មិនមែនជួសជុលតែផ្លូវជាតិលេខ៤មួយទេ ផ្លូវសំខាន់ៗទៅខេត្តទាំង៥នេះ ក៏ខូចខាតខ្លាំងដែរ

2018-07-20 03:21:04
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក វ៉ា ស៊ឹមសូរិយា អ្នកនាំពាក្យនៃក្រសួងសាធារណការ និងដឹកជញ្ជូន បញ្ជាក់ប្រាប់ Sabay នាព្រឹកនេះថា បន្ទាប់ពីអាកាសធាតុល្អឡើងវិញ ក្រសួង និងមន្ទីរសាធារណការនៅតាមបណ្ដាខេត្តនឹងដុតដៃដុតជើងជួសជុលផ្លូវដែលខូចខាតដោយសារភ្លៀងធ្លាក់ជោកជាំទាំងអស់។ ក្នុងនោះ ក្រៅពីផ្លូវជាតិលេខ៤ ឆ្ពោះទៅខេត្តព្រះសីហនុ មានផ្លូវសំខាន់ៗឆ្ពោះទៅបណ្ដាខេត្តកំពត ខេត្តកោះកុង ខេត្តកំពង់ស្ពឺ ខេត្តបាត់ដំបង និងខេត្តប៉ៃលិន។

ខេត្តកំពត ត្រង់ចំណុចព្រែកកំពង់បាយ បានបន្តឡើងខ្លាំងគិតចាប់ពីថ្ងៃទី ១៩ កក្កដា។ ជាមួយគ្នានោះ ផ្លូវជាតិលេខ ៣, ផ្លូវជាតិលេខ ៣១, ផ្លូវជាតិលេខ ៣៣ និង ផ្លូវជាតិលេខ៤១ ឆ្ពោះខេត្តកំពត និងផ្លូវជាតិលេខ ៤ ទៅកាន់ខេត្តកំពង់ស្ពឺ នៅក្នុងភូមិសាស្ត្រស្រុកភ្នំស្រួច ក៏កំពុងរងការខូចខាតខ្លាំង។

ផ្លូវខេត្តកំពង់ស្ពឺ

ប្រជាជនខ្មែរទូទាំងប្រទេសបន់ស្រន់ ឲ្យពលរដ្ឋតាមបណ្ដាខេត្តទាំងនេះចាកផុតគ្រោះទាំងពួង

រីឯខេត្តបាត់ដំបងកំណាត់ផ្លូវជាតិលេខ៥ និងផ្លូវឆ្ពោះទៅរង្វង់មូលតាដំបងក្រញូង ចាប់ផ្ដើមលិចខ្លាំង តាំងពីម្សិលមិញ ដោយសារភ្លៀងធ្លាក់ជាប់ៗគ្នា។ ដោយឡែកខេត្តប៉ៃលិន នៅបណ្ដោយផ្លូវជាតិលេខ ៥ និង ផ្លូវជាតិលេខ១០ ក៏រងការខូចខាតមួយចំនួន។

អ្នកនាំពាក្យរូបនេះ មិនទាន់ទទួលបានរបាយការណ៍លម្អិតអំពីផ្លូវដែលខូចខាតនៅខេត្តដទៃទៀតនៅឡើយ។ លោកបញ្ជាក់ថា ទឹកជន់ដោយសារទឹកភ្លៀងឆ្នាំនេះ ធ្វើប៉ះពាល់ផ្លូវខ្លាំងជាងមុន ហើយការចំណាយជួសជុលក៏ខ្ពស់ផងដែរ។ យ៉ាងណាមិញ អ្នកនាំពាក្យ មិនបានបង្ហើបចំនួនទឹកប្រាក់ដើម្បីជួសជុលទាំងឆ្នាំមុន និងឆ្នាំនេះនោះទេ។