Modric កីឡាករសក្ដិសមឈ្នះ Ballon d'Or ជាង Ronaldo ឬ Messi

2018-07-13 01:41:01
ចំនួនមតិ 0 | ចំនួនចែករំលែក 0

ចន្លោះមិនឃើញ

Luka Modric ប្រធានក្រុមជម្រើសជាតិក្រូអាត កំពុងទទួលបានការចាប់អារម្មណ៍ខ្លាំងមែនទែន បន្ទាប់ពីរូបគេអាចជួយក្រុមប្រទេសតូចមួយនេះ អាចឡើងដល់វគ្គផ្ដាច់ព្រ័ត្រ World Cup បាន។

នៅវគ្គផ្ដាច់ព្រ័ត្រ ក្រូអាតនឹងត្រូវប៉ះជាមួយបារាំង ដើម្បីកាត់សេចក្ដីយកម្ចាស់ពានរង្វាន់ World Cup 2018 ។ អ្នកវិភាគជាច្រើនបានគិតថា Modric មិនចាំបាច់ឈ្នះ World Cup ឆ្នាំនេះទេ ក៏រូបគេបានឆក់យកបេះដូងអ្នកស្រលាញ់វិស័យបាល់ទាត់ពិតប្រាកដបានបាត់ទៅហើយ ចំពោះទម្រង់លេងរបស់គេកន្លងមកនេះ។ ដូច្នេះ Ballon d'Or ឆ្នាំនេះ សក្ដិសមបំផុតសម្រាប់កីឡាករដែលឈ្នះ Man Of The Match សឹងរាល់ប្រកួតឱ្យក្រូអាតម្នាក់នេះ។

ចុះបើនិយាយអីចឹង តើ Cristiano Ronaldo និង Lionel Messi វិញ ទុកនៅឯណា? កីឡាករ២នាក់នេះ បានផ្លាស់ប្ដូរគ្នាយកពានរង្វាន់កីឡាករឆ្នើមខាងលើនេះ ម្នាក់ម្ដង តាំងពីឆ្នាំ២០០៨មក។ ការផ្លាស់ប្ដូរនេះ គឺសក្ដិសម ព្រោះថាប៉ុន្មានឆ្នាំកន្លងមក ពួកគេពិតជាធ្វើបានល្អមែន។ ប៉ុន្តែឆ្នាំនេះ គឺខុសពីឆ្នាំមុននោះ Modric បានបង្ហាញថា រូបគេក៏ជាកីឡាករកំពូលម្នាក់ដែរ មិនមែនតែលេងនៅ Real Madrid ឡើយ។ ផ្ទុយទៅវិញ នៅ World Cup ឆ្នាំនេះ គ្រូបង្វឹកទាំងអស់ ដែលប៉ះក្រូអាត គឺញញើតកីឡាករពាក់អាវលេខ១០នេះឯង។

Messi ជាកីឡាកររកគ្រាប់បាល់បានច្រើនជាងគេនៅ La Liga និងជួយក្រុម FC Barcelona លើកពានលីគកំពូលអេស្ប៉ាញ និង Cup ផងដែរ។ ប៉ុន្តែបើងាកមកមើល នៅ World Cup ឆ្នាំនេះវិញ រូបគេមិនអាចជួយក្រុមបានច្រើនឡើយ ពោលគឺធ្លាក់ត្រឹមវគ្គ១៦ក្រុម ក្រោមថ្វីជើងរបស់បារាំង។ ខណៈដែលស្ថិតក្នុងពូលជាមួយក្រូអាតវិញ ពួកគេបានបរាជ័យក្នុងលទ្ធផល ៣-០ ឯណោះ។

ទៅមើល Ronaldo វិញ នៅ Real Madrid រូបគេជាកីឡាករឆ្នើមជួយក្រុមឈ្នះពាន UEFA Champions League បាន៣ឆ្នាំជាប់គ្នា និងជាអ្នករកគ្រាប់បាល់បានច្រើនជាងគេ។ ប៉ុន្តែនៅ World Cup ព័រទុយហ្គាល់ មានវាសនាមិនខុសពីអាហ្សង់ទីនទេ ធ្លាក់ត្រឹមវគ្គ១៦ក្រុមចុងក្រោយ ក្រោមថ្វីជើងរបស់អ៊ុយរុយហ្គាយ។

ចំណែកឯ Modric វិញ មានតែមជាងគេខ្លាំង ត្រង់ថាជួយក្រុម Real Madrid ឈ្នះពានរង្វាន់ UEFA Champions League បាន៣ឆ្នាំជាប់គ្នាហើយ ថែមទាំងជួយឱ្យក្រុមជម្រើសជាតិក្រូអាត បានឡើងដល់វគ្គផ្ដាច់ព្រ័ត្រថែមទៀត។ កីឡាករ ទាំងនៅ Real Madrid និងក្រុមជម្រើសជាតិក្រូអាតសុទ្ធតែសរសើរចំពោះទឹកចិត្តនិងទម្រង់លេងរបស់ Modric ទាំងអស់។

យ៉ាងណាមិញ នេះគ្រាន់តែជាការវិភាគប៉ុណ្ណោះ លទ្ធផលយ៉ាងណា ចាំមើលខាងក្រុមការងារ Ballon d'Or ជាអ្នកប្រកាស ព្រោះពួកគេសុទ្ធតែជាអ្នកកាសែតល្បីមានបទពិសោធច្រើនរបស់ប្រទេសបារាំង៕

អត្ថបទ៖ មុន្នីរម្យ