អ្នកស្ម័គ្រចិត្តជួយសង្គ្រោះក្មេង ចេញពីរូងភ្នំថាំហ្លួង នឹងទទួលបានរង្វាន់ពិសេសមួយ

2018-07-14 03:32:30
ចំនួនមតិ 0 | ចំនួនចែករំលែក 0

ចន្លោះមិនឃើញ

រដ្ឋាភិបាលថៃបានប្រកាសពីគម្រោងរបស់ខ្លួន ក្នុងការផ្ដល់រង្វាន់ «វិស្សមកាលរយៈពេលមួយសប្ដាហ៍» ចំពោះអ្នកស្ម័គ្រចិត្តជួយសង្គ្រោះបរទេស ដែលបានចូលរួមជួយសង្គ្រោះក្រុមបាល់ទាត់ជ្រូកព្រៃ ចេញពីរូងភ្នំថាំហ្លួង នៃខេត្តឈៀងរ៉ាយ ប្រទេសថៃ។

អ្នកមុជទឹកជនជាតិអង់គ្លេសទាំង៣ គឺលោក Richard William Stanton, លោក Robert Charles Harper និង លោក John Volanthen

គួររំលឹកថា នៅក្នុងប្រតិបត្តិការរយៈពេល ១៨ថ្ងៃ ក្រុមអ្នកស្ម័គ្រចិត្តមកពីបណ្ដាប្រទេសជាច្រើន បានពួតដៃគ្នាជួយសង្គ្រោះក្មេងទាំង ១៣នាក់ចេញពីរូងភ្នំខាងលើដោយជោគជ័យ។

អ្នកស្ម័គ្រចិត្តមួយចំនួនដែលកំពុងស្នាក់នៅខេត្តឈៀងរ៉ាយ ឬ ទីក្រុងបាងកក បានទទួលយករង្វាន់ពិសេសនោះរួចហើយ ប៉ុន្តែអ្នកដែលសម្រេចចិត្តធ្វើដំណើរត្រលប់ទៅប្រទេសរបស់ពួកគេភ្លាមៗ នៅតែអាចមកទទួលយករង្វាន់នេះបាន។ នេះបើតាមសម្ដីលោក Worawit Taechasupakul លេខាធិការក្រសួងទេសចរណ៍ និងកីឡា។

គួរបញ្ជាក់ឲ្យដឹងថា រង្វាន់ «វិស្សមកាលរយៈពេលមួយសប្ដាហ៍» នេះមានរួមបញ្ចូលទាំង សំបុត្រយន្តហោះប្រភេទ Business Class ទៅមកនៃអាកាសចរណ៍ថៃ , កន្លែងស្នាក់នៅ , ក្លាយជាសមាជិក Thailand Elite ដែលមានទិដ្ឋាការធ្វើដំណើររយៈពេល ៥ឆ្នាំ។

ការចូលជាសមាជិក Thailand Elite តាមធម្មតាមានតម្លៃ ៥២០ ០០០បាត ឬស្មើនឹង ១៥ ៦០០ដុល្លារ ដែលផ្ដល់អត្ថប្រយោជន៍ជាច្រើនដូចជា ទទួលបានសេវាព្រលានយន្តហោះ និងសេវាអន្តោប្រវេសន៍ពិសេស , សិទ្ធិចូលលេងក្លិបកីឡាវាយកូនគោល រួមទាំង ការបញ្ចុះតម្លៃលើស្ប៉ា និង ការទិញឥវ៉ាន់ជាដើម។

ទោះបីជាយ៉ាងណា លោក Yuthasak Supasorn អភិបាលខេត្តឈៀងរ៉ាយ បានប្រាប់ឲ្យដឹងថា ចំនួនអ្នកស្ម័គ្រចិត្តដែលទទួលបានរង្វាន់នេះ មិនទាន់ត្រូវបានកំណត់នៅឡើយទេ ហើយពួកគេនឹងពិភាក្សាលម្អិតបន្ថែមទៀត នៅក្នុងកិច្ចប្រជុំបន្ទាប់ នាចុងខែនេះតែម្ដង៕

ចុចអាន៖

ប្រភព៖ Coconut ប្រែសម្រួល៖ សេង ឡុង