មានដឹងអត់ថា ម៉ឺន សុភា ទៅណាមិនឃើញឡើងសង្វៀន?

2018-07-18 02:54:33
ចំនួនមតិ 0 | ចំនួនចែករំលែក 0

ចន្លោះមិនឃើញ

មូលហេតុពិតប្រាកដដែល ម៉ឺន សុភា មិនបានឡើងសង្វៀនប្រកួតនាបច្ចុប្បន្ន នោះគឺដោយសារមានរបួស ហើយត្រូវសម្រាកព្យាបាលយ៉ាងតិច ៦-៧ខែ ដែរទើបអាចវិលចូលសង្វៀនដូចធម្មតាវិញ ព្រោះមានរបួសច្រើនកន្លែង។

បើតាមការឲ្យដឹងពីលោក ធន់ សុភា គ្រូរបស់ ម៉ឺន សុភា បានឲ្យដឹងម្សិលមិញនេះថា ក៏សូមអភ័យទោសដល់អ្នកស្រឡាញ់គាំទ្រកូនសិស្សរបស់លោក ដែលមិនបាត់មុខមួយរយៈនេះមិនឃើញឡើងសង្វៀន។ ដោយសារតែអ្នកប្រដាល់រូបនេះមានរបួសដល់ទៅ៣កន្លែងឯណោះ ទី១ រយះស្មងជើងឆ្វេង ទី២ហើមគន្លាក់កដៃស្ដាំ និងទី៣ ឈឺក្បាលជង្គង់ស្ដាំ។

គ្រូប្រដាល់ល្បីឈ្មោះរូបនេះបន្ថែមថា យ៉ាងហោចណាស់ក៏ត្រូវសម្រាកឲ្យបាន ៦-៧ខែ ដែរ ដើម្បីព្យាបាលរបួសខាងលើនេះឲ្យបានជាសះស្បើយត្រឹមត្រូវសិន ព្រោះខ្លាចមានបញ្ហាកាន់តែខ្លាំងបើនៅទ្រាំឡើងសង្វៀនបែបនេះ។ បើទោះជាមិនបានឡើងសង្វៀនមែន ប៉ុន្តែ ម៉ឺន សុភា នៅតែបន្តហ្វឹកហាត់ និងបង្ហាត់សិស្សប្អូនដូចធម្មតាដដែល តែក៏មិនសូវជាខ្លាំងនោះដែរ។

រំលឹកដែរថា កីឡាករ ម៉ឺន សុភា មានរបួសទាំងនេះតាំងតែពីមុនចេញទៅប្រកួតមិត្តភាពឯប្រទេសបារាំងមកម្ល៉េះ តែទ្រាំបន្តការប្រកួត។ តាំងពីវិលត្រលប់មកពីប្រទេសបារាំង កាលពីថ្ងៃទី២៦ ខែកក្កដា ឆ្នាំ២០១៨ មកដល់ពេលនេះ អ្នកប្រដាល់កណ្ដាប់ដៃថ្ម ម៉ឺន សុភា មិនបានឡើងសង្វៀនប្រកួតនោះឡើយ ខណៈកីឡាករដែលទើបមកដទៃទៀត បានឡើងប្រកួតស្ទើរគ្រប់គ្នាទៅហើយ៕

អត្ថបទ៖ នួន ស៊ីណា