មកស្វែងយល់ពីមុខរបរផលិតគ្រឿងសង្ហារិមធ្វើពីផ្ដៅ របស់អ្នកស្រុកឈូក ខេត្តកំពត

2018-07-15 10:24:16
ចំនួនមតិ 0 | ចំនួនចែករំលែក 0

ចន្លោះមិនឃើញ

អាជីវកម្មខ្លះបានផ្លិចបំផ្លាញធនធានធម្មជាតិ ដែលធ្វើឲ្យមហាជនមិនសូវជាសប្បាយចិត្តនោះទេ ប៉ុន្ដែ អ្នកភូមិព្រែកត្នោត ឃុំព្រែកត្នោត ស្រុកទឹកឈូ ខេត្តកំពត បានកាប់ផ្ដៅយកមកធ្វើជាគ្រឿងសង្ហារិមពិតមែន ប៉ុន្ដែពួកគេបានបង្កើតទៅជាសហគមន៍ ដើម្បីថែរក្សាវិញ។ ការថែរក្សាដើម្បីឲ្យកុំឲ្យផ្ដៅបាត់បង់ផង និងឲ្យអាជីវកម្មមាននិរន្តភាពផង។

១. លោក រ័ត្ន រ៉ែម វ័យ៦៤ឆ្នាំ ជាប្រធានសហគមន៍ផលិតគ្រឿងសង្ហារិមពីផ្តៅ នៅភូមិព្រែកត្នោត ឃុំព្រែកត្នោត ស្រុកទឹកឈូក ខេត្តកំពត។ នៅមុនប្រកបរបរនេះ លោក គឺជាអ្នកនេសាទសមុទ្រ និង ជាអ្នកដឹកត្រីលក់ម្នាក់។ លោកបានចូលរួមនៅក្នុងសហគមន៍នៅឆ្នាំ ២០០២ និងចាប់ផ្ដើមផលិតគ្រឿងសង្ហារិមពីផ្តៅ នៅឆ្នាំ ២០០៧។

២. សហគមន៍ មិនមែនប្រើតែផ្ដៅធម្មជាតិប៉ុណ្ណោះទេ ពួកគេថែមទាំងបណ្ដុះ និងដាំផ្តៅឡើងវិញនៅលើដីសហគមន៍ផងដែរ។ ការធ្វើដូច្នេះ គឺដើម្បីឱ្យអាជីវកម្មរបស់ពួកគេមាននិរន្តរភាព។ នៅក្នុងរូបនេះ លោក រ័ត្ន រ៉ែម កំពុងកាប់ផ្ដៅដែលលោកបានដាំ កាលពីប៉ុន្មានឆ្នាំមុន យកទៅប្រើប្រាស់។ ជាធម្មតា ការឡើងភ្នំរកផ្តៅ ជាភារកិច្ចរបស់សមាជិកសហគមន៍។ សមាជិកដែលរកផ្ដៅបាន នឹងទទួល បានប្រាក់កម្រៃទៅតាមបរិមាណផ្ដៅដែលពួកគេរកបាន។

៣. ផ្តៅដែលកាប់បានមក ត្រូវយកទៅហាលមួយរយៈពេលឲ្យស្ងួតល្អ។ បន្ទាប់មកសមាជិកសហគមន៍ឯទៀត នឹងកែច្នៃវា ដោយចាប់ផ្ដើមពីការកាត់ជាកង់ៗ ពុតផ្ដៅឱ្យត្រង់ដោយប្រើភ្លើង កោសសម្អាតសម្បក ពុះច្រៀក ... ជាដើម។ នៅក្នុងរូបភាពនេះ សមាជិកសហគមន៍ជាស្ត្រី កំពុងកោសសម្អាតសម្បកផ្តៅ និង កាត់វាជាកង់ៗ ដើម្បីយកទៅដំឡើងជាទូផ្តៅ។

៤. កំណាត់ផ្ដៅដែលពុត និង សម្អាតរួចហើយ នឹងត្រូវដំឡើងជាគ្រឿងសង្ហារិមផ្សេងៗ ទៅតាមតម្រូវការទីផ្សារ និង ក្រោមការត្រួតពិនិត្យរបស់លោក រ័ត្ន រ៉ែម។ នៅក្នុងរូបនេះ សមាជិកម្នាក់កំពុងដំឡើងតុតូច សម្រាប់ដាក់នៅក្នុងបន្ទប់ ទទួលភ្ញៀវ។

៥. គ្រឿងសង្ហារិម ដែលផលិតរួចហើយ ត្រូវយកទៅរក្សាទុកក្នុងឃ្លាំងមួយរយៈ។ បន្ទាប់មកលោក រ័ត្ន រ៉ែម ដឹកវាតាមរ៉ឺម៉កទៅលក់នៅផ្សារកំពត។ ដោយសារអតិថិជនទទួលស្គាល់ស្នាដៃជាងក្នុងសហគមន៍ ការលក់គ្រឿងសង្ហារិមនេះ មិនលំបាកក្នុងការរកទីផ្សារទេ។ នៅផ្សារកំពត លោក រ័ត្ន រ៉ែម មានម៉ូយ២នាក់ ដែលតែងទទួលទិញគ្រឿងសង្ហារិមរបស់សហគមន៍លោកជានិច្ច។ នៅក្នុងរូបនេះ លោក រ័ត្ន រ៉ែម កំពុងពិនិត្យមើល ទូរដាក់សៀវភៅធ្វើពីផ្តៅ មុននឹងលើកវាទៅរក្សាទុកក្នុងឃ្លាំង។

អត្ថបទ៖ ក្រុមការងារផ្លូវទៅស្រុក