វិធីទាំង ៨ យ៉ាងត្រូវដឹងពេលបើកឡានកាត់ផ្លូវលិចទឹក

2018-06-26 10:13:31
ចំនួនមតិ 0 | ចំនួនចែករំលែក 0

ចន្លោះមិនឃើញ

រដូវវស្សាឈានចូលមកដល់ ភ្លៀងធ្លាក់ស្ទើរពាសពេញផ្ទៃប្រទេស នាំឲ្យអ្នកប្រើប្រាស់ផ្លូវភាគច្រើនងាកមកប្រើប្រាស់រថយន្តសម្រាប់ទៅកន្លែងនានា ទោះបីជាខ្លួនមាន កង់ ឬម៉ូតូក៏ដោយ ដើម្បីការពារពីការទទឹកពេលមានភ្លៀងធ្លាក់។

ការប្រើប្រាស់រថយន្ត ពិតជាមានគុណសម្បត្តិច្រើនមែនក្នុងរដូវវស្សានេះ ក៏ប៉ុន្តែ វាក៏មានគុណវិបត្តិផងដែរ ព្រោះបើពេលភ្លៀងធ្លាក់ខ្លាំង លូហូរមិនទាន់នោះ អាចឲ្យមានការលេចផ្លូវខ្លាំង ហើយពេលរថយន្តបើកបរកាត់ អាចបណ្ដាលឲ្យរថយន្តរលត់ មិនអាចទៅណាបាន ហើយក៏អស់ថ្លៃជួសជុលច្រើនផងដែរ។

យ៉ាងណាមិញ វាក៏មានវីធីការពារ ដែលអ្នកបើកបររថយន្តកាត់ផ្លូវលិចទឹក អាចអនុវត្តបានដើម្បីបន្ថយហានិភ័យនៃការរលត់រថយន្ត នៅក្នុងទឹកជំនន់តាមដងផ្លូវនោះផងដែរ។ Sabay សូមនាំជូននូវវិធី ៨ យ៉ាងដែលអ្នកបើកបរគួរធ្វើនៅពេលជិះតាមផ្លូវដែលលិចទឹកម្ដងៗ៖

១. ព្យាយាមរកផ្លូវវាង

វិធីល្អបំផុតគឺ រកផ្លូវផ្សេង ដែលមិនលិចទឹក។ អ្នកអាចប្រហែលបើកបរឆ្ងាយជាងធម្មតា ២ ទៅ ៣ គីឡូម៉ែត្រ ហើយចំណាយពេលយូរជាងមុនប្រហែលកន្លះម៉ោង តែវានឹងបញ្ចៀសហានិភ័យក្នុងការរលត់រថយន្តរបស់អ្នក មិនឲ្យអ្នកត្រូវជាប់នៅក្នុងទឹក មិនខាតពេលហៅឡានស្ទូច ហើយមិនចំណាយលុយរាប់រយដុុល្លារក្នុងការជួសជុលទៀតផង។

២. ត្រូវដឹងពីជម្រៅទឹក

បើអស់ផ្លូវវាងហើយ តែអ្នកត្រូវតែបន្តដំណើរទៅមុខទៀត អ្នកត្រូវដឹងពីកម្ពស់ទឹកដែលលិចនោះ។ វិធីល្អ គឺអ្នកអាចសង្កេតមើលរថយន្តនៅខាងមុខបានថាតើកម្ពស់ទឹកនោះជ្រៅកម្រិតណា តើវាអាចចូលក្នុងរថយន្តទេពេលបើកបរ ហើយលិចបំពង់ស៊ីម៉ាំងរថយន្ត ឬអត់។ បើអ្នកជិះរថយន្តប្រភេទ តួខ្ពស់ SUV អ្នកប្រហែលជាមិនសូវបារម្ភពីរឿងនេះទេ តែបើអ្នកបើកបររថយន្តទាបប្រភេទ Sedan វីញ កម្ពស់ទឹកលើផ្លូវមិនអាចលើសពី ៣០ សង់ទីម៉ែត្រឡើយ ព្រោះវាអាចឲ្យទឹកចូលក្នុងរថយន្ត និងម៉ាស៊ីនបាន បណ្ដាលឲ្យរលត់នៅក្នុងទឹកជាយថាហេតុ។

៣. ឲ្យរថយន្តផ្សេងទៅមុន

នេះជារឿងមួយដែលចាំបាច់ផងដែរ ព្រោះថាបើជិះទន្ទឹមគ្នា ទឹកអាចសាចចូលមកក្នុងរថយន្តរបស់យើងបាន ឬក៏វាអាចចូលក្នុងម៉ាស៊ីនពេលរលកទឹក កើនឡើងតាមល្បឿនរថយន្ត ដែលបើកក្បែរយើង។ បើសិនជារថយន្តគេ ជារថយន្តធំទៀត វារឺតតែបង្កបញ្ហាធំជាងមុន ពេលអ្នកបើកបរនៅក្បែរវា។

៤. ព្យាយាមបើកកណ្ដាលទ្រូងផ្លូវ

នៅលើដងផ្លូវ ផ្នែកខាងចិញ្ចើមទាំងសងខាង ភាគច្រើនជាកន្លែងដែលទឹកដក់ជ្រៅ និងជាមាត់លូក៏ថាបាន។ ដូច្នេះ អ្នកបើកបរទាំងឡាយគួរព្យាយាមបើកបរមកកណ្ដាលទ្រូងផ្លូវ ដែលវាលិចទឹកមិនសូវជ្រៅ ឬក៏មិនលិចផងក៏ថាបាន។

៥. កុំបើកលឿនពេក

ការបើកបរក្នុងទឹក ល្បឿនលឿនមិនត្រឹមតែធ្វើឲ្យសាចទឹកដល់អ្នកដំណើរដទៃទេ ប៉ុន្តែវាក៏ធ្វើឲ្យកម្ពស់ទឹកខាងមុខកើនឡើងអាចជ្រាបចូលក្នុងម៉ាស៊ីនរថយន្ត និងធ្វើឲ្យក្រឡាកង់រថយន្តមិនខាំ ស៊ីគ្នានឹងផ្លូវទៀតផង។ បើសិនជាអ្នកជ្រុលបើកលឿន ហើយមានអារម្មណ៍ថាក្រឡាកង់រថយន្តមិនជាប់លើផ្លូវ វិធីល្អនោះគឺកុំជាន់ហ្រ្វាំង ត្រូវដកជើងចេញពីហ៊្គែរ ហើយកាន់ចង្កូតឲ្យត្រង់ សឹមកង់ខាំជាមួយថ្នល់ហើយ ចាំប្រើហ្វ្រាំងវិញ។

៦. កុំឈប់

ថ្វីត្បិតតែអ្នកត្រូវបើកយឺតៗមែន តែមិនមែនមានន័យថាអ្នកត្រូវឈប់នៅក្នុងទឹកជ្រៅនោះទេ។ ការឈប់នៅក្នុងទឹកជ្រៅ អាចធ្វើឲ្យទឹកចូលក្នុងបំពង់ស៊ីម៉ាំងបាន ជាហេតុធ្វើឲ្យម៉ាស៊ីនរលត់ខូច និងអស់ថ្លៃជួសជុលច្រើន។ វិធីល្អបំផុត គឺជើងរបស់អ្នកគួរនៅជាប់ហ៊្គែរ ហើយជាន់តិចៗជានិច្ចដើម្បីឲ្យម៉ាស៊ីនបញ្ចេញផ្សែងតាមបំពង់ស៊ីម៉ាំង រារាំងទឹកមិនឲ្យចូលម៉ាស៊ីន។

៧. សម្ងួតហ្រ្វាំងរបស់អ្នក

ពេលអ្នកបើកមកដល់ផ្លូវដែលស្ងួតហើយ អ្នកអាចធ្វើការសម្ងួតហ្វ្រាំងរថយន្តអ្នកបាន ដោយជិះហើយជាន់វា ២ ទៅ ៣ ដងឲ្យជាប់ ដើម្បីប្រាកដថា ហ្វ្រាំងរថយន្តអ្នកដំណើរការធម្មតាវិញ។

៨. ប្រការមិនគួរធ្វើពេលរថយន្តរលត់ក្នុងទឹក

បើសិនជារថយន្តអ្នករលត់នៅក្នុងទឹកនោះ អ្នកមិនត្រូវបើកទ្វារចេញឡើយ ហើយក៏មិនគួរបញ្ឆេះម៉ាស៊ីនរថយន្តឡើងវិញដែរ។ បើសិនជាអ្នកបើកទ្វារ វាអាចឲ្យទឹកខាងក្រៅហូរចូលមកក្នុងរថយន្តពេញទំហឹង ហើយការប្រឹងបញ្ឆេះរថយន្ត ក៏អាចធ្វើឲ្យរថយន្តទាំងមូលខូចប្រព័ន្ធភ្លើង និងម៉ាស៊ីនឈ្លក់ទឹកផងដែរ ដែលពួកវាសុទ្ធតែជាការចំណាយដ៏ច្រើនទាំងអស់។ វិធីដែលល្អគឺតេហៅរកជំនួយ ឬចាំដល់ទឹកស្រកខ្លាំងសឹមចេញក្រៅរថយន្ត និងរកជំនួយ។

ចុចអាន៖

ប្រភព៖ WhatCar? ប្រែសម្រួល៖ ផាត សុវត្ថិ