មកចាប់អារម្មណ៍រឿងសំខាន់៦កើតក្នុងលីគកម្ពុជា២០១៨ ចប់ជើងទី១

2018-06-27 00:15:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតជើងឯកលីគកំពូលកម្ពុជារដូវកាលឆ្នាំ២០១៨បានចប់ជើងទី១ហើយ បន្ទាប់ពីដំណើរការប្រកួតអស់១១សប្តាហ៍។ ការប្រកួតជើងឯកជាតិរដូវកាលនេះមានភាពស្វិតស្វាញខ្លាំងដោយក្រុមនីមួយៗសុទ្ធតែរៀបចំក្រុមបានល្អ សូម្បីសមាជិកថ្មីក៏ឡើងជើងខ្លាំងគួរឲ្យកត់សំគាល់។ ១១សប្តាហ៍កន្លងទៅនេះមានរឿងរ៉ាវគួរឲ្យចាប់អារម្មណ៍មួយចំនួនមុនពេលជើងទី២ចាប់ផ្តើមនៅសប្តាហ៍ក្រោយ។

ការប្រកួតរវាងបឹងកេត និងណាហ្គាវើល

**១. គ្រាប់បាល់**

សរុបការប្រកួតទាំងអស់ក្នុងជើងទី១នេះមានគ្រាប់បាល់ទម្លាយសំណាញ់ទីគ្នាទៅវិញទៅមករហូត២៣៦គ្រាប់។ ក្នុងចំណោមគ្រាប់បាល់ទាំងនេះកើតឡើង៖

សប្តាហ៍ទី១ចំនួន១៩គ្រាប់
សប្តាហ៍ទី២ចំនួន១៧គ្រាប់
សប្ដាហ៍ទី៣ចំនួន២៣គ្រាប់
សប្ដាហ៍ទី៤ចំនួន២២គ្រាប់
សប្តាហ៍ទី៥ចំនួន២៥គ្រាប់
សប្តាហ៍ទី៦ចំនួន២១គ្រាប់
សប្តាហ៍ទី៧ចំនួន១៥គ្រាប់
សប្តាហ៍ទី៨ចំនួន១៦គ្រាប់
សប្តាហ៍ទី៩ចំនួន២៧គ្រាប់
សប្តាហ៍ទី១០ចំនួន២៣គ្រាប់
សប្តាហ៍ទី១១ចំនួន២៨គ្រាប់

២. កីឡាកររកបានគ្រាប់បាល់ច្រើន

ជើងទី១កន្លងផុតទៅ កីឡាករបរទេស៨នាក់ស្ថិតក្នុងចំណោមកីឡាករ១០នាក់ដែលរកបានគ្រាប់បាល់ច្រើនជាងគេ។

ខ្សែប្រយុទ្ធអាស៊ីអឺរ៉ុប Privat ស្ថិតនៅលើគេដោយរកបាន១៦គ្រាប់
សមាជិកណាហ្គាវើល Bisan Georgeរកបាន១៣គ្រាប់
សមាជិកបឹងកេត Oiboh Julius និង Maycon Calijuri រកបាន៩គ្រាប់ដូចគ្នា
កីឡាករវិសាខា Choe Myong-ho និងកីឡាករស្វាយរៀង Trevin Caesar រកបាន៨គ្រាប់ដូចគ្នា
កីឡាករ Dzama Bata របស់សូទីលូអង្គរ Shane Booysen របស់ស្វាយរៀង និង Matew Osa របស់ណាហ្គាវើលរកបាន៧គ្រាប់ដូចគ្នា
កីឡាករកម្ពុជារបស់វិសាខា សាន គឹមហេង និងសមាជិកក្រសួងការពារជាតិ រ៉ឹង ប៊ុនហៀងរកបាន៦គ្រាប់ម្នាក់

៣. ការប្រកួតមានគ្រាប់បាល់ច្រើន

ការប្រកួតដែលមានគ្រាប់បាល់ច្រើនជាងគេគឺណាហ្គាវើលឈ្នះវេស្ទើនភ្នំពេញដោយលទ្ធផល ១០-១។ ក្រសួងការពារជាតិឈ្នះវេស្ទើនភ្នំពេញ ៨-០ ក្នុងសប្តាហ៍ទី៤ និងព្រះខ័នរាជស្វាយរៀងក៏ឈ្នះវេស្ទើនភ្នំពេញ ៨-០ ក្នុងសប្តាហ៍ទី១១ ដូច្នេះក្រសួងការពារជាតិ និងព្រះខ័នរាជស្វាយរៀងធ្វើបាន Clean Sheet ដែលមានគ្រាប់បាល់ស៊ុតចូលគូប្រកួតច្រើនបំផុត។

៤. ក្រុមបរាជ័យទាំង១១ប្រកួត

ការប្រកួត១១សប្តាហ៍នៃជើងទី១កន្លងទៅ វេស្ទើនភ្នំពេញជាក្រុមដែលយ៉ាប់ជាងគេគឺមិនធ្លាប់ឈ្នះ និងមិនធ្លាប់ស្មើ ប៉ុន្តែចាញ់ទាំង១១ប្រកួតដែលកំពុងស្ថិតនៅបាតតារាងជាតំបន់កាត់ទៅលេងពានលំដាប់ទី២។

ក្រុមវេស្ទើនភ្នំពេញ

៥. ការពិន័យ

ការពិន័យបានកើតឡើងចំនួនក្នុងការប្រកួតជើងទី១កន្លងទៅនេះ។ ការពិន័យគួរឲ្យកត់សំគាល់ដូចជាគ្រូបង្គោលក្រសួងការពារជាតិ ភា សុភ័ត្ត្រា ត្រូវបានពិន័យមិនឲ្យចូលរួម៣ប្រកួត។ ការប៉ះទង្គិចគ្នារវាងក្រសួងការពារជាតិ និងព្រះខ័នរាជស្វាយរៀងត្រូវបានសហព័ន្ធបាល់ទាត់កម្ពុជាដាក់ពិន័យកីឡាករស្វាយរៀង៨នាក់ ៧នាក់ និងគ្រូជំនួយម្នាក់។ កីឡាករស្វាយរៀង៥នាក់ ត្រូវជាប់ពិន័យ៣ខែ មិនឱ្យចូលលេងបាល់ឡើយ។ ចំណែកក្រសួងការពារជាតិបានពិន័យបញ្ចប់កុងត្រាកូរ៉េខាងត្បូង Song Chi-hun និងពិន័យកាត់ប្រាក់ខែ Yudai Ogawa ចំនួន២ខែ។

៦. ការដោះដូរកីឡាករ

គិតរហូតដល់ពេលនេះក្លឹបលីគកម្ពុជាមានការដោះដូរ និងនាំចូលសមាជិកថ្មីមួយចំនួនហើយដើម្បីត្រៀមខ្លួនសម្រាប់ជើងទី២។ សមាជិកក្លឹបថ្មី វិសាខា បាននាំចូលសមាជិក២នាក់ដែលសុទ្ធតែមានបទពិសោធច្រើនគឺ សុខ សុវណ្ណ និង កែវ សុខផេង។ ក្លឹបអ្នកមានភ្នំពេញក្រោនបាននាំចូលសមាជិកថ្មីសញ្ជាតិប្រេស៊ីល Valci Teixeira Júnior។ ចំពោះក្លឹបការពារតំណែងជើងឯកឆ្នាំចាស់ បឹងកេត ក៏ទើបបន្ថែមខ្សែប្រយុទ្ធឆ្នើម ចាន់ វឌ្ឍនាកា និងបញ្ចូលយុវជនជាច្រើននាក់ចូលក្រុមធំ ប៉ុន្តែចប់ជើងទី២ភ្លាម អ្នកចាំទីបទពិសោធច្រើន ស៊ូ យ៉ាទីត្រូវបានប្រកាសចាកចេញពីបឹងកេត។