មកដឹងរឿងរ៉ាវពិតៗ ចម្លែក គួរឲ្យចាប់អារម្មណ៍ទាំង៥ គ្រប់គ្នាធ្លាប់ឃើញតែក្នុងសៀវភៅព្រេងនិទាន
- 2018-07-15 08:19:57
- ចំនួនមតិ 0 | ចំនួនចែករំលែក 0
មកដឹងរឿងរ៉ាវពិតៗ ចម្លែក គួរឲ្យចាប់អារម្មណ៍ទាំង៥ គ្រប់គ្នាធ្លាប់ឃើញតែក្នុងសៀវភៅព្រេងនិទាន
ចន្លោះមិនឃើញ
ប្រិយមិត្តដែលចូលចិត្តអានសៀវភៅព្រេងនិទាន ដែលមានសាច់រឿងចម្លែកៗ អាថ៌កំបាំងគួរឲ្យព្រឺព្រួចមួយចំនួន ប្រាកដជាគិតថា រឿងរ៉ាវទាំងនោះ បែបគ្រាន់តែជាការប្រឌិតឡើង និងគ្មានរូបរាងពិតប្រាកដលើលោកនេះទេ។ ប៉ុន្តែជាក់ស្ដែង រឿងខ្លះពិតជា កើតមានឡើងមែន។
១. មនុស្សចចក
បើតាមរឿងព្រេងនិទាន រាជបុត្រមួយរូប បានត្រូវបណ្ដាសាធ្មប់ ហើយបានក្លាយខ្លួនទៅជាមនុស្សចចក។ ដើម្បីអាចដោះបណ្ដាសានោះបាន លោកត្រូវស្វែងរកស្នេហាពិតឲ្យឃើញ។
រឿងរ៉ាវមនុស្សចចកនេះ គឺមានពិតមែនលើពិភពលោកនេះ។ ក្នុងឆ្នាំ ១៥៣៧ នៅតំបន់ Tenerife នៃប្រទេសអេស្ប៉ាញ មានក្មេងប្រុសម្នាក់ឈ្មោះ Petrus កើតមកមានរូបរាងមិនប្រក្រតី ដោយរូបរាងកាយរបស់គេ ពោរពេញទៅដោយរោម។ ក្រុមគ្រួសាររបស់គេ បានគិតថា Petrus កើតជម្ងឺចម្លែកបែបនេះ ដោយសារតែត្រូវអំពើរបស់ព្រាយបិសាច។ អាយុបាន ១០ ឆ្នាំ ឪពុកម្ដាយ Petrus បានលក់គេទៅឲ្យក្រុមក្បួនរបស់ប្រទេសបារាំង។
ដោយស្ដេចបារាំងសង្កេតឃើញថា Petrus ជាក្មេងម្នាក់ដ៏ឆ្លាត ហើយថែមទាំងរៀនភាសាបារាំងឆាប់ចេះទៀតនោះ ព្រះអង្គបានបង្ហាត់បង្រៀនក្មេងមនុស្សចចកនេះដោយយកចិត្តទុកដាក់បំផុត។ ក្រោយព្រះអង្គចូលទិវង្គត ព្រះមហាក្សត្រិយានី Catherine de Médici បានគ្រប់គ្រង និងមើលថែលើ Petrus ទាំងស្រុង។ ក្រោយមក ព្រះមហាក្សត្រិយានីរូបនេះ បានរៀបការលោកទៅនឹងស្ត្រីវ័យក្មេងដ៏ស្រស់ស្អាតម្នាក់។ ក្រោយក្លាយជាប្ដីប្រពន្ធនឹងគ្នា ពួកគេទាំង២នាក់ទទួលបានកូនចំនួន ៦នាក់ជាចំណងដៃ កូន៤នាក់របស់ពួកគេ បានកាត់ទៅរកឪពុក។
២. មនុស្សមានជើង ៣
បុរសម្នាក់ឈ្មោះ Francesco Lentini បានកើតក្នុងឆ្នាំ ១៨៨៩ ក្នុងប្រទេសអ៊ីតាលី នៃគ្រួសារមួយដែលមានបងប្អូនប្រុសស្រីចំនួន ១២ នាក់។ បងប្អូនចំនួន ១១ នាក់ គឺមានសុខភាពល្អធម្មតា ខុសគេតែ Francesco កើតមកមានជើងរហូតដល់ទៅ ៣។
៣. កុមារអាយុ ៤ ឆ្នាំវ័យឆ្លាតជាងគេបំផុត
ក្មេងប្រុសម្នាក់ឈ្មោះ Christian Heinrich Hieneken បានកើតក្នុងឆ្នាំ ១៧២១ ក្នុងទីក្រុង Lübeck នៃភាគខាងជើងប្រទេសអាល្លឺម៉ង់។ កុមារាដែលឆ្លាតវៃជាងគេរូបនេះ អាចស្គាល់ឈ្មោះគ្រប់វត្ថុក្នុងផ្ទះទាំងប៉ុន្មាន ក្នុងវ័យត្រឹមតែ ១០ ខែ។ ចម្រើនវ័យបាន ១ ឆ្នាំ គេអាចនិយាយព័ត៌មានលំអិតពីគម្ពីរឡាទីន ដែលនិយាយពីប្រវត្តិរបស់ភាសាដាណឺម៉ាក។
តែជាអកុសល ជីវិតរបស់ Christian គឺខ្លីពេក។ គេឃើញជំងឺកាចសាហាវមួយ ហើយក៏បានស្លាប់ក្នុងឆ្នាំ ១៧២៥ ក្នុងវ័យត្រឹមតែ ៤ ឆ្នាំប៉ុណ្ណោះ។
៤. មនុស្សអូដ្ឋ
ក្មេងស្រីម្នាក់ឈ្មោះ Ella Harper កើតក្នុងឆ្នាំ ១៨៧០ ក្នុងក្រុង Hendersonville នៃរដ្ឋ Tennessee របស់សហរដ្ឋអាមេរិក។ ពេលកើតមក នាងបានប្រឈមនឹងជំងឺម៉្យាងដែលធ្វើឲ្យជង្គង់របស់នាងបត់ក្រោយ ១៨០ ដឺក្រេ។ ដោយកើតមកមានលក្ខណៈខុសគេបែបនេះ Ella Harper តែងតែដើរទៅណាមកណា ដោយប្រើប្រាស់ជើង និងដៃទាំង២របស់នាង។ ដោយដើរជើង៤បែបនេះ ទើបគ្រប់គ្នាដាក់រហស្សនាមឲ្យនាងថា ជាក្មេងស្រីអូដ្ឋ។
៥. កូនភ្លោះដ៏ចម្លែក
កូនស្រីភ្លោះទាំង២រូបនេះ ម្នាក់ឈ្មោះ June និងម្នាក់ទៀតឈ្មោះ Jennifer Gibbons។ ពួកគេកើតក្នុងឆ្នាំ ១៩៦៣ នៅរដ្ឋធានី Barbados។ ក្មេងទាំង២នេះ មានលក្ខណៈខុសប្លែកពីក្មេងទូទៅ ដោយសារតែពួកគេមិនចេះនិយាយស្ដីដាក់នរណាឡើយ ដោយហេតុនេះ មនុស្សគ្រប់គ្នាគិតថាពួកគេជាក្មេងមិនគ្រប់ទឹក។
ក្រោយពីផ្លាស់ទៅនៅប្រទេសWales ឪពុកម្ដាយរបស់ June និង Jennifer បានរកឃើញថា កូនៗរបស់ពួកគេ មិនមែនឆ្កួតអត់គ្រប់ទឹកដូចគ្រប់គ្នាថានោះទេ។ តាមពិតទៅ ពួកគេបាននិយាយរកគ្នាក្នុងភាសាមួយដែលមានតែគេ២នាក់ប៉ុណ្ណោះទើបយល់។ ប៉ុន្តែបើមានមនុស្សណាមកជិតនោះ ពួកគេឈប់និយាយគ្នាភ្លាម។
ក្រោយមក ឪពុកម្ដាយរបស់ពួកគេព្យាយាមបំបែក ដោយឲ្យរៀនសាលាផ្សេងគ្នា ដើម្បីឲ្យគេចេះទាក់ទងនឹងមនុស្សខាងក្រៅខ្លះ ប៉ុន្តែអ្វីៗកាន់តែអាក្រក់ ក្មេងភ្លោះទាំង២រូបនោះ បានចាប់ផ្ដើមខឹងឆេវឆាវខ្លាំងឡើង។ បើទោះបីជាពួកគេមិនសូវបានរៀនសូត្រពិតមែន ប៉ុន្តែពួកគេអាចសរសេរអក្សរបាន។ ក្មេងទាំង២នេះ ចំណាយពេលរបស់ពួកគេសឹងតែទាំងអស់នៅក្នុងបន្ទប់ និងសរសេរកំណត់ហេតុប្រចាំថ្ងៃ ប៉ុន្តែអ្វីៗដែលពួកគេសរសេរគឺចម្លែកៗ និងគួរឲ្យខ្លាច។
ក្រោយមក ពួកគេត្រូវបានបញ្ជូនទៅកាន់មន្ទីរពេទ្យចិត្តសាស្ត្រ ដើម្បីព្យាបាល។ មិនយូរប៉ុន្មាន Jennifer បានស្លាប់បាត់បង់ជីវិតដោយសារគាំងបេះដូង។ អ្វីដែលគួរឲ្យភ្ញាក់ផ្អើលនោះគឺថា ក្រោយ Jennifer បានស្លាប់ទៅ June ចាប់ផ្ដើមចេះនិយាយទៅកាន់មនុស្សនៅជុំវិញខ្លួននាង ហើយបានរស់នៅជីវិតសាមញ្ញធម្មតាដូចមនុស្សទូទៅ៕