលោកតែបង្ហាញមុខភាគច្រើនក្នុង MV ឲ្យផលិតកម្មរស្មីហង្សមាស ថ្មីៗនេះតារាមានកំណើតមកពីខេត្ត កំពង់ឆ្នាំងរូបនេះបានក្លាយជាមេធាវីហើយ ។

លោក វ័ន្ត លាងហៃបានស្បថចូលធ្វើជាមេធាវីកាលដើមសប្ដាហ៍កន្លងទៅនេះ បន្ទាប់ពីតារាស្ដែងរូបលោកបានបំពេញលក្ខណៈតាមច្បាប់ ស្ដីពីលក្ខន្តិកៈមេធាវីនៃព្រះរាជាអាណាចក្រកម្ពុជា។ លាងហៃ បានឲ្យដឹងថា ខ្លួនបានធ្វើការងារទាក់ទងនឹងវិស័យច្បាប់ជាច្រើនឆ្នាំមកហើយ បន្ទាប់ពីបានបញ្ចប់ការសិក្សាបរិញ្ញាបត្រច្បាប់កាលឆ្នាំ ២០១៣ មក។

អាជីពជាមេធាវីនេះ លាងហៃ ប្រាប់ថា គឺជាបំណងរបស់ខ្លួន និងក្រុមគ្រួសារតាំងពីសម្រេចចិត្តចូលរៀនមហាវិទ្យាល័យដំបូងមកម្ល៉េះ។ បន្ទាប់ពីស្បថរួច លោកនឹងត្រូវធ្វើកម្មសិក្សារយៈពេល១ឆ្នាំ ទើបក្លាយជាមេធាវីពេញសិទ្ធិ។

លោក វ័ន្ត លាងហៃ គឺតារាសម្ដែងស្រង់សង្ហាម្នាក់ដែលកន្លងមកតារារូបនេះភាគច្រើនសម្ដែង MV និងការថតរាំលេងកម្មវិធីចូលឆ្នាំប៉ុណ្ណោះ។ ការមិនសូវមានមុខលើវិថីសិល្បៈច្រើនបែបនេះ មិនមែនមិនមានអ្នកដឹកនាំសម្ដែង ហៅលោកទៅសម្ដែងឡើយ តារាវ័យ៣០ឆ្នាំរូបនេះថា គឺស្ទើរគ្រប់ផលិតកម្មបានហៅលោក ប៉ុន្តែខ្លួនមិនមានពេលក្នុងការចុះថតច្រើនថ្ងៃ ព្រោះជាប់ធ្វើការ។

បន្ទាប់ពីក្លាយជាមេធាវីដូចការប៉ងប្រាថ្នាបែបនេះ នឹងធ្វើឲ្យលោកកាន់តែឃ្លាតឆ្ងាយពីសិល្បៈកាន់តែខ្លាំង។ លោក វ័ន្ត លាងហៃ ថា ខ្លួនប្រហែលជាឈប់ពីសិល្បៈទាំងស្រុងតែម្ដង ដើម្បីទុកពេលធ្វើការងារជាមេធាវីនេះ៕

អត្ថបទៈ ស៊ុនហួត

រូបភាព៖ វ័ន្ត លាងហៃ